ខេត្តបន្ទាយមានជ័យ ៖ ភ្ញៀវទេសចរថៃ បានចូលមកកម្ពុជា តាមច្រកទ្វារអន្តរជាតិប៉ោយប៉ែត ជាហូរហែ នៅព្រឹកថ្ងៃទី២៣ តុលា ដើម្បីទៅទស្សនាប្រាង្គប្រាសាទអង្គរវត្តកម្ពុជា នៅខេត្តសៀមរាប និងមួយចំនួនតូច ទៅតាមរមណីយដ្ឋានសំខាន់ៗតាមខេត្តនានា ។
ភ្ញៀវទេសចរថៃ បានធ្វើដំណើរដោយថ្មើរជើងចេញពីច្រកទ្វារអន្តរជាតិខ្លងលឹក ស្រុកអារញ្ញ ខេត្តស្រះកែវ មកឡើងជិះរថយន្តក្នុងកាស៊ីណូ ក្បែរច្រកទ្វារអន្តរជាតិប៉ោយប៉ែត ដែលនៅទីនោះមានរថយន្តខ្មែរប្រភេទ Bus ៤៥កៅអី រង់ចាំព្រោងព្រាត ។
ជួបសម្ភាសន៍ជាមួយបុរសចំណាស់ជនជាតិថៃម្នាក់ គាត់មិនប្រាប់អត្តសញ្ញាណទេ តែបានប្រាប់កោះសន្តិភាពថា គាត់និងក្រុមគ្រួសារចូលមកកម្ពុជា ដើម្បីទៅទស្សនាប្រាសាទអង្គរវត្ត នៅខេត្តសៀមរាបរយៈពេល៣ថ្ងៃ ទើបវិលត្រឡប់ទៅវិញ ដោយចេញតាមច្រកទ្វារអន្តរជាតិដដែលនេះ ។
បុរសដដែលបន្តថា នៅប្រទេសថៃ គឺជាថ្ងៃឈប់សម្រាកពីការងាររយៈពេល៣ថ្ងៃ នៅទូទាំងប្រទេស ព្រោះជាថ្ងៃបុណ្យថ្វាយបង្គំ រំឭកគុណដល់ព្រះមហាក្សត្ររជ្ជកាលទី៥ ។
តាមរបាយការណ៍របស់នគរបាលទេសចរណ៍ក្រសួង ដែលប្រចាំនៅមាត់ច្រកទ្វារអន្តរជាតិប៉ោយប៉ែត បានឲ្យដឹងថា ចំនួនភ្ញៀវចម្រុះជាតិសាសន៍ដែលចូលមកកម្ពុជាតាមច្រកទ្វារអន្តរជាតិប៉ោយប៉ែត សម្រាប់ថ្ងៃទី២៣ តុលា ភ្ញៀវកញ្ចប់សរុបមានចំនួន១.៨១៦នាក់ ដែលក្នុងចំណោមនេះ ៩០%ជាភ្ញៀវថៃទៅទស្សនាប្រាសាទអង្គរវត្តនៅខេត្តសៀមរាប ។
ទោះជាយ៉ាងណា ចំនួនភ្ញៀវទេសចរកញ្ចប់នេះ នគរបាលទេសចរណ៍ក្រសួងបញ្ជាក់ថា មិនទាន់គិតពីភ្ញៀវរាយនៅឡើយទេ ។ លោក ជង់ឡឹម ប្រធានមន្ទីរទេសចរណ៍ខេត្ត និងជាអនុប្រធានក្រុមការងារច្រកទ្វារ មិនអាចទាក់ទងសុំការបំភ្លឺបានទេ ដោយលោកប្រាប់តាមទូរស័ព្ទថា កំពុងរវល់ប្រជុំ នៅរាជធានីភ្នំពេញ ៕
ចែករំលែកព័តមាននេះ