រាជធានីភ្នំពេញ ៖ នៅទីបំផុត តារាសម្តែង និងកំប្លែង យ៉េយ៉េ ព្រមទាំងសាច់ញាតិរបស់នាងប្រមាណ៧នាក់ទៀត បានជាសះស្បើយពីជំងឺកូវីដ១៩ហើយនៅថ្ងៃនេះ បន្ទាប់ពីបានព្យាបាលមួយរយៈខ្លីមកនេះ។ ជាមួយនឹងក្តីសប្បាយរីរាយនេះ…
រាជធានីភ្នំពេញ ៖ នៅទីបំផុត តារាសម្តែង និងកំប្លែង យ៉េយ៉េ ព្រមទាំងសាច់ញាតិរបស់នាងប្រមាណ៧នាក់ទៀត បានជាសះស្បើយពីជំងឺកូវីដ១៩ហើយនៅថ្ងៃនេះ បន្ទាប់ពីបានព្យាបាលមួយរយៈខ្លីមកនេះ។
ជាមួយនឹងក្តីសប្បាយរីរាយនេះ តារាកំប្លែងមាឌយក្ស យ៉េយ៉េ បានបង្ហោះសារតាមគណនេយ្យហ្វេសប៊ុករបស់ខ្លួនថា អ្នកណាមិនត្រេកឣរ អ្នកណាមិនរំភើប បើបងប្អូនខ្ញុំ ក្មួយខ្ញុំ អ្នកផ្ទះខ្ញុំជាក្នុងថ្ងៃតែមួយចំនួន៧នាក់ ខ្ញុំពិតជាសប្បាយចិត្តរំភើបឡើងស្រក់ទឹកភ្នែក ពេលនេះពួកខ្ញុំបានត្រឡប់មកផ្ទះវិញហើយ តែយើងនៅបន្តធ្វើចត្តាឡីស័កចំនួន១៤ថ្ងៃ នឹងឣនុវត្ត «៣កុំ និង ៣ការពារ» ទាំងឣស់គ្នា។
ដោយឡែកបន្ថែមពីលើអ្វីដែល យ៉េយ៉េ បានសរសេរខាងលើនេះ នាងក៏បានអះអាងទាំងទឹកភ្នែកតាមរយៈវីដេអូឃ្លីបថា នាងពិតជាត្រេកអររកអ្វីប្រៀបផ្ទឹមពុំបាន នៅពេលដែលនាងបានយកឈ្នះនូវជំងឺដ៏កាចសាហា.វមួយនេះ។
នាងបញ្ជាក់ថា ដំបូងឡើយនាងហាក់អស់សង្ឃឹមនៅពេលដែលក្រុមគ្រូពេទ្យមកប្រកាសឈ្មោះអ្នកដែលជាប្រមាណជាង១០០នាក់ ដែលមិនមានឈ្មោះនាង។ នាងថា ក្នុងចំណោមអ្នកជាទាំងអស់នោះគឺមានសាច់ញាតិនាងទាំងអស់ ប៉ុន្តែមិនមានឈ្មោះនាងនៅក្នុងនោះទេ នោះជាហេតុធ្វើអោយនាងមានការព្រួយបារម្ភ និងអស់សង្ឃឹម។
យ៉ាងណា បើតាម យ៉េយ៉េ លុះនៅពេលគ្រូពេទ្យបានប្រកាសចំនួនអ្នកជាប្រមាណ៤០នាក់ទៀតនោះ ក៏មានឈ្មោះនាងនៅក្នុងនោះដែរ។
នាងបញ្ជាក់ថា នៅពេលដែលនាងបានលឺគ្រូពេទ្យប្រកាសឈ្មោះនាងនោះ គឺនាងបានលោតកញ្ជ្រោលហក់ឡើងស្រែកយ៉ាងខ្លាំង ដោយសារនាងត្រេកអរដែលបានជាពីជំងឺកូវីដ១៩នាពេលនេះ។
យ៉េយ៉េ បានលើកឡើងថា បើទោះបីជានាងបានជាពីជំងឺកូវីដ១៩នាពេលនេះ ប៉ុន្តែនាងត្រូវធ្វើចត្តាឡីស័ករយៈពេល១៤ថ្ងៃនៅផ្ទះជាបន្តទៀត ហើយនាងក៏សូមថ្លែងអំណរគុណដល់ប្រមុខរាជរដ្ឋាភិបាលកម្ពុជា និងក្រុមគ្រូពេទ្យស្ម័គ្រចិត្តជួរមុខដែលបានខិតខំព្យាបាលនាង ក្រុមគ្រួសារនាង និងប្រជាពលរដ្ឋទាំងអស់ដែលបានឆ្លងជំងកូវីដ១៩នេះ អោយបានជាសះស្បើយ៕
ចែករំលែកព័តមាននេះ