ខេត្តក្រចេះ ៖ អាជ្ញាធរខេត្តក្រចេះបានធ្វើសេចក្តីជូនដំណឹងអំពាវនាវឲ្យពលរដ្ឋននៅខេត្តក្រចេះ ត្រូវមានការប្រុងប្រយ័ត្នចំពោះស្ថានភាពការរស់នៅអនុវត្តឲ្យបានម៉ឺងម៉ាត់លើវិធានសុខាភិបាល ដើម្បីគេចពីជំងឺឆ្លងមេរោគកូវីដ១៩ ខណៈមាននារីម្នាក់នៅខេត្តនេះ ត្រូវបានរកឃើញមានផ្ទុកមេរោគកូវីដ១៩ ។
តាមសេចក្តីជូនដំណឹងរបស់រដ្ឋបាលសាលាខេត្តក្រចេះ កាលពីថ្ងៃទី៥ ឧសភា បានឲ្យដឹងថា នារីឈ្មោះ ប៉ូវ សុនីកា អាយុ២៣ឆ្នាំ មានទីលំនៅភូមិអូរត្រូន ឃុំក្បាលដំរី ស្រុកសំបូរ ខេត្តក្រចេះ ត្រូវបានរកឃើញមានផ្ទុកវីរុសកូវីដ១៩ ក្រោយពីយកសំណាកទៅវិភាគដោយវិទ្យាស្ថានបាស្ទ័រ។
អាជ្ញាធរខេត្តក្រចេះនិយាយថា នារីដែលមានផ្ទុកវីរ៉ុសកូវីដ១៩រូបនេះ ត្រូវបានអាជ្ញាធរនាំមកធ្វើចត្តាឡីស័ក្កនៅមន្ទីរពេទ្យខេត្ត តាំងពីថ្ងៃទី៣០ ខែមេសា មកម្ល៉េះ បន្ទាប់ពីរូបគាត់បានជួបផ្ទាល់ជាមួយនិងបុរសម្នាក់ឈ្មោះតាំង វេងម៉េង ដែលមានទីលំនៅស្រុលក្រូចឆ្មា ខេត្តត្បូងឃ្មុំ ដែលបុរសរូបនោះមានផ្ទុកវីរ៉ុសកូវីដ១៩ ។
ក្រោយការនាំយកពីមូលដ្ឋានរស់នៅមកធ្វើចត្តាឡីស័កបានរយៈពេល៥ថ្ងៃ និងបានយកសំណាកគាត់ទៅពិនិត្យវិភាគក៏បានរកឃើញថា នារីរូបនេះក៏មានផ្ទុកវីរុសកូវីដ១៩ ដោយសារឆ្លងពីបុរសឈ្មោះតាំង វេងម៉េង។ ទន្ទឹមនិងអ្វីដែលជាការព្រួយបារម្ភចំពោះការឆ្លងរីករាលដាលនៃមេរោគកូវីដ១៩នេះផងដែរ សាលាខេត្តក្រចេះបានចេញសេចក្តីអំពាវនាវជាបន្ទាន់មួយទៅកាន់ប្រជាពលរដ្ឋក្នុងខេត្តក្រចេះ ដែលបានជួបផ្ទាល់ឬប្រយោលជាមួយនារីឈ្មោះ បូវ សុនិកា ឱ្យធ្វើចត្តាឡីស័កនិងតាមដានសុខភាពរបស់ខ្លួន។
ក្នុងករណីលេចចេញរោគសញ្ញាក្តៅ ក្អក កណ្តាស់ ឈឺក ហៀរសំបោរ ហត់ ឬពិបាកដកដង្ហើម ប្រញាប់មកយកសំណាកនៅមន្ទីរពេទ្យបង្អែកខេត្ត ដើម្បីរកមេរោគកូវីដ១៩ ។ ព្រោះថា លោក វ៉ាន់ ណាក្រូ ដែលមានផ្ទុកវិជ្ជមានមេរោគកូវីដ១៩ ក្រៅពីបានចូលពិនិត្យជំងឺនៅមន្ទីរសម្រាកព្យាបាល និងសម្ភពព្រាបស ខណៈដែលភរិយារបស់លោកបានចូលក្នុងផ្សារក្រចេះផងដែរ។ ដោយ៖
ប៊ុន លីនណា
ចែករំលែកព័តមាននេះ