រាជធានីភ្នំពេញ ៖ ស្ថានទូតអាមេរិកប្រចាំនៅរាជធានីភ្នំពេញ សហការជាមួយនាយកដ្ឋានពាណិជ្ជកម្មក្រៅប្រទេសរបស់សហរដ្ឋអាមេរិក និងដោយមានការគាំទ្រពីសភាពាណិជ្ជកម្មអាមេរិក នៅកម្ពុជា បានរៀបចំពិព័រណ៍មួយនៅកម្ពុជា ស្តីពីសិទ្ធិធ្វើអាជីវកម្មយីហោអាមេរិក នៅថ្ងៃទី ៥…
រាជធានីភ្នំពេញ ៖ ស្ថានទូតអាមេរិកប្រចាំនៅរាជធានីភ្នំពេញ សហការជាមួយនាយកដ្ឋានពាណិជ្ជកម្មក្រៅប្រទេសរបស់សហរដ្ឋអាមេរិក និងដោយមានការគាំទ្រពីសភាពាណិជ្ជកម្មអាមេរិក នៅកម្ពុជា បានរៀបចំពិព័រណ៍មួយនៅកម្ពុជា ស្តីពីសិទ្ធិធ្វើអាជីវកម្មយីហោអាមេរិក នៅថ្ងៃទី ៥ ខែឧសភា ឆ្នាំ២០២១ នេះ ។
ពិព័រណ៍នេះ បានរៀបចំឡើងតាមប្រព័ន្ធអុីនធីណែត ដែលមានការចូលរួមពីក្រុមហ៊ុនអាមេរិកចំនួន ៩ ដែលមានឈ្មោះល្បី គឺក្រុមហ៊ុន The Boiling Crab, Chili’s, Dickey’s BBQ Pit, Duck Donuts, Long Jonh Silver’s Mathnasium, Snap Fitness, Tapout Fitness, និងក្រុមហ៊ុន Tumbles រួមជាមួយសហគ្រិន និងក្រុមហ៊ុនកម្ពុជាចំនួនជាង ៣០ ដើម្បីពិភាក្សាពីលទ្ធភាពនៃសហការគ្នាជាដៃគូ ។ លោកឯកអគ្គរដ្ឋទូតសហរដ្ឋអាមេរិក W.Patrick Murphy បានថ្លែងសុន្ទរកថា ក្នុងពិធីបើកពិព័រណ៍នេះ ។
ដោយត្រូវបានទទួលស្គាល់ និងកោតសរសើរចំពោះបទដ្ឋាន ការច្នៃប្រឌិត និងគុណភាពនៃផលិតផល និងសេវាកម្មខ្ពស់ ក្រុមហ៊ុនអាមេរិកច្រើនតែជាវិធីដំបូង ដែលប្រជាជនកម្ពុជាភ្ជាប់ការទាក់ទងជាមួយសហរដ្ឋអាមេរិក ។ ក្រុមហ៊ុនអាមេរិក និងយីហោល្បីៗរបស់អាមេរិកបានទទួលជោគជ័យ និងកំពុងរីកចម្រើននៅកម្ពុជា រាប់ពីក្រុមហ៊ុនរថយន្ត Ford និង Facebook ដល់កាហ្វេ Starbucks និង Papa John’s pizza ។
ប្រជាជនកម្ពុជាចង់បានផលិតផល និងសេវាកម្មប្រកបដោយគុណភាពបែបនេះ ហើយគេនៅតែចង់បានច្រើនថែមទៀត ។ ពិព័រណ៍នេះគ្រាន់តែជាព្រឹត្តិការណ៍មួយក្នុងចំណោម ព្រឹត្តិការណ៍ជាច្រើន ដែលរៀបចំដោយស្ថានទូតអាមេរិកក្នុងការណែនាំឱ្យគេស្គាល់ក្រុមហ៊ុនអាមេរិកដែលចង់មករកស៊ីនៅកម្ពុជា ។
លំហូរនៃការវិនិយោគ និងពាណិជ្ជកម្មទ្វេភាគីរវាងសហរដ្ឋអាមេរិក និងព្រះរាជាណាចក្រកម្ពុជា កំពុងតែមានកំណើន ហើយក្រុមហ៊ុនអាមេរិកច្រើនថែមទៀតបន្តមករកស៊ី ក្នុងមួយឆ្នាំៗ ដោយនាំមកជាមួយនូវរបៀបធ្វើជំនួញប្រកបដោយក្រមសីលធម៌ បទដ្ឋានបរិស្ថាន និងបទដ្ឋានការងារខ្ពស់ ព្រមទាំងកម្មវិធីទទួលខុសត្រូវខ្ពស់របស់ក្រុមហ៊ុន ចំពោះសង្គមដែលផ្សាភ្ជាប់ជាមួយនឹងសហគមន៍មូលដ្ឋាន ។ លោកឯកអគ្គរដ្ឋទូត Murphy បានមានប្រសាសន៍ថា ៖ «គេឃើញយីហោទាំងនេះជាច្រើន នៅអាស៊ីអាគ្នេយ៍ នាពេលសព្វថ្ងៃជាពិសេសនៅទីក្រុងបាងកក ប្រទេសសឹង្ហបុរី និងទីក្រុងហូជីមិញ ។ វាដល់ពេលដែលត្រូវឃើញក្រុមហ៊ុនទាំងនេះនៅភ្នំពេញផងដែរហើយ ។ ខ្ញុំមានទំនុកចិត្តថា ពិព័រណ៍នេះនឹងធ្វើឱ្យគេដឹងកាន់តែច្រើន ពីឱកាសធ្វើជំនួញដ៏ប្រពៃ ហើយបង្កើតទំនាក់ទំនង ដែលនឹងផ្តល់លទ្ធផលសម្រាប់ប្រទេសទាំងពីរ» ៕
ចែករំលែកព័តមាននេះ