បិទភូមិត្នោតជាបណ្តោះអាសន្ន ក្រោយរកឃើញអ្នកឆ្លងជំងឺកូវីដ១៩ រហូតដល់៨នាក់ហើយ
- ព្រៃវែង
ខេត្តព្រៃវែង ៖ នៅថ្ងៃទី២៦ ខែមេសា ឆ្នាំ២០២១ អាជ្ញាធរស្រុកពារាំង ខេត្តព្រៃវែង បានប្រកាសបិទភូមិត្នោត ក្នុងឃុំរាប ជាបណ្តោះអាសន្ន…
ខេត្តព្រៃវែង ៖ នៅថ្ងៃទី២៦ ខែមេសា ឆ្នាំ២០២១ អាជ្ញាធរស្រុកពារាំង ខេត្តព្រៃវែង បានប្រកាសបិទភូមិត្នោត ក្នុងឃុំរាប ជាបណ្តោះអាសន្ន ដោយហាមមិនអោយមានការធ្វើចរាចរណ៍ឆ្លងកាត់នោះទេ ដោយសារតែនៅក្នុងភូមិនេះ មានអ្នកឆ្លងជំងឺកូវីដ១៩ រហូតដល់ទៅ៨នាក់ហើយ គិតមកដល់ត្រឹមព្រឹកថ្ងៃទី២៦ ខែមេសា ម្សិលមិញនេះ។
យោងតាមរបាយការណ៍របស់អាជ្ញាធរស្រុកពារាំង បានបង្ហាញថា នៅក្នុងភូមិត្នោតនេះ កាលពីថ្ងៃទី២១ មេសា គេបានរកឃើញស្ត្រីម្នាក់ឈ្មោះ ឌឿន ចន្ធា ដែលជាកម្មកររោងចក្រកាត់ដេរក្នុងតំបន់សេដ្ឋកិច្ចពិសេស 7NG បានឆ្លងជំងឺកូវីដ១៩ ហើយមន្ត្រីជំនាញ និងអាជ្ញាធរ ក៏បាននាំយកស្ត្រីរូបនោះទៅព្យាបាល និងប្រមូលអ្នកជាប់ពាក់ព័ន្ធសរុបចំនួន៩៣នាក់ យកទៅដាក់ធ្វើចត្តាឡីស័ក និងយកសំណាកទៅធ្វើតេស្តរកជំងឺកូវីដ១៩ផងដែរ ។
ប្រភពដដែលបន្តថា ជាលទ្ធផល មកដល់ល្ងាចថ្ងៃទី២៥ មេសា បានរកឃើញមានមនុស្សចំនួន៧នាក់ បានឆ្លងជំងឺកូវីដ១៩ ពីឈ្មោះ ឌឿន ចន្ធា នោះ ទើបអាជ្ញាធរស្រុកពារាំង សម្រេចបិទភូមិត្នោតជាបណ្តោះអាសន្ន រហូតទាល់តែមានស្ថានភាពប្រសើរឡើងវិញ។
ដោយឡែកនៅឯស្រុកស្វាយអន្ទរឯណោះវិញ នៅថ្ងៃទី២៦ មេសានេះដែរ ក៏បានរកឃើញមនុស្សចំនួន៦នាក់ បានឆ្លងជំងឺកូវីដ១៩នេះដែរ ដែលអ្នកទាំងអស់នេះសុទ្ធតែជាអ្នកមកពីរាជធានីភ្នំពេញ ដោយអ្នកខ្លះមកដល់កាលពីថ្ងៃទី១៣ មេសា និងខ្លះទៀតមកដល់ថ្ងៃទី១៥ មេសា ។ ហើយពេលមកដល់ភ្លាម ក៏ត្រូវបានអាជ្ញាធរស្រុក ប្រមូលយកមកដាក់ធ្វើចត្តាឡីស័ក និងយកសំណាកទៅពិនិត្យរកជំងឺកូវីដ១៩ភ្លាមៗ ប៉ុន្តែការពិនិត្យសំណាកលើកទី១ លទ្ធផលគឺឃើញអវិជ្ជមាន លុះមកដល់លើកទី២ ទើបលទ្ធផលឃើញថា វិជ្ជមានកូវីដ១៩ ហើយបច្ចុប្បន្នក៏ត្រូវបានក្រុមគ្រូពេទ្យនាំយកមកព្យាបាលនៅក្នុងមន្ទីរពេទ្យបង្អែក ស្រុកស្វាយអន្ទរហើយ៕
ចែករំលែកព័តមាននេះ