លោកសាស្ត្រាចារ្យរីកាដូ រ៉ាម៉ាលយ៉ូ ផ្នែកធរណីវិទ្យា ពីមហាវិទ្យាល័យប្រ៊ីស្តុល ប្រទេសអង់គ្លេស សន្និដ្ឋានថា ដុំថ្មដ៏ធំមហិមា មានទម្ងន់ប្រហែល៧០០តោន ស្ថិតក្នុងប្រទេសស៊ីលី ដែលមានការជជែកវែកញែកជាយូរមកហើយនោះ បច្ចុប្បន្នអាចសន្និដ្ឋានបានថា វាជាថ្មមានអាយុកាល៣៧០.០០០ឆ្នាំ ស្របនឹងហេតុការណ៍រលកយក្សស៊ូណាមីនាពេលនោះ ។
លោករ៉ាម៉ាលយ៉ូ ប្រទះឃើញថ្មនោះ ខណៈពេលទៅទស្សនកិច្ចនៅក្រុងសានទីយ៉ាហ្គោ ប្រទេសស៊ីលី កាលពីឆ្នាំ២០០៧ ។ ក្រុមអ្នកស្រាវជ្រាវរបស់លោករ៉ាម៉ាលយ៉ូ ស្រាវជ្រាវឃើញក្នុងពេលបន្ទាប់ថា ជាថ្មមានប្រភពពីដែនសមុទ្រចំណាស់ ដោយមានលក្ខណៈខុសប្លែកពីថ្មទូទៅនៅបរិវេណជុំវិញដែលជាប្រភេទថ្មភ្នំមានអាយុនៅខ្ចី ។
បញ្ហាស្ថិតត្រង់ថា ថ្មដ៏ធំបែបនេះឡើងទៅទើរនៅទីខ្ពស់បានដោយរបៀបណា ? លោករ៉ាម៉ាលយ៉ូ សន្និដ្ឋានថា វាប្រាកដជាកើតឡើងដោយសាររលកស៊ូណាមី កាលពី៧៣.០០០ឆ្នាំមុនជាក់ជាមិនខាន ។ អំឡុងពេលនោះចង្កេះភ្នំនៃកោះហ្វូហ្គោ បាក់ចូលសមុទ្រ ព្រោះជាកោះកើតពីភ្នំភ្លើង និងជាផ្នែកមួយនៃកោះខេបវ៉ើដ (Cape Verde) ស្ថិតនៅក្នុងសមុទ្រភាគខាងលិចឆៀងខាងជើងទ្វីបអាហ្វ្រិក ។ ការបាក់ផ្នែកគែមនៃកោះនោះបង្កឱ្យកើតរលកយក្សស៊ូណាមី។ អ្នកជំនាញបានពិភាក្សាវែកញែកគ្នាអស់រយៈពេលយ៉ាងយូរថា តើស៊ូណាមីនោះមានទំហំប៉ុនណា ? វាអាស្រ័យលើការបាក់ដែលកើតឡើង ក្នុងពេលស្របគ្នា និងបាក់ស្រ៊ុបតែមួយលើក ។ ដំណាក់កាលដំបូងបង្កឱ្យកើតស៊ូណាមីទំហំមធ្យមមានកម្ពស់ប្រហែល១០ទៅ១៣ម៉ែត្រ ប៉ុន្តែកើតឡើងច្រើនលើក ធ្វើឱ្យមានកម្លាំងខ្លាំង ដោយឥទ្ធិពលរបស់វាអាចធ្វើឱ្យភ្នំទាំងមូលរំកិលបាន និងអាចបំផ្លិចបំផ្លាញ ភ្លាមៗ ។ ត្រង់ចំណុចនោះធ្វើឱ្យលោករ៉ាម៉ាលយ៉ូ សន្និដ្ឋានថា ថ្មដ៏មហិមា ទំហំ៧០០តោន ដែលប្រទះឃើញនៅស៊ីលី គឺជាតឹកតាងពី៧៣.០០០ឆ្នាំមុន ធ្លាប់កើតមានស៊ូណាមី ។
លោកសាស្ត្រាចារ្យរ៉ាម៉ុលយ៉ូ និងក្រុមស្រាវជ្រាវបានចំណាយពេលត្រួតពិនិត្យអាយុរបស់ដុំថ្មដ៏ធំនោះដោយប្រៀបធៀបទៅនឹងដុំថ្មនៅក្បែរគ្នា ឃើញថា ប្រភពដើមរបស់ថ្មយក្សជាផ្នែកមួយនៃផ្ទាំងថ្មដ៏ធំដែលលិចនៅបាតសមុទ្រ ។ កម្លាំងទំនាញនៃរលកទាញផ្តាច់ផ្ទាំងថ្មយក្សនោះពីផ្ទាំងថ្មធំរបស់វា ហើយរុញឡើងទៅទើរនៅទីខ្ពស់ជិត២៥០ម៉ែត្រ គឺគ្មានកម្លាំងទំនាញផ្សេងណាមួយ ក្រៅពីរលកយក្សស៊ូណាមីទេ ៕
ចែករំលែកព័តមាននេះ