រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីជាសន្តិសុខយាមកាមរោងចក្រម្នាក់ ឆ្លៀតពេលទំនេរម៉ោងការងារក៏បានជិះម៉ូតូដើរលក់ទឹកសណ្ដែកបន្ថែមទៀត ដើម្បីបំពេញតម្រូវការជីវភាពខ្វះខាតប្រចាំថ្ងៃ ទាំងខ្លួនមានជំងឺបេះដូងប្រចាំកាយ ។ ខណៈនៅពេលជំងឺធ្វើទុក្ខ ស្ត្រីរូបនេះក៏បានលេបថ្នាំដោយមិនបានហូបអាហារនោះទេ…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីជាសន្តិសុខយាមកាមរោងចក្រម្នាក់ ឆ្លៀតពេលទំនេរម៉ោងការងារក៏បានជិះម៉ូតូដើរលក់ទឹកសណ្ដែកបន្ថែមទៀត ដើម្បីបំពេញតម្រូវការជីវភាពខ្វះខាតប្រចាំថ្ងៃ ទាំងខ្លួនមានជំងឺបេះដូងប្រចាំកាយ ។ ខណៈនៅពេលជំងឺធ្វើទុក្ខ ស្ត្រីរូបនេះក៏បានលេបថ្នាំដោយមិនបានហូបអាហារនោះទេ ស្រាប់តែដួលសន្លប់បាត់មាត់បាត់.កតែម្តង បង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ច កាលពីវេលាម៉ោង៦និង៤០នាទីព្រលប់ ថ្ងៃទី១០ ខែឧសភា ឆ្នាំ២០២១ នៅជិតនឹងអតីតក្លឹបកំសាន្ត រ៉ុក តាមផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន ។
សេចក្តីរាយការណ៍ប្តថា ស្ត្រីដែលជិះម៉ូតូបានដួលសន្លប់នោះ ត្រូវបានគេឱ្យស្គាល់ថា មានឈ្មោះ ញន រចនា អាយុ៣៣ឆ្នាំ មុខរបរសន្តិសុខក្រុមហ៊ុនឯកជន ស្នាក់នៅកន្លែងធ្វើការ មានស្រុកកំណើត ភូមិច្រកម្រាក ឃុំអង្គប្រស្រែ ស្រុករមាសហែក ខេត្តស្វាយរៀង។
បើតាមសម្ដីអ្នកលក់ដូរតាមម៉ូតូរ៉ឺម៉កដែលនៅក្បែរកន្លែងកើតហេតុ បានឱ្យដឹងថា មុនពេលកើតហេតុ គេបានឃើញស្ត្រីខាងលើ ជិះម៉ូតូម៉ាកហុងដាវ៉ែវ ពណ៌ខ្មៅ ពាក់ស្លាកលេខ ស្វាយរៀង 1N 6795 ដោយដឹកធុងលក់ទឹកសណ្ដែកតាមម៉ូតូទៀតផង។
ប្រភពដដែលបន្តថា លុះដល់ដល់ចំណុចកើតហេតុ ស្ត្រីរូបនេះក៏បានអែមម៉ូតូទៅកៀនផ្លូវ រួចអង្គុយចុះ ហើយពេលនោះដោយឃើញមានអាការៈមិនស្រួល អ្នកលក់ដូរដូចគ្នាក៏បានសួរនាំ ពីចម្ងាយ ស្រាប់តែស្ត្រីរងគ្រោះបាននិយាយថា «គាត់មានជំងឺបេះដូង ហើយគាត់លេបថ្នាំ ដោយមិនបានហូបបាយ ឬចំណីអ្វីទេ» លុះពេលទើបនិយាយរួច ក៏ស្រាប់តែដួលសន្លប់បាត់មាត់បាត់.កតែម្តង។
ប្រភពដដែលបន្តថា លុះបន្តិចក្រោយមក ក៏បង្កឱ្យមានភ្ញាក់ផ្អើលដល់បងប្អូនប្រជាពលរដ្ឋដែលធ្វើដំណើរតាមផ្លូវ រួមទាំងសមត្ថកិច្ចមូលដ្ឋាន បានចុះទៅសួរនាំពីចម្ងាយ ដោយមិនហ៊ាននាំគ្នាចូលទៅជិតទេ ព្រមទាំងធ្វើការទាក់ទងហៅរថយន្តសង្គ្រោះ តែមិនឃើញមានរថយន្តណាមួយមកទទួលនោះទេ ។ ចំណែកប្រជាពលរដ្ឋ និងសមត្ថកិច្ច ក៏មិនហ៊ានចូលជិតដែរ ដោយសារតែខ្លាចស្ត្រីរងគ្រោះរូបនេះ មានជំងឺកូវីដ១៩ គឺបានត្រឹមតែនាំគ្នាជួយបាញ់ទឹកអាកុល និងយកឈើមកឆ្កឹះដាស់ស្ត្រីរងគ្រោះតែប៉ុណ្ណោះ ។
ប្រភពដដែលបន្តទៀតថា បន្ទាប់ពីចាំរថយន្តសង្គ្រោះយូរពេកមិនឃើញមក សមត្ថកិច្ចក៏បានយកឈើឆ្កឹះចុះឆ្កឹះឡើង និងស្រែកហៅស្ត្រីរងគ្រោះ ក៏បានដឹងខ្លួនវិញ ហើយងើបអង្គុយទាំងទឹកមុខស្រងូតស្រងាត់ និងបាននិយាយថា គាត់បានចេញពីលក់ទឹកសណ្ដែកនៅម្តុំផ្សារថ្មី ក្នុងគោលបំណងទៅយាមកាមរោងចក្រ នៅម្តុំចាក់អង្រែ ខណ្ឌមានជ័យ បន្តទៀត តែដោយសារគាត់មានជំងឺបេះដូងធ្វើទុក្ខ ក៏យកថ្នាំមកលេបទាំងមិនបានញ៉ាំអាហារ ហើយណាមួយរូបគាត់ មិនបានសម្រាកគ្រប់គ្រាន់ផងនោះ ទើបធ្វើឱ្យអត់មានកម្លាំង ទប់ជាមួយនឹងថ្នាំមិនបាន ក៏ដួលសន្លប់តែម្តងទៅ ។
ក្រោយពេលកើតហេតុ ស្ត្រីរងគ្រោះបានអង្គុយឱ្យមានកម្លាំងបន្តិច រួចហើយក៏បន្តជិះម៉ូតូទៅមុខទៀត ដើម្បីទៅកន្លែងធ្វើការរបស់ខ្លួនជាបន្តទៀត ៕
ចែករំលែកព័តមាននេះ