ខេត្តព្រះសីហនុ៖ គ្រោះថ្នាក់ចរាចរណ៍រវាងរថយន្តធុនធំពីរគ្រឿង បានបុក បណ្ដាលឱ្យរងការខូចខាតយ៉ាងធ្ងន់ធ្ងរ។ ហេតុការណ៍នេះ បានកើតឡើង នៅវេលាម៉ោង ៤:០០នាទី រសៀលថ្ងៃទី២៩ ខែមេសា ឆ្នាំ២០២១ នៅតាមបណ្តោយផ្លូវជាតិលេខ៤ ជិតផ្សារក្ដាមចាស់ ក្បែរកំពង់ផែស្វយ័តខេត្តព្រះសីហនុ ស្ថិតក្នុងសង្កាត់លេខ៣ ក្រុងព្រះសីហនុ ខេត្តព្រះសីហនុ។
ប្រភពព័ត៌មានពីប្រជាពលរដ្ឋ ដែលបានឃើញហេតុការណ៍ខាងលើ បានប្រាប់ភ្នាក់ងារសារព័ត៌មានកោះសន្តិភាព ថា មុនពេលកើតហេតុ រថយន្តកុងតឺន័រ ដែលក្បាលរថយន្តពណ៌បៃតង ពាក់ស្លាកលេខ ក្រ.ព្រះសីហនុ 3A-0321 កន្ទុយសណ្ដោង ពាក់ស្លាកលេខ ព្រះសីហនុ 4A-2803 បានបើកបរដោយបរុសម្នាក់ បានបើកបររថយន្តចេញពីផ្លូវលំឡើងផ្លូវជាតិ ខណៈពេលឡើងដល់លើផ្លូវជាតិទិសដៅពីត្បូងមកជើង ស្រាប់តែមានរថយន្តកុងតឺន័រមួយគ្រឿងទៀត ដែលក្បាលរថយន្តពណ៌ស ពាក់ស្លាកលេខ ភ្នំពេញ 3D-6045 កន្ទុយសណ្ដោង ពាក់ស្លាកលេខ ព្រះសីហនុ 4A-1574 បានបើកបរក្នុងទិសដៅស្របគ្នា ចុះចំណោតយាយម៉ៅ ដោយក្នុងល្បឿនលឿនពេក មកដល់កន្លែងកើតហេតុ ជាន់ហ្វ្រាំង មិនទាន់ បានបុកជាមួយនឹងកន្ទុយសណ្ដោងរបស់រថយន្តពណ៌បៃតង បណ្ដាលឲ្យកាប៊ីនរថយន្តខាងមុខ រងការខូចខាតយ៉ាងធ្ងន់ធ្ងរ។
ក្រោយពេលកើតហេតុ អ្នកបើកបររថយន្តបង្ក ដែលរងការខូចខាតនោះ បានរត់ចេញពីកន្លែងកើតហេតុ បាត់ស្រមោល។ ចំណែកឯខាងរថយន្តរងគ្រោះ ត្រូវបានសមត្ថកិច្ច អនុញ្ញាតឱ្យទៅធ្វើការធម្មតា។ រថយន្តបង្ក ត្រូវបានសមត្ថកិច្ច វាស់វែង និងលើកយកទៅរក្សាទុក នៅការិយាល័យចរាចរណ៍ផ្លូវគោក រង់ចាំម្ចាស់រថយន្តបង្ក ចូលខ្លួនបំភ្លឺ និងដោះស្រាយតាមនីតិវិធីផ្លូវច្បាប់៕
ចែករំលែកព័តមាននេះ