រាជធានីភ្នំពេញ ៖ លោក ហាស់ ឆេន ប្រធានគណៈកម្មការផ្សារកាប់គោ បានឱ្យដឹងថា បើអាជីវករមិនព្រមទៅយកសំណាក និងមិនមានឯកសារបញ្ជាក់ថាបានយកសំណាករកមេរោគកូវីដ-១៩នោះទេ ពេលបើកផ្សារវិញ គឺមិនអនុញ្ញាតឱ្យចូលទៅលក់វិញឡើយ។ ការបញ្ជាក់របស់ប្រធានគណៈកម្មការផ្សារកាប់គោនេះ ធ្វើឡើងក្រោយពីមានក្រុមអាជីវករមួយចំនួនតូចបានព្យាយាម និងលួចចេញលក់អីវ៉ាន់តាមចិញ្ចើមផ្លូវនៅខាងក្រៅជាប់ផ្សារ ដែលមានអ្នកខ្លះមានបានទៅយកសំណាកទៀតផង បន្ទាប់ពីផ្សារនេះបានបិទកាលពីថ្ងៃទី២៥ ខែមេសាកន្លងមកនោះ។
លោក ហាស់ ឆេន បានបញ្ជាក់ថា បន្ទាប់ពីផ្សារកាប់គោត្រូវបានបិទកាលពីថ្ងៃទី២៥ ខែមេសាកន្លងមក ក្រុមអាជីវករមួយចំនួនមានការភ័យខ្លាច និងប្រញាប់ទៅយកសំណាករកមេរោគកូវីដ-១៩ ប៉ុន្តែក៏មានអាជីវករមួយចំនួនមិនបានទៅយកសំណាកផងដែរ។ លោកបន្តថា ចំពោះអាជីវកដែលមិនបានទៅយកសំណាកដែលមិនមានឯកសារបញ្ជាក់គ្រប់គ្រាន់នោះទេ នៅពេលបើកផ្សារវិញ លោកនឹងដាក់កម្លាំងនៅតាមច្រកចូលផ្សារ ដើម្បីត្រួតពិនិត្យឯកសារ បើមិនមានឯកសារបញ្ជាក់ គឺមិនឱ្យចូលតែម្តង។
សូមបញ្ជាក់ថា ផ្សារកាប់គោក្បែរវិមានឯករាជ្យនេះ មានអាជីវករសរុបចំនួន២៨៦នាក់ ក្នុងនោះអាជីវករតាមតូបមានចំនួន១៨៦តូប គ្រែចល័តមានចំនួន៧៧គ្រែ និងលក់តាមកញ្ច្រែងមានចំនួន២៣។ ដោយមានការណែនាំពីរដ្ឋបាលរាជធានីភ្នំពេញ និងការសំណូមពរពីគណៈកម្មការផ្សារកាប់គោ ក្រុមអាជីវករទាំងអស់បានស្ម័គ្រចិត្តឈប់លក់ និងបិទផ្សារទាំងស្រុងកាលពីថ្ងៃទី២៤ ខែមេសា ក្នុងនោះគណៈកម្មការផ្សារក៏បានអំពាវនាវឱ្យពួកគាត់ទៅយកសំណាករកមេរោគកូវីដ-១៩ ដើម្បីចូលរួមទប់ស្កាត់ការរីករាលដាលជំងឺកូវីដ-១៩ជាមួយរាជរដ្ឋាភិបាលផងដែរ ៕ ដោយ ៖ ចន ណារិទ្ធ
ចែករំលែកព័តមាននេះ