ខេត្តកណ្តាល ៖ រថយន្តកូរ៉េ១គ្រឿង ផ្ទុកសាំង៦ពាន់លីត្រ ត្រូវភ្លើងឆាបឆេះយ៉ាងសន្ធោសន្ធៅ នៅខណ:ពេលកំពុងបើកចូលទៅចែកចាយសាំងអោយម៉ូយនៅចំណុចភូមិលេខ២ ឃុំពាមរាំង ស្រុកលើកដែក ខេត្តកណ្ដាល កាលពីវេលាម៉ោងប្រមាណជា៩ព្រឹកថ្ងៃទី២៧…
ខេត្តកណ្តាល ៖ រថយន្តកូរ៉េ១គ្រឿង ផ្ទុកសាំង៦ពាន់លីត្រ ត្រូវភ្លើងឆាបឆេះយ៉ាងសន្ធោសន្ធៅ នៅខណ:ពេលកំពុងបើកចូលទៅចែកចាយសាំងអោយម៉ូយនៅចំណុចភូមិលេខ២ ឃុំពាមរាំង ស្រុកលើកដែក ខេត្តកណ្ដាល កាលពីវេលាម៉ោងប្រមាណជា៩ព្រឹកថ្ងៃទី២៧ មេសានេះ។
បើតាមប្រជាពលរដ្ឋនៅក្បែរកន្លែងកើតហេតុនោះបានឲ្យដឹងថា មុនពេលកើតហេតុ គេឃើញរថយន្តដឹកសាំងខាងលើ បើកក្នុងទិសដៅពីជើងទៅត្បូង លុះមកដល់ចំណុចកើតហេតុ បានចូលទៅឈប់នៅខាងមុខផ្ទះអ្នកស្រុក ក្នុងបំណងបូមសាំងលក់អោយម៉ូយ ប៉ុន្តែដោយនៅខាងមុខផ្ទះនោះគេមានដាក់ចង្ក្រានស្ងោរពោតលក់ផងនោះ ក៏ធ្វើឲ្យអណ្ដាតភ្លើងនៅក្នុងចង្ក្រានឆាបឆេះរថយន្តដឹកសាំងនោះតែម្ដង។
តាមប្រភពដដែលនេះបានបន្តទៀតថា ពេលភ្លើងឆាបឆេះរថយន្តភ្លាម ម្ចាស់រថយន្តក៏បានស្ទុះឡើងបើករថយន្តចេញមកភ្លាមហើយព្យាយាមស្រែកហៅអ្នកស្រុកឲ្យជួយបាញ់ទឹកពន្លត់ ហើយអ្នកស្រុកក្បែរនោះបានជួយបាញ់ទឹកអស់ជាច្រើនដែរ តែភ្លើងនៅតែមិនរលត់ ទើបម្ចាស់រថយន្តសម្រេចចិត្តបើករថយន្តចុះពីផ្លូវសំដៅចូលទៅចំការស្វាយអ្នកស្រុក និងទុករថយន្តចោល ហើយរត់យករួចខ្លួនតែម្ដងទៅ។
អ្វីដែលគួរឲ្យកត់សម្គាល់នោះ អ្នកស្រុកបានបញ្ជាក់ថា នៅពេលដែលមានហេតុការណ៍ខាងលើកើតឡើងភ្លាមៗ អ្នកស្រុកបានរាយការណ៍ប្រាប់សមត្ថកិច្ចភ្លាមៗផងដែរ ហើយខាងសមត្ថកិច្ចក៏ចុះមកដល់ភ្លាមៗដែរ ដោយបាននាំយកទាំងរថយន្តពន្លត់អគ្គីភ័យចំនួន 2 គ្រឿងមកជាមួយដែរ ប៉ុន្តែពេលមកដល់ សមត្ថកិច្ចមិនបានជួយបាញ់ទឹកពន្លត់នោះទេ ដោយចតរថយន្តពន្លត់អគ្គិភ័យនោះនៅលើផ្លូវ មិនដឹងថាមានមូលហេតុអ្វីនោះទេ។
ពាក់ព័ន្ធនឹងករណីខាងលើនេះ ខាងសមត្ថកិច្ចបានបញ្ជាក់ថា មូលហេតុដែលពួកគាត់មិនព្រមបាញ់ទឹកពន្លត់ ពីព្រោះរថយន្តដែលឆេះនោះ គឺជារថយន្តដឹកសាំង ដូច្នេះបើបាញ់ទឹកពន្លត់ទៅ ភ្លើងមិនរលត់នោះទេ តែនឹងធ្វើឱ្យឆេះកាន់តែខ្លាំងឡើង ដូច្នេះហើយទើបសមត្ថកិច្ចមិនបាញ់ទឹកពន្លត់ តែនៅរង់ចាំជួយអន្តរាគមន៍ក្នុងករណីបើភ្លើងឆាបឆេះរាលដាលដល់ចំការ ឬផ្ទះសម្បែងអ្នកស្រុក ៕
ចែករំលែកព័តមាននេះ