ចុះពិនិត្យទំនិញក្នុងផ្សាររកឃើញអាល់កុលក្លែងក្លាយ លុះសួរនាំបែកធ្លាយដល់ផ្ទះសំណាក់
- ព្រៃវែង
ខេត្តព្រៃវែង ៖ នៅរសៀលថ្ងៃទី២៦ ខែមេសា ឆ្នាំ២០២១ មន្ត្រីសាខា ក.ប.ប. ខេត្តព្រៃវែង បានសហការជាមួយមន្ទីរពាណិជ្ជកម្ម និងអាជ្ញាធរដែនដី…
ខេត្តព្រៃវែង ៖ នៅរសៀលថ្ងៃទី២៦ ខែមេសា ឆ្នាំ២០២១ មន្ត្រីសាខា ក.ប.ប. ខេត្តព្រៃវែង បានសហការជាមួយមន្ទីរពាណិជ្ជកម្ម និងអាជ្ញាធរដែនដី…
ខេត្តព្រៃវែង ៖ នៅរសៀលថ្ងៃទី២៦ ខែមេសា ឆ្នាំ២០២១ មន្ត្រីសាខា ក.ប.ប. ខេត្តព្រៃវែង បានសហការជាមួយមន្ទីរពាណិជ្ជកម្ម និងអាជ្ញាធរដែនដី បានចុះត្រួតពិនិត្យការដាក់តាំងលក់ អាល់កុល និងម៉ាស់ នៅតាមបណ្តាឱសថស្ថាន និងតូបអាជីវករ ក្នុងផ្សារព្រៃវែង ស្ថិតក្នុងភូមិលេខ៥ សង្កាត់កំពុងលាវ ក្រុងព្រៃវែង ខេត្តព្រៃវែង។
ប្រតិបត្តិការនេះ ធ្វើឡើងក្នុងគោលបំណងតាមដានតម្លៃទំនិញ និងពិនិត្យគុណភាពទំនិញចាំបាច់មួយចំនួន ដែលជាតំរូវការចាំបាច់របស់ប្រជាពលរដ្ឋ ក្នុងពេលដែលប្រជាជនកម្ពុជាទាំងអស់ កំពុងតែមានជីវភាពខ្វះខាត ជួបការលំបាកដោយសារការរីករាលដាលនៃជំងឺកូវីដ-១៩ (COVID-19) ជាពិសេសទំនិញអាល់កុល ជែលលាងដៃ និងម៉ាស់ ជាឱកាសធ្វើឲ្យមានម្ចាស់ឱសថស្ថាន ឬអាជីវករមួយចំនួន ដាក់លក់អាល់កុល ជែលលាងដៃក្លែងក្លាយ និងគ្មានប្រភពផលិតច្បាស់លាស់ ព្រមទាំងលក់តម្លៃខ្ពស់ កេងយកផលចំណេញហួសហេតុពេក ដោយមិនបានគិតពីផលប៉ះពាល់ដល់អ្នកប្រើប្រាស់។
លោក អ៊ុត សុភាព ប្រធានសាខា ក.ប.ប ខេត្តព្រៃវែង បានអោយដឹងថា ដំបូងមន្ត្រីជំនាញបានធ្វើតេស្តបឋមរកមើលសារធាតុគីមីហាមឃាត់ក្នុងចំណីអាហារទៅលើសរសៃរគុយទាវ និងបានធ្វើតេស្តបឋមទៅលើអាល់កុល រកមើលសារធាតុមេតាណុល និងដឺក្រេអាល់កុល នៅតាមតូបលក់ដូរក្នុងផ្សារព្រៃវែង ហើយបានរកឃើញ និងដកហូតបានទឹកអាល់កុលក្លែងក្លាយជាង១០០ដប។
លោក អ៊ុត សុភាព បានបន្តថា ក្រោយពេលរកឃើញ និងសាកសួរទៅ ក្រុមអាជីវករបានឆ្លើយថា ពួកគាត់បានទិញទឹកអាល់កុលទាំងនោះ ពីផ្ទះសំណាក់ «ណាវី» នៅមាត់ទន្លេ ទើបមន្ត្រីជំនាញបន្តចុះទៅពិនិត្យទីតាំងផ្ទះសំណាក់ «ណាវី» ទៀត ហើយពេលទៅដល់ក៏បានប្រទះឃើញម្ចាស់ផ្ទះ កំពុងប្រើរថយន្ត១គ្រឿងដឹកជញ្ជូនទឹកអាល់កុលចេញ ទើបមន្ត្រីជំនាញធ្វើការរារាំង តែក៏ត្រូវអ្នកបើកបររថយន្តនោះ បើករកបុកមន្ត្រីជំនាញ រួចបើកគេចចេញបាត់ស្រមោលទៅតែម្តង។
បន្ទាប់ពីនោះ មន្ត្រីជំនាញបានបន្តចូលពិនិត្យក្នុងផ្ទះសំណាក់ «ណាវី» ហើយក៏រកឃើញទឹកអាល់កុលក្លែងក្លាយចំនួន១២កានទៀត បន្ទាប់មកមន្ត្រីជំនាញក៏បានធ្វើកំណត់ហេតុ រួចដកហូតយកទឹកអាល់កុលទាំងនោះ យកមករក្សាទុកដើម្បីកំទេចចោល ។
ឆ្លៀតក្នុងឱកាសនោះដែរ មន្ទ្រីជំនាញបានសំណូមពរដល់អាជីវករ សូមមេត្តាកុំឆ្លៀតឱកាសលក់ផលិតផលម៉ាស់ អាល់កុល សម្រាប់លាងសំអាតដៃ កឹបកេងយកផលចំណេញហួសហេតុ និងសូមអំពាវនាវ ដល់ប្រជាពលរដ្ឋ កុំទិញផលិតផល អាល់កុលណា ដែលគ្មានស្លាកសញ្ញា និងប្រភពច្បាស់លាស់ ដើម្បីជៀសវាងការទិញផលិតផលក្លែងក្លាយ ឬគ្មានគុណភាព យកមកប្រើប្រាស់ ដែលនាំឱ្យប៉ះពាល់ដល់សុខភាព និងអាយុជីវិត៕
ចែករំលែកព័តមាននេះ