ពេលខ្លះមនុស្សចាយលុយយ៉ាងសន្ធឹកសន្ធាប់ក្នុងរយៈពេលដ៏ខ្លី ប៉ុន្តែអ្នកដឹងទេថា ប្រាក់ទាំងនោះមិនមែនអ្នកសន្សំរយៈខ្លីនោះទេ អ្នកសន្សំយូរណាស់ទើបទទួលបានប្រាក់ទាំងនោះ មានមនុស្សខ្លះសន្សំប្រាក់យូរឆ្នាំហើយ ប៉ុន្តែគ្រាន់តែបានចាប់អារម្មណ៍របស់អ្វីមួយភ្លាម កូនចិត្តនោះគិតថា ត្រូវតែទិញ ដូចនេះហើយវាបានធ្វើឱ្យប្រាក់សន្សំរបស់អ្នកចាយអស់យ៉ាងលឿនក្នុងរយៈពេលប៉ុន្មាននាទីប៉ុណ្ណោះ ។…
ពេលខ្លះមនុស្សចាយលុយយ៉ាងសន្ធឹកសន្ធាប់ក្នុងរយៈពេលដ៏ខ្លី ប៉ុន្តែអ្នកដឹងទេថា ប្រាក់ទាំងនោះមិនមែនអ្នកសន្សំរយៈខ្លីនោះទេ អ្នកសន្សំយូរណាស់ទើបទទួលបានប្រាក់ទាំងនោះ មានមនុស្សខ្លះសន្សំប្រាក់យូរឆ្នាំហើយ ប៉ុន្តែគ្រាន់តែបានចាប់អារម្មណ៍របស់អ្វីមួយភ្លាម កូនចិត្តនោះគិតថា ត្រូវតែទិញ ដូចនេះហើយវាបានធ្វើឱ្យប្រាក់សន្សំរបស់អ្នកចាយអស់យ៉ាងលឿនក្នុងរយៈពេលប៉ុន្មាននាទីប៉ុណ្ណោះ ។ មានពាក្យចាស់ពោលថា «បើអ្នកមិនចេះចាយលុយនោះអ្នក និងមិនចេះរកលុយនោះទេ» ប៉ុន្តែសម្រាប់អ្នកមានគតិបណ្ឌិត បានលើកឡើងដូចគ្នាថា អ្នកចំណាយតិច អ្នកសន្សំប្រាក់បានកាន់តែច្រើន (ទ្រឹស្តីអ្នកសន្សំប្រាក់) ។ តោះ! អុីចឹងមកស្តាប់ការបកស្រាយខ្លះៗ ដែលអាចជួយអ្នកសន្សំប្រាក់បានពីការចំណាយតិច ៖
ទី ១) ទិញរបស់ដែលមានបរិមាណធំៗ ៖
នៅពេលដែលអ្នកដើរផ្សារទិញរបស់របរប្រើប្រាស់ ឬគ្រឿងទេស អ្នកអាចសន្សំប្រាក់បានតាមរយៈការទិញរបស់ជាលក្ខណៈធំៗ ឬជាយួរៗ ព្រោះរបស់ដែលមានបរិមាណច្រើន ឬធំ វាមានតម្លៃថោកជារបស់របរដែលគេវេចខ្ចប់តូចៗ ឬវិធីមួយទៀតអ្នកទិញនៅកន្លែងដែលគេលក់បោះដុំក៏បាន (សូមជម្រាបផងដែរថា ក្នុងប្រទេសកម្ពុជា មានផ្សារទំនើបដែលលក់បោះដុំផងដែរ) ហើយអ្នកដឹងទេថា វិធីដែលផ្សារគេលក់របស់វេចខ្ចប់ធំៗ គឺលក់ដាច់ជាងរបស់ដែលវេចខ្ចប់តូចៗ ។ ហើយអ្នកដឹងទេថា នៅពេលដែលអ្នកទិញរបស់ដែលមានបរិមាណធំៗ វាប្រាកដណាស់ថា អ្នកនឹងអាចប្រើប្រាស់វាបានរយៈពេលរហូតមានរបស់របរខ្លះប្រើ ៣ខែមិនទាន់អស់ផង ។ ការសន្សំក្នុងការដើរផ្សារក៏ដូចគ្នា អ្នកត្រូវតែកត់នូវរបស់របរដែលអ្នកត្រូវការទិញឱ្យហើយពីផ្ទះ ហើយរបស់របរប្រើប្រាស់ដែល យើងអាចទិញជាប្រភេទមានបរិមាណធំៗ គឺមានដូចជា ក្រដាសបង្គន់អនាម័យ សាប៊ូកក់សក់ និងសាប៊ូលាងចាន សាប៊ូបោកខោអាវ គឺជាជម្រើសដ៏ល្អ រីឯអាហារវិញមានដូចជា បន្លែកំប៉ុង អាហារកំប៉ុងនានា និងប៉ាស្តា មី ។ល។ ដែលអ្នកគិតថា វាអាចរក្សាទុកក្នុងរយៈពេលយូរ ។ អ្នកក៏គួរតែដឹងដែរថា របស់របរស្រស់ៗ អ្នកមិនគួរទិញក្នុងបរិមាណច្រើននោះទេ ព្រោះកាលណាអ្នកវេចខ្ចប់មិនបានល្អ ឬញុំាមិនទាន់ វាអាចស្អុយរលួយ ដូចនេះអ្នកប្រាកដជាបោះចោលវា គឺដូចជាអ្នកបោះចោលលុយផងដែរ អញ្ចឹងចំណុចអ្នកទិញអាហារស្រស់មិនអាចទុកសម្រាប់ច្រើនខែ ដូចរបស់របរប្រើប្រាស់បាននោះទេ ។
ទី ២) ការវិនិយោគលើសុខភាពរបស់អ្នក ៖
សុខភាពរបស់អ្នកពិតជាសំខាន់ណាស់ ព្រោះប្រសិនបើអ្នកមិនមានសុខភាពល្អនោះទេ អ្នកប្រាកដជាមិនធ្វើការឬរកប្រាក់ចំណូលបាននោះដែរ ដូចនេះមានតែបរិភោគរបបអាហារត្រឹមត្រូវ និងការហាត់ប្រាណទេទើបអាចជាផ្នែកមួយជួយសុខភាពរបស់អ្នក ។ ត្រង់ចំណុចនេះ ដោយឃើញថា មានមនុស្សជាច្រើនបានចំណាយប្រាក់និងពេលវេលា ដើម្បីទិញបណ្ណសមាជិកក្លឹបហាត់ប្រាណ ឬបង់សេវាផ្សេងៗថ្លៃហាត់ប្រាណនេះ ទើបអ្នកជំនាញបានណែនាំអ្នកឱ្យកាត់បន្ថយ នូវការចូលជាសមាជិកក្លិបហាត់ប្រាណ ឬបង់សេវាផ្សេងៗ ដោយចាប់យកការតាំងចិត្តហាត់ប្រាណ និងសមាធិដោយខ្លួនឯងនៅផ្ទះវិញ ធ្វើដូចនេះអ្នកមិនចាំបាច់ចំណាយពេលវេលាដើម្បីជិះទៅកន្លែងហាត់ប្រាណ (ហើយអ្វីដែលរំខាននោះគឺពេលស្ទះចរាចរណ៍) មិនតែប៉ុណ្ណោះអ្នកអាចសន្សំប្រាក់បានពីការបង់សេវាទាំងអស់នោះផងដែរ ។ អ្នកជំនាញបានណែនាំថា មានវិធីសាស្ត្រជាច្រើនដែលអ្នកអាចហាត់ប្រាណនៅផ្ទះបាន ហើយការបង្ហាត់អ្នកឱ្យចេះហាត់ទៀតសោតក៏មានបង្រៀនតាមអីនធើណេតដែរ អ្នកអាចមើលតាមវីដេអូក្នុងយូធូបជាដើម ។
ទី ៣) ការគិតទៅលើការវិនិយោគនៃអនាគតរបស់អ្នក ៖
ការសន្សំប្រាក់សម្រាប់ការចូលនិវត្តន៍ វានឹងបង្រៀនអ្នកចេះសន្សំប្រាក់ និងទុកដាក់លុយបានយ៉ាងល្អ ហើយអ្វីដែលចាំបាច់នោះ អ្នកត្រូវតែគិតថា លុយទាំងនោះនឹងជារង្វាន់សម្រាប់អ្នកនៅពេលអ្នកចង់ឈប់ធ្វើការ ។ ហើយការសន្សំនៅក្នុងបរិបទបែបណាក៏ដោយ ក៏អាចជួយអ្នកនៅក្នុងពេលអនាគតបានដែរ សំខាន់អ្នកត្រូវទុកប្រាក់ទាំងនោះ នៅក្នុងគណនីយដែលមានកាលកំណត់ ឬគណនីសន្សំណាដែលមិនអាចដកបានផ្តេសផ្តាស់ ។ អ្នកគួរដឹងដែរថា ប្រភេទគណនេយ្យទាំងនោះ នឹងទទួលបានការប្រាក់ប៉ុន្មាន ក្នុងមួយខែ មួយឆ្នាំ ។ល។ ហើយអ្នកដឹងទេថា ប្រាក់របស់អ្នកសន្សំកាន់តែយូរ កាន់ច្រើនកើនការប្រាក់កាន់តែច្រើន ។ ដូចនេះអ្នកគិតមើលទៅ ប្រសិនជាអ្នកសន្សំក្នុង រយៈពេល ១០ ទៅ ១៥ ឆ្នាំ តើអ្នកនឹងសល់បានទាំងប្រាក់ដើម និងការប្រាក់ប៉ុន្មាន ទំរាំអ្នកចូលនិវត្តន៍ ។ ក្នុងចំណុចនេះដែរ អ្នកជំនាញណែនាំអ្នកឱ្យធ្វើយ៉ាងណាអាចសន្សំត្រឹម ៥០ ដុល្លារ ជារៀងរាល់ខែ ឬក្នុងមួយខែ ហើយរយៈពេល ១០ ទៅ ២០ ឬ ៣០ ឆ្នាំ (អាស្រ័យលើខ្លួនអ្នក) នោះបូកសរុបទាំងប្រាក់ដើមនិងការប្រាក់ប្រាកដជាបានច្រើន ប្រសិនជាអ្នកដាក់ក្នងធនាគារដែលឱ្យការប្រាក់ ៥ ឬ ៧ ភាគរយ (អាស្រ័យទៅលើធនាគារ) ។
ទី ៤) ការទិញត្រូវថ្លឹងថ្លែងលើតម្លៃ និងគុណភាពរបស់របរផ្សេងៗ ៖
មានពេលខ្លះរបស់ថោកមិនប្រាកដថាមានគុណភាព ហើយពេលខ្លះរបស់ថ្លៃមិនប្រាកដថាមានគុណភាពខ្ពស់នោះទេ ។ អ្នកត្រូវថ្លឹងថ្លែងថា របស់ណាខ្លះដែលអ្នកអាចប្រើត្រឹមតម្លៃថោកបាន និងរបស់ណាខ្លះអ្នកគួរប្រើប្រាស់ក្នុងតម្លៃថ្លៃបាន ប្រសិនជាវាអាចមានគុណភាពប្រើបានយូរឆ្នាំ ។ ត្រង់ចំណុចនេះ អ្នកជំនាញបានណែនាំថា ដូចជាធុងសំរាម អ្នកអាចប្រើត្រឹមតម្លៃល្មមបាន ខោអាវត្រឹមតម្លៃគួរសម និងស្បែកជើងជាដើម ។ ហើយរបស់ដែលអ្នកគួរគិតលើគុណភាពអាចប្រើប្រាស់បានយូរ បើទោះថ្លៃបន្តិចក៏មិនអីដែរ ដូចជា ឡាន មានស៊ីនបោកខោអាវ ទូរទស្សន៍ ទូរទឹកកក កង្ហារ ជាដើម សុទ្ធសឹងជាឧបករណ៍ដែលអ្នកគួរទិញ ដើម្បីប្រើប្រាស់បានយូរ (ព្រោះរបស់ទាំងនេះវាមិនចេះហួសសម័យកាលនោះទេ) ហើយប្រសិនជាអ្នកមានការថែរក្សាររបស់ទាំងនេះបានល្អ វាអាចប្រើប្រាស់មិនក្រោម ១០ ឆ្នាំនោះទេ ។ អ្នកគិតមើលទៅប្រសិនជា អ្នកទិញកង្ហារមួយតម្លៃ ១០០ ដុល្លារ អ្នកអាចប្រើប្រាស់ ១០ ឆ្នាំ ចឹងមានន័យថា មួយឆ្នាំ អ្នកចំណាយត្រឹមតែ ១០ ដុល្លារ ប៉ុណ្ណោះសម្រាប់វា (សូមជម្រាបថាសម្រាប់កង្ហារតម្លៃនេះ គឺក្នុងតម្លៃមានរបស់មានគុណភាពហើយ) ។
សរុបសេចក្តីមកការសន្សំប្រាក់អាចជាការលំបាកសម្រាប់អ្នកទើបចាប់ផ្តើម ប៉ុន្តែអ្នកត្រូវដឹងថាវានឹងផ្តល់ផលវិជ្ជមានឱ្យអ្នកច្រើននៅពេលអនាគត ហើយការសន្សំនេះមិនរើសអាយុនោះទេ អ្នកមានទំលាប់សន្សំតាំងពីវ័យក្មេង នោះមានន័យថាអ្នកមានពេលវេលាសន្សំប្រាក់បានកាន់តែច្រើន ។ ប្រសិនជាអ្នកមានទំលាប់ខ្ជះខ្ជាយ គួររៀនទំលាប់សន្សំវិញទៅ ពីព្រោះពេលខ្លះអ្នកគ្មានលុយ មិនអាចចេះតែរត់ទៅពឹងអ្នកដទៃនោះទេ ៕ ប្រភព ៖ Discover
ចែករំលែកព័តមាននេះ