ខេត្តព្រៃវែង ៖ នៅព្រឹកថ្ងៃទី២៨ មេសានេះ រដ្ឋបាលខេត្តព្រៃវែងបានចេញសេចក្ដីជូនដំណឹងមួយ ស្ដីពីការផ្អាកបណ្ដោះអាសន្ន នូវការធ្វើចរាចរណ៍ចេញ-ចូល ក្នុងភូមិសាស្ដ្រភូមិត្រពាំងធំ និងភូមិឆ្អឹងពស់ នៃឃុំពានរោង ស្រុកស្វាយអន្ទរ ក្រោយពីបានរកឃើញមានមនុស្សចំនួន៦នាក់ នៅក្នុងភូមិទាំង២នេះ បានឆ្លងជំងឺកូវីដ១៩ ។
រដ្ឋបាលខេត្តព្រៃវែង បានបញ្ជាក់ថា ការផ្អាកជាបណ្ដោះអាសន្ននេះនឹងត្រូវធ្វើឡើង ចាប់ពីម៉ោងសូន្យ ថ្ងៃទី២៩មេសា នេះតទៅ នៅលើគោលដៅចំនួន២រួមមាន ៖
គោលដៅទី១ ៖ សម្រាប់ភូមិត្រពាំងធំ បិទត្រង់ចំណុចផ្លូវបំបែកជាបួន ព្រំព្រទល់ភូមិកូនពោធិ៍ មុខផ្ទះលោក ប៉ូ ពេញ និងត្រង់ចំណុចក្លោងទ្វារវត្តរកា ភូមិត្រពាំងធំ ឃុំពានរោង ។
គោលដៅទី២ ៖ សម្រាប់ភូមិឆ្អឹងពស់ បិទត្រង់ចំណុចផ្លូវបំបែកជាបួន ព្រំប្រទល់ភូមិឆ្អឹងពស់ និងភូមិព្រៃនគរ ឃុំពានរោង។
នៅក្នុងលិខិតនោះដែរ ក៏បានអោយដឹងទៀតថា ភូមិទាំង២ខាងលើនេះ និងត្រូវបើកអោយដំណើរជាធម្មតាឡើងវិញ នៅពេលដែលស្ថានភាពនៃការរីករាលដាលជម្ងឺកូវីដ១៩ បានធូរស្រាលឡើងវិញ ហើយចំពោះមុខបច្ចុប្បន្ននេះ អាជ្ញាធរខេត្តស្នើសុំអោយបងប្អូនប្រជាពលរដ្ឋ ទាំងអស់ក្នុងភូមិទាំង២ មេត្តាកុំធ្វើចរាចរណ៌បំលាស់ទៅ និងចូលរួមអនុវត្តតាមសារាចរណ៌ណែនាំរបស់រាជរដ្ឋាភិបាល ៣កុំ ៣ការពារទាំងអស់គ្នា ដើម្បីបញ្ជៀសពីការឆ្លងរាលដាលនៃ ជម្ងឺកូវីដ១៩ នៅក្នុងមូលដ្ឋានរបស់យើង ៕
ចែករំលែកព័តមាននេះ