ខេត្តក្រចេះ៖ បុរសម្នាក់ត្រូវនគរបាលស្រុកសំបូរចាប់ខ្លួន បន្ទាប់ពីបុរសរូបនេះបានយកកាំបិតផ្គាក់រង់ចាំកា.ប់សម្លា.ប់អ៊ំបង្កើតរបស់ខ្លួនដែលជាមេភូមិ ដោយចោទប្រកាន់ថា ព្យាយាមលាក់ឪពុកនិងស្រីរបស់ឪពុកនៅលើផ្ទះ ស្ថិតនៅភូមិសង្គម ឃុំសណ្តាន់ ស្រុកសំបូរ ខេត្តក្រចេះ។
អធិការរងទទួលយុត្តិធម៌នៃអធិការនគរបាលស្រុកសំបូរ លោកណយ ស៊ីថាច បានឲ្យដឹងថា នៅយប់រំលងអធ្រាត្រឈានចូលថ្ងៃទី០៤ ឧសភា បន្ទាប់ពីទទួលព័ត៌មានថា នៅចំណុចផ្ទះលោកមេភូមិខាងលើ មានករណីអំពើគំរាមគំហែងថានឹងសម្លា.ប់បង្កឡើងដោយជនសង្ស័យ ឈ្មោះឡាវ ឡែន ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិឃុំកើតហេតុ។
ក្រោយពីទទួលព័ត៌មាននេះភ្លាម កំលាំងជំនាញនគរបាលស្រុក សហការជាមួយកំលាំងនគរបាលប៉ុស្តិ៍រដ្ឋបាលសណ្តាន់ បានចុះមកដល់កន្លែងកើតហេតុ នៅផ្ទះលោកមេភូមិ បានឃើញ ឈ្មោះឡាវ ឡែន កំពុងកាន់កាំបិតផ្គាក់រងចាំនៅកាំជណ្តើរខាងក្រោយផ្ទះរបស់ឈ្មោះ នៅ ម៉ូនីន ភេទប្រុស អាយុ៦៩ឆ្នាំ ជាមេភូមិសង្គម ពេលនោះ ជនសង្ស័យមិនបានឲ្យសមត្ថកិច្ចចូលទៅជិតរូបគេនោះទេ និងបានស្រែកគំរាមទៅលើឈ្មោះ នៅ ម៉ូនីន ថា បើឯងហ៊ានបើកទ្ធារផ្ទះ ខ្លួនគេនឹងកាប់សម្លា.ប់ចោល រួមទាំងអ្នកនៅលើផ្ទះទាំងអស់នោះភ្លាម ពេលសមត្ថកិច្ចឃើញសកម្មភាពមិនស្រួល ក៏ប្រើកំលាំងហ៊ុមព័ទ្ធរង់ចាំដល់ពេលព្រឹកទើបដំណើរការអនុវត្តបន្ត។
លោកអធិការរងបញ្ជាក់ថា លុះព្រឹកឡើងវេលាម៉ោង៦ ទើបសមត្ថកិច្ចធ្វើការឃាត់ខ្លួនជនសង្ស័យ ឈ្មោះ ឡាវ ឡែន បានរួមទាំងវត្ថុតាងកាំបិតផ្គាក់ចំនួន០១ផងដែរ។ បច្ចុប្បន្ន កំលាំងនគរបាលកំពុងធ្វេីការសាកសួរជនសង្ស័នៅអធិការដ្ឋាននគរបាលស្រុកសំបូរ ដើម្បីកសាងសំនុំរឿងបញ្ចូនទៅការិយាល័យជំនាញព្រហ្មទណ្ឌខេត្តបន្តតាមនីតិវិធី ។ ដោយ៖ ប៊ុន លីនណា
ចែករំលែកព័តមាននេះ