រាជធានីភ្នំពេញ ៖ សហគមន៍មូលនិធិនគរកាយវត្តព្រះពុទ្ធសាសនាកម្ពុជា នៅព្រឹកថ្ងៃទី២៦ តុលា ២០១៥ បានធ្វើពិធីប្រគល់អំណោយដល់អនុសាខាកាកបាទក្រហមកម្ពុជា ខណ្ឌឫស្សីកែវ ដើម្បីយកទៅចែកជូនដល់ប្រជាពលរដ្ឋដែលងាយរងគ្រោះ និងគ្រោះថ្នាក់ផ្សេងៗ ។
ពិធីនេះបានរៀបចំធ្វើឡើងនៅវត្តញាណរង្សី ក្នុងសង្កាត់ទួលសង្កែ ខណ្ឌឫស្សីកែវ ដោយមានការនិមន្តចូលរួមប្រគល់ពីសំណាក់ព្រះមង្គលរក្ខិត សុវណ្ណជោតិ បណ្ឌិត ខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី និងទទួលដោយលោក ជា ពិសី អនុប្រធានគណៈកម្មការអនុសាខាកាកបាទក្រហមកម្ពុជា ខណ្ឌឫស្សីកែវ និងជាតំណាងលោក ធុយ សុខន ប្រធានគណៈកម្មការអនុសាខាកាកបាទក្រហមកម្ពុជា ខណ្ឌឫស្សីកែវ ។
អំណោយដែលត្រូវប្រគល់ជួនដល់កាកបាទក្រហមនៅពេលនោះរួមមាន អង្ករ១តោន, មី១០កេស, ទឹកត្រី-ទឹកស៊ីអ៊ីវ២០យួរ, ទឹកដោះគោ២០កំប៉ុង, ស្ករស២០គីឡូក្រាម, ទឹកក្រូច៥កេស, ត្រីខ១០យួរ, តែ២០០កញ្ចប់, ទឹកសុទ្ធ១០កេស, សម្ភារផ្ទះបាយ២សម្រាប់ និងថវិកា៤លានរៀល ដែលសរុបទាំងអស់គិតជាទឹកប្រាក់ចំនួន៧.៦១០.១០០រៀល ។ នៅក្នុងឱកាសនោះក៏មានការប្រគេនទេយ្យទាន និងបច្ច័យដល់ព្រះសង្ឃជាសមនសិស្សចំនួន៣៨អង្គ ដោយក្នុង១អង្គៗទទួលបានទេយ្យទាន១កញ្ចប់ និងបច្ច័យ៥ម៉ឺនរៀលផងដែរ ។
លោក ជា ពិសី ក៏បានកោតសរសើរដល់ព្រះតេជគុណ ព្រះមង្គលរក្ខិត សុវណ្ណជោតិ បណ្ឌិត ខឹម សម្បត្តិ ដែលកន្លងមកតែងតែនាំយកអំណោយប្រគល់ជួនកាកបាទក្រហមកម្ពុជាគ្រប់ថ្នាក់ និងអាជ្ញាធរ ព្រមទាំងចុះចែកជូនប្រជាពលរដ្ឋដែលងាយរងគ្រោះដោយផ្ទាល់ព្រះអង្គ ។ លោកបានឲ្យដឹងទៀតថា កន្លងមកព្រះមង្គលរក្ខិត សុវណ្ណជោតិ បណ្ឌិត ខឹម សម្បត្តិ បានដឹកនាំក្នុងវិស័យព្រះពុទ្ធសាសនាបានល្អ ក្នុងនាមព្រះប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា ព្រះអង្គបានចូលរួមបម្រើមនុស្សធម៌មានកិត្តិនាមល្បីនៅទូទាំងប្រទេស ។ បន្ទាប់ពីទទួលបានអំណោយនេះ លោកនឹងនាំយកទៅចែកជូនដល់ដៃបងប្អូនប្រជាពលរដ្ឋទីទ័លក្រ ចាស់ជរា ឲ្យចំគោលដៅតែម្តង ។
ព្រះតេជគុណ ព្រះមង្គលរក្ខិត សុវណ្ណជោតិ បណ្ឌិត ខឹម សម្បត្តិ បានមានសង្ឃដីកាថា អំណោយដែលប្រគល់ជួនដល់អនុសាខាកាកបាទក្រហមកម្ពុជា ខណ្ឌឫស្សីកែវ នៅពេលនេះបានមកពីពុទ្ធបរិស័ទ និងសប្បុរសជនដែលបានប្រគេនដល់ព្រះអង្គនៅក្នុងឱកាសបុណ្យភ្ជុំបិណ្ឌ ហើយព្រះអង្គក៏បានយកមកប្រគល់ដល់កាកបាទក្រហម ដើម្បីយកទៅចែកជួនដល់ប្រជាពលរដ្ឋបន្តទៀត ដើម្បីឧទ្ទិសកុសលដល់ពុទ្ធបរិស័ទ ។ ព្រះតេជគុណបានមានសង្ឃដីកាទៀតថា ការកៀងគរអំណោយ ដើម្បីបម្រើឱ្យសកម្មភាពមនុស្សធម៌ជាមួយរាជរដ្ឋាភិបាលកម្ពុជានេះជាកុសល និងការដឹងគុណដល់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានជួយរំដោះប្រជាពលរដ្ឋ និងសាសនា ឲ្យរស់រានមានជីវីត និងមានអ្វីៗនៅពេលនេះ ៕
ចែករំលែកព័តមាននេះ