ខេត្តប៉ៃលិន ៖ រហូតមកដល់ព្រឹកថ្ងៃទី០៣ ខែឧសភា ឆ្នាំ២០២១នេះ កសិករជាច្រើនរស់នៅក្នុងខេត្តប៉ៃលិន បានសម្រេចចិត្តផ្លាស់ប្តូរមកដាំដំណាំដំឡូងមី ច្រើនជាងការដាំដំណាំពោតក្រហម ដោយសារតែពួកគាត់យល់ឃើញថា ដំណាំពោតក្រហមនេះជាដំណាំដែលលំបាកក្នុងការថែទាំសំបូរទៅដោយសត្វល្អិតស៊ីបំផ្លាញ ថែមទាំងទទួលបានទិន្នផលទាបជាងដំណាំដំឡូងមីទៀតផង។
ប៉ុន្តែ ដោយសារដំណាំពោតឆាប់បានប្រមូលផល ត្រឹមតែរយ:ពេល៣ទៅ៤ខែក៏នៅមានកសិករមួយចំនួនដែលមានដីចម្ការច្រើន រំលែកមកដាំពោតខ្លះ និងទុកសម្រាប់ដាំដំឡូងមីមួយចំនួនងាយស្រួលក្នុងការប្រមូលផល ដើម្បីបានថវិកាសម្រាប់ផ្គត់ផ្គង់ជីវភាពប្រចាំថ្ងៃ ។
គេឃើញមានកសិករម្នាក់ឈ្មោះ សៀន សុភ័ក្ត្រ ភេទប្រុស អាយុ៦៣ឆ្នាំបានដាំដំឡូងមីចំនួន៤ហិកតា និងដាំពោតចំនួន២ហិកតា នៅលើដីចម្ការចំនួន៦ហិកតាក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា ៖ នៅឆ្នាំ២០២១នេះ គាត់ចាប់ផ្តើមដាំដំឡូងមីច្រើនជាងដាំដំណាំពោតក្រហម ដោយដាំអស់រយ:ពេលជាង១ខែមកហើយក៏ដុះលូតលាស់ល្អដូចគ្នា ។ គាត់បន្តទៀតថាតែរហូតមកដល់ពេលនេះដំណាំពោតក្រហមរបស់គាត់ កំពុងជួបឧបសគ្គច្រើនដូចជាលំបាកក្នុងការថែទាំ ហើយសត្វដង្កូវកំពុងតែចូលវាយលុកស៊ីបណ្តូលពោតខ្ចីកំពុងបាញ់ថ្នាំកំចាត់។
លើសពីនេះ ពេលមេឃរាំងភ្លៀងយូរពេកងាយស្រួល ក្នុងការងាប់ខូចខាត និងមានសត្វល្អិតផ្សេងៗស៊ីបំផ្លាញផងដែរ ហើយក៏ទទួលបានទិន្នផលទាបថែមទៀតផង ។ ចំណែកដំណាំដំឡូងមីវិញ ងាយស្រួលក្នុងការថែទាំឱ្យតែដាំត្រូវទឹកភ្លៀងរហូតដល់ដុះស្លឹកហើយ ទោះបីជារាំងភ្លៀងរយ:ពេលយូរបន្តិចក្តី ក៏មិនងាយងាប់ខូចខាតនោះដែរ លើកលែងតែពេលដំណាំនេះមានមើម លុះភ្លៀងខ្លាំងពេក បណ្តាលឱ្យជាំទឹក អាចរលួយមើមខូចខាតជាដើម ។
គាត់ក៏សំណូមពរ ឱ្យខាងមន្ទីរកសិកម្មខេត្តប៉ៃលិនចុះទៅពិនិត្យមើល និងប្រាប់ពីរបៀងប្រើថ្នាំក្នុងការកំចាត់សត្វដង្ហូវដែលកំពុងស៊ីបង្ខូចដំណាំពោតក្រហមចំនួន២ហិកតារបស់ខ្លួននៅក្នុងចម្ការខាងលើនេះផងដែរ ។
ចំណែកស្ត្រីម្នាក់ ឈ្មោះ នួន ណៃ អាយុ៥៦ឆ្នាំ បានរៀបរាប់ឱ្យដឹងថា ៖ កាលពីឆ្នាំ២០២០គាត់បានដាំដំណាំពោតក្រហមនៅលើដីចំការចំនួន៤ហិកតា លុះដំណាំពោតនេះ ដុះលូតលាស់យ៉ាងល្អ ស្រាប់តែក្រោយមក ត្រូវបានហ្វូងដង្កូវចូលវាយលុកស៊ីបង្ខូចខ្ទេចខ្ទីគ្មានសល់ ទោះបីជាខំប្រឹង ប្រើថ្នាំពុលកំចាត់យ៉ាងណា ក៏មិនឈ្នះនោះដែរ ទើបក្រោយមក នៅចុងរដូវគាត់បានដាំដំឡូងមីទាំង៤ហិកតា រហូតដល់ដំឡូងមីដុះលូតលាស់ល្អ មានមើមទៅហើយ ក៏ត្រូវភ្លៀងធ្លាក់ជោកជាំ បណ្តាលឱ្យស្អុយរលួយមើមអស់រលីង គ្មានសល់អ្វីនោះឡើយ ។
ដូច្នេះ នៅឆ្នាំ២០២១នេះ គាត់ក៏សម្រេចចិត្តជួលដីចម្ការរបស់ខ្លួនទាំងអស់ ទៅឱ្យអ្នកផ្សេងដាំដំឡូងមីជំនួសវិញ រីឯរូបគាត់សុខចិត្តដើរស៊ីឈ្នួលគេវិញម្តង ។ ចំណែកកសិករមួយចំនួនទៀតរស់នៅក្នុងខេត្តប៉ៃលិន បានលើកឡើងថា ៖ រហូតមកដល់ពេលនេះ ដំណាំដំឡូងមី មានទីផ្សារខ្ពស់ជាងមុន ហើយដំឡូងមី ក៏ជាដំណាំងាយស្រួលថែទាំជាងដំណាំពោតក្រហម ។ ដូច្នេះហើយ បានជាពួកគាត់ភាគច្រើន សុខចិត្តប្តូរមកដាំដំឡូងមី ដែលមានរយ:ពេល១ឆ្នាំ ទើបប្រមូលផល ជំនួសឱ្យការដាំពោតក្រហម ដែលអាចប្រមូលផលរយ:ពេលខ្លីវិញ ព្រោះទិន្នផលដំឡូងមី ក៏ទទួលបានខ្ពស់ជាងដំណាំពោតក្រហមដែរ ទោះបីជាជំងឺកូវីដ-១៩កំពុងវាយលុកក៏តម្លៃទីផ្សារដំឡូងមីនៅឆ្នាំ២០២១នេះ មិនធ្លាក់ចុះនោះឡើយ ៕
ចែករំលែកព័តមាននេះ