ប្រទេសនេប៉ាល់ ៖ អ្នកឡើងភ្នំ និងអាជ្ញាធរនៅឯជំរំមូលដ្ឋានភ្នំអេវឺរេស (Mount Everest) ក្នុងប្រទេសនេប៉ាល់បានប្រាប់សារព័ត៌មាន BBC ថា ការកើនឡើងនៃចំនួនអ្នកឡើងភ្នំមានរោគសញ្ញាកូវីដ១៩ និងការកើនឡើងការតេស្តវិជ្ជមានវីរុសនេះ កំពុងធ្វើបង្កការភ័.យខ្លាចនៃការផ្ទុះឡើងធ្ងន់ធ្ងរនាពេលខាងមុខ។
មន្ត្រីនៅជំរំមូលដ្ឋានអេវឺរេសបាននិយាយថា ពួកគេទទួលរបាយការណ៍នៃករណីវិជ្ជមានកូវីដចំនួន១៧នាក់ ដែលបញ្ជាក់ពីមន្ទីរពេទ្យឯកជនក្នុងរដ្ឋធានី Kathmandu។ ដែលអ្នកឡើងភ្នំជាច្រើនត្រូវបញ្ជូនចេញពីជំរំមូលដ្ឋាន ដើម្បីទទួលការព្យាបាល។
បុគ្គលិកនៅឯមន្ទីរពេទ្យឯកជន CIWEC ក្នុងរដ្ឋធានី Kathmandu បានបញ្ជាក់ប្រាប់ BBC ថា អ្នកជំងឺទាំងនោះបានធ្វើតេស្តវិជ្ជមាន បន្ទាប់ពីទៅដល់ជំរំមូលដ្ឋាន។
រហូតមកដល់ពេលនេះ ខាងរដ្ឋាភិបាលនេប៉ាល់បានបដិសេធមិនបានទទួលដំណឹងអំពីករណីវិជ្ជមាន នៅឯជំរំមូលដ្ឋានអេវឺរេសឡើយ។ ខណៈដែលការលើកឡើងបែបនេះ ត្រូវបានគេមើលឃើញថា មន្ត្រីកំពុងមើលស្រាលពីស្ថានភាពនេះ ដោយភ័យខ្លាចថាដំណឹងនេះ នឹងនាំមកនូវសម្ពាធបន្ថែម ដែលអាចឈានទៅរកការបិទភ្នំសារជាថ្មី។
ក្រុមអ្នកឡើងភ្នំបរទេសគឺជាប្រភពចំណូលដ៏សំខាន់សម្រាប់រដ្ឋាភិបាលនេប៉ាល់ ខណៈដែលចំណូលបានខាតបង់កាលពីឆ្នាំមុន។ បន្ទាប់ពីភ្នំខ្ពស់បំផុតលើពិភពលោកមួយនេះ ត្រូវបានបិទអំឡុងពេលមានការរាតត្បាតកូវីដ១៩។
ចំនួនករណីឆ្លងកូវីដ១៩ បានកើនឡើងយ៉ាងខ្លាំងនៅនេប៉ាល់ ក្នុងប៉ុន្មានសប្តាហ៍ថ្មីៗនេះ។ ហើយប្រទេសនេះ មានអត្រាឆ្លងខ្ពស់បំផុតក្នុងចំណោមបណ្តាប្រទេសផ្សេងទៀត ដែលនៅជិតខាងប្រទេសឥណ្ឌា។
សូមបញ្ជាក់ថា គិតចាប់តាំងពីការផ្ទុះកូវីដ១៩លើកដំបូង រហូតមកដល់ពេលនេះ ប្រទេសនេប៉ាល់មានករណីឆ្លងសរុបចំនួន ៣៥១,០០៥នាក់។ ខណៈដែលអ្នកស្លា.ប់សរុបមានចំនួន ៣,៤១៧នាក់៕
ចែករំលែកព័តមាននេះ