មានមនុស្សជាច្រើនបានសួរខ្លួនឯងថា ហេតុអ្វីត្រូវសន្សំប្រាក់ ? តើវានឹងផ្តល់ប្រយោជន៍អ្វីខ្លះមកឱ្យអ្នកវិញ ? ដំបូងយើងសូមចាប់ផ្តើមពីនិយមន័យការសន្សំប្រាក់ជាមុនសិន ។ ការសន្សំ គឺជាកូនសោសម្រាប់ភាពជោគជ័យផ្នែកហិរញ្ញវត្ថុរយៈពេលវែងរបស់អ្នក ។…
មានមនុស្សជាច្រើនបានសួរខ្លួនឯងថា ហេតុអ្វីត្រូវសន្សំប្រាក់ ? តើវានឹងផ្តល់ប្រយោជន៍អ្វីខ្លះមកឱ្យអ្នកវិញ ? ដំបូងយើងសូមចាប់ផ្តើមពីនិយមន័យការសន្សំប្រាក់ជាមុនសិន ។ ការសន្សំ គឺជាកូនសោសម្រាប់ភាពជោគជ័យផ្នែកហិរញ្ញវត្ថុរយៈពេលវែងរបស់អ្នក ។ ហើយចម្លើយនៃសំណួរដែលបានសួរថាត្រូវសន្សំប៉ុន្មាន ដើម្បីឱ្យសម ? វាគ្មានចម្លើយនោះទេ ព្រោះចម្លើយ គឺអាស្រ័យខ្លួនអ្នកម្នាក់ៗនឹង ដោយសារតែការកំណត់ប្រាក់សម្រាប់សន្សំនោះ មានតែអ្នកម្នាក់គត់ដែលដឹងថា ខ្លួនមានលទ្ធភាពប៉ុនណា ។ ប៉ុន្តែមិនមែនគ្មានចម្លើយនោះទេ ដោយអ្នកជំនាញផ្នែកហិរញ្ញវត្ថុបានណែនាំឱ្យអ្នកអាចគិតពិចារណាចំណុចខ្លះៗដែលអ្នកអាចរៀនតាមបាន ។ ខាងក្រោមនេះជាការពិភាក្សាមតិខុសៗគ្នាពីអ្នកជំនាញ និងអាចណែនាំអ្នកនូវចំណុចមួយចំនួន ក្នុងការសន្សំប្រាក់ប៉ុន្មានដើម្បីឱ្យសមស្រប ៖
ដូចគ្រប់គ្នាបានដឹងហើយថា មនុស្សគ្រប់គ្នាមានទស្សនៈខុសគ្នាៗ និងមានប្រាក់ចំណូលឬប្រាក់ខែមិនដូចគ្នានោះទេ ដូចនេះអ្នកជំនាញបានណែនាំអ្នកធ្វើយ៉ាងណាសន្សំឱ្យបាន ២០ ភាគរយ នៃប្រាក់ខែសរុបរបស់អ្នក (សូមបញ្ជាក់ថាប្រាក់នេះជាប្រាក់ដែលមិនអាចដកបានស្រេចតែចិត្តនោះទេ ហើយក៏មិនមែនសន្សំទើបបាន ១ ឆ្នាំក៏ដកចាយបាត់ទៅ) ។ អ្នកជំនាញម្នាក់ គឺលោកស្រី Chonce Maddox, founder of My Debt Epiphany បានផ្តល់សុភាសិតមួយថា ៖ «ប្រសិនជាអ្នកចាប់ផ្តើមសន្សំ ២០ ភាគរយនៃប្រាក់ខែ ឬប្រាក់ចំណូល ហើយអ្នកមានបញ្ហា ដូចនេះអ្នកព្យាយាមត្រឹមតែ ៤ ទៅ៥ ភាគរយ សិនក៏បាន បន្ទាប់មកអ្នកបង្កើនប្រាក់សន្សំនៅពេលអ្នកមានលទ្ធភាពគ្រប់គ្រាន់» ។
សម្រាប់លោក វ៉ាង វិញបានបន្ថែមថា ៖ «ខ្ញុំគិតថា សមាមាត្រ ឬការបែងចែកថវិកា ៥០-២០-៣០ គឺជាវិធានដ៏ល្អមួយ» ។ លោក វ៉ាង បន្តថា ខាងក្រោមនេះជាដំណើរការ ៥០-២០-៣០ ៖
– អ្នកត្រូវយក ៥០ ភាគរយ នៃប្រាក់ខែគោល ឬប្រាក់ចំណូលសរុបទាំងអស់ សម្រាប់ចំណាយទៅលើផ្ទះ (ផ្ទះជួល ឬក៏ថ្លៃទឹកថ្លៃភ្លើង) សម្ភារ និងរបស់របរចាំបាច់ក្នុងផ្ទះ និងមធ្យោបាយធ្វើដំណើរ អាហារ ។ល។
– អ្នកយក ២០ ភាគរយ នៃប្រាក់ខែដាក់សន្សំជារៀងរាល់ខែ (អ្នកត្រូវគិតថា មិនមានលុយនឹងទេ ធ្វើដូចនេះទើបសន្សំមានប្រសិទ្ធភាព) ។
– ចំណែក ៣០ ភាគរយ អ្នកអាចទុកសម្រាប់ របស់ដែលមិនចាំបាច់ ដូចជាការធ្វើដំណើរ បរិភោគក្រៅជាមួយគ្រួសារឬជាមួយមិត្ត ជាដើម ។
លោក វ៉ាង បន្ថែមថា ៖ «ប្រសិនបើអ្នកអាចប្រកាន់ខ្ជាប់នូវចំនុចគោលទាំងនោះបាន អ្នកនឹងទទួលបានលទ្ធផលគួរជាទីគាប់ចិត្ត ហើយមិនបាច់ខ្វល់ខ្វាយច្រើន» ។
ដោយឡែកសម្រាប់លោក Weliver បាននិយាយថា យុទ្ធសាស្ត្រ ៥០-២០-៣០ វាគ្រាន់តែជាចំណុចចាប់ផ្តើមសម្រាបអ្នកដំបូងៗប៉ុណ្ណោះ សម្រាប់លោកវិញលោកថា ដក ២៥ ភាគរយ ដើម្បីសន្សំទើបជាការល្អ ។ វានឹងមានប្រយោជន៍ប្រសិនជាអ្នក សន្សំលុយនឹងសម្រាប់ការចូលនិវត្តន៍ផងដែរ ។ ឆ្លើយតបនឹងចំណុចដែរ លោកស្រី Maddox បាននិយាយថា ការសន្សំប្រាក់ ពី ២០ ទៅ ២៥ ភាគរយ បច្ចុប្បន្ននេះ គឺមិនមានអារម្មណ៍ថា ល្អនោះទេ អ្នកគួរចាប់ផ្តើមត្រឹម ៤ ទៅ ៥ ភាគរយសិនទៅ ហើយចាំបន្តបង្កើនក៏មិនទាន់ហួសពេលដែរ ។
តោះ ! បន្ទាប់ពីបានអានការបកស្រាយខុសៗគ្នា ពីអ្នកជំនាញហើយ យើងមកមើលការបែងចែក សកម្មភាពថវិកាប្រចាំខែវិញម្តង ដោយប្រើរូបមន្តនេះ ៥០-២០-៣០ ៖ ឧទាហរណ៍ថា អ្នកមានចំណូលឬប្រាក់ខែ ៥,០០០ ដុល្លារក្នុងមួយខែ ដំបូងអ្នកត្រូវលះបង់ពាក់កណ្តាល នៃប្រាក់ចំណូលប្រចាំខែ របស់អ្នកឬ ២៥០០ ដុល្លារ ដើម្បីចំណាយចាំបាច់របស់អ្នក (ដូចបានរៀបរាប់ខាងលើ) ។ បន្ទាប់មកទៀត ២០% ស្មើ ១០០០ ដុល្លារត្រូវដាក់ចូលប្រាក់សន្សំរបស់អ្នកជារៀងរាល់ខែ ក្នុងចំណុចនេះដែរ លោក វ៉ាង បានផ្តល់ឧទាហរណ៍ឱ្យអ្នកត្រូវបែងចែកប្រាក់ ១.០០០ ដុល្លារ ឬ ២០ ភាគរយនឹង ទៅក្នុងបីចំណុច។ ទី ១ ដាក់ទៅក្នុងប្រាក់សន្សំ សម្រាប់គ្រាអាសន្ន (Emergency Fund) ទី ២ សន្សំដើម្បីគោលដៅអ្វីមួយ និងទី ៣ សន្សំសម្រាប់ចូលនិវត្តន៍ ។ ចុងក្រោយ ៣០% នៃប្រាក់ចំណូលរបស់អ្នក ស្មើ ១៥០០ ដុល្លារ នឹងត្រូវចំណាយ ទៅតាមការចាំបាច់ណាមួយ (ប្រសិនអ្នកមានកូនអាចទុកសម្រាប់បង់សាលា ។ល។) ។
លោក វ៉ាង បានបន្ថែមថា ៖ «វាពិបាកកំណត់ថាអ្នកត្រូវសន្សំប៉ុន្មានដើម្បីឱ្យត្រូវ ឬឱ្យសម ពីព្រោះស្ថានភាពជីវិតរបស់មនុស្សគ្រប់គ្នា គឺខុសៗគ្នា ។ អ្នកអាចសន្សំលើសនេះបាន ប្រសិនជាវាមិនបានប៉ះពាល់ដល់ជីវិតរស់នៅប្រចាំថ្ងៃ (តាមលទ្ធភាពអ្នក) ប៉ុន្តែអ្វីដែលខ្ញុំចង់ណែនាំ អ្នកត្រូវចំណាយពេលអង្គុយដើម្បីរៀបចំផែនការ ធ្វើដូចនេះអ្នកនឹងដើរក្នុងទិសដៅត្រូវ ហើយនោះជាអ្វីដែលសំខាន់បំផុត» ៕ ប្រភព ៖ Discover
ចែករំលែកព័តមាននេះ