រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់មានជំងឺសរសៃប្រសាទប្រចាំកាយ បានដុតខ្លួនឯង រហូតដល់ស្លា.ប់នៅក្នុងបន្ទប់ជួលយ៉ាងអាណោចអាធ័មបង្កឱ្យមានការភ្ញាក់ផ្អើលកាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី៨ ខែឧសភា ឆ្នាំ២០២១ នៅចំណុចក្នុងបន្ទប់ជួលក្បែររោងចក្រទឹកកក ផ្លូវលំ ស្ថិតក្នុងសង្កាត់ចាក់អង្រែលើ ខណ្ឌមានជ័យ ។
សេចក្តីរាយការណ៍បន្តថា ស.ពជនរងគ្រោះខាងលើមានឈ្មោះ ពៅ អូន ភេទប្រុស អាយុ៣៦ឆ្នាំ មុខរបរស៊ីឈ្នួលដឹកខ្សែភ្លើង ស្នាក់នៅបន្ទប់ជួល ក្នុងសង្កាត់ចាក់អង្រែលើ ខណ្ឌមានជ័យ មានស្រុកកំណើតនៅស្រុកត្រាំកក់ ខេត្តតាកែវ និងមានប្រពន្ធឈ្មោះ លន ស៊ីណែត អាយុ៣២ឆ្នាំ មុខរបរកម្មការិនីរោងចក្រ ព្រមទាំងមានកូនចំនួន៣នាក់រស់នៅស្រុកកំណើតផងដែរ ។
តាមសម្តីស្ត្រីជាប្រពន្ធបានអោយដឹងថា ប្តីរបស់គាត់ មានជំងឺសរសៃប្រាសាទប្រចាំកាយ៥ទៅ៦ឆ្នាំមកហើយ បន្ទាប់ពីជួបគ្រោះថ្នាក់ចរាចរណ៍ ។
ស្ត្រីជាប្រពន្ធបានបន្តទៀតថា នៅល្ងាចថ្ងៃកើតហេតុ ប្តីរបស់គាត់បានរករឿងគាត់ជាប្រពន្ធ ដោយយកកាំបិតដេញចាក់ ដេញអារ.ករូបគាត់ផ្អើលអស់អ្នកផ្ទះជួលម្តងរួចមកហើយ ធ្វើអោយរូបគាត់ជាប្រពន្ធមិនហ៊ានទៅដេកជាមួយប្តីនោះទេ ក៏សម្រេចចិត្តទៅដេកបន្ទប់អ្នកជិតខាងដែលត្រូវជាសាច់ញាតិ ដោយទុកអោយបុរសជាប្តីដេកនៅតែម្នាក់ឯង ។
ប្រភពដដែលបន្តថា លុះដល់ម៉ោងកើតហេតុ រូបគាត់ជាប្រពន្ធមិនដឹងថា ប្តីរបស់គាត់ដុតខ្លួនឯងទេ តែគ្រានោះត្រូវបានអ្នកជិតខាងឃើញមានហ៊ុយផ្សែងទ្រលោមចេញពីបន្ទប់ជួល ក៏ផ្អើលឆោឡោនាំគ្នាជួយគាស់ទ្វារ និងយកបំពង់ពន្លត់អគ្គិភ័យ និងទឹកមកជួយបាញ់ពន្លត់ តែនៅពេលពន្លត់នោះ គឺមិនទាន់នោះទេ ដោយសារតែអណ្តាតភ្លើងបានឆាបឆេះរបស់របរប្រើប្រាស់នៅក្នុងផ្ទះ និងឆេះម៉ូតូហុងដាឌ្រីម១គ្រឿងអស់ទាំងស្រុងទៅហើយ ចំណែកបុរសជាប្តីវិញក៏ត្រូវភ្លើងឆេះឡើងរលួយរឡេះ បណ្តាលឱ្យរងរបួសធ្ងន់ធ្ងរដេកថ្ងូរនៅក្នុងបន្ទប់តែម្តង។
ក្រោយពេលកើតហេតុ ក៏មានសមត្ថកិច្ចមូលដ្ឋានបានចុះទៅកន្លែងកើតហេតុ រួចហើយក៏បានទាក់ទងហៅរថយន្តសង្គ្រោះអោយមកដឹកជនរងគ្រោះយកទៅមន្ទីរពេទ្យ តែមិនមានឃើញរថយន្តសង្គ្រោះមកនោះទេ រហូតដល់ជនរងគ្រោះដេកស្រែកថ្ងូរអស់រយៈពេលជិត១ម៉ោងក៏ដាច់ខ្យល់ស្លា.ប់តែម្តង ទើបឃើញរថយន្តសង្គ្រោះមកដល់២គ្រឿងរង់ចាំដឹកស.ពទៅវិញ ធ្វើអោយប្រជាពលរដ្ឋរស់នៅទីនោះលាន់មាត់គ្រប់ៗគ្នាថា នៅដែលជនរងគ្រោះត្រូវការរថយន្តសង្គ្រោះមិនឃើញមកទទួលនោះទេ តែនៅពេលនុស្សស្លា.ប់ហើយ បែរជាមានរថយន្តដឹកស.ពបំពាក់ស៊ីរ៉ែនបើកមកដល់២ទៅ៣គ្រឿង រង់ចាំទទួលដឹកស.ពទៅវិញ ។
បន្ទាប់ពីខាងសមត្ថកិច្ចជំនាញធ្វើកោសល្យវិច័យបច្ចេកទេសវិទ្យាសាស្ត្ររាជធានីភ្នំពេញ បានចុះទៅពិនិត្យស.ពរួច ក៏បានប្រគល់ស.ពអោយទៅក្រុមគ្រួសារសាច់ញាតិដឹកយកទៅធ្វើបុណ្យនៅស្រុកកំណើតតាមប្រពៃណី ៕
ចែករំលែកព័តមាននេះ