អេស្ប៉ាញ ៖ យុវជនរាប់រយនាក់នៅទូទាំងប្រទេសអេស្ប៉ាញ បាននាំគ្នារាំតាមដងផ្លូវ នៅពេលនាឡិកាបន្លឺសំលេងឡើងនៅពាក់កណ្តាលអធ្រាត្រថ្ងៃទី៨ ខែឧសភា។ ដើម្បីអបអរសាទរថ្ងៃបញ្ចប់បំរាមគោចរកូវីដ១៩ ដែលមានរយៈពេល៦ខែ។
ជាមួយនឹងអត្រាការឆ្លងកូវីដ១៩ មានស្ថេរភាព ស្របនិងវឌ្ឍនភាពការចាក់វ៉ាក់សាំងភាគច្រើននៃតំបន់ទាំង១៧។ ដែលនាំឱ្យរដ្ឋាភិបាលអេស្ប៉ាញ អាចបន្ធូរបន្ថយច្បាប់រឹតត្បិតស្ទើរតែទាំងស្រុង។ ជាពិសេសអនុញ្ញាតឱ្យមានការធ្វើដំណើរឆ្លងរវាងតំបន់មួយទៅតំបន់មួយ។
ការរាំច្រៀងយ៉ាងសប្បាយ បានកើតមាននៅឯកណ្តាលទីក្រុងម៉ាឌ្រីដ ក៏ដូចជាទីក្រុងបាសេឡូណាផងដែរ។ ខណៈដែលអ្នកដើរកំសាន្តជាច្រើនផ្សេងទៀត បានធ្វើដំណើរទៅកាន់ឆ្នេរសមុទ្រ។
ភោជនីយដ្ឋាន និងបារក្នុងស្រុកក៏នឹងអាចបើករហូតដល់ម៉ោង១១យប់។ ទោះជាយ៉ាងណាក៏ដោយដែនកំណត់នៃមនុស្ស៤នាក់ក្នុងតុតែមួយនៅតែត្រូវអនុវត្ត។ ហើយការញ៉ាំក្នុងផ្ទះក៏ត្រូវបានកំណត់ត្រឹម៣០ភាគរយ។
បើទោះបីជាការហាមឃាត់ធ្វើដំណើរក្នុងតំបន់បានបញ្ចប់។ ហើយបំរាមគោចរត្រូវបានដកចេញក៏ពិតមែន។ ប៉ុន្តែមិនមានន័យថា ការរឹតត្បិតត្រូវបានបន្ធូរបន្ថយទាំងអស់នោះទេ។ ដោយតំបន់ទាំងនោះ នៅតែអាចរឹតត្បិតម៉ោងបើក និងការដាក់កម្រិតភ្ញៀវនៅតាមបារ និងភោជនីយដ្ឋាន។
អាជ្ញាធរក៏អាចស្វែងរកការយល់ព្រមពីតុលាការ សម្រាប់វិធានការតឹងរឹងដូចជាការរៀបចំឡើងវិញនូវបំរាមគោចរ, ការជ្រើសរើសចំនួនដែលត្រូវអនុញ្ញាតក្នុងការជួបជុំគ្នានៅផ្ទះ ឬការពង្រីកការហាមឃាត់ការធ្វើដំណើរផ្សេងៗ។
រហូតមកទល់ពេលនេះ មានតែតំបន់ចំនួន ៤ ប៉ុណ្ណោះ ដែលកំពុងរក្សាបំរាមគោចរដ៏តឹងរឹងរបស់ខ្លួនមានដូចជា ៖ កោះ Balearic, កោះ Canary, សហគមន៍ស្វយ័ត Navarre រួមនិងរដ្ឋធានី Valencia៕ (ដកស្រង់ចេញពី DW)
ចែករំលែកព័តមាននេះ