ខេត្តព្រះវិហារ ៖ ទិដ្ឋភាពអ៊ូរអនៅលើខ្នងភ្នំដងរែក ច្រកទ្វាអានសេះនៅព្រំដែនកម្ពុជា-ថៃក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ មានភ្ញៀវទេសចរជាតិបាននាំគ្នាធ្វើដំណើរពីទីជិតទីឆ្ងាយឡើងទៅកម្សាន្តនៅតំបន់នេះ ដើម្បីចូលទៅទស្សនាការផ្តោះប្តូរទំនិញរវាងប្រជាជនទាំង២ (កម្ពុជា-ថៃ) នៅក្នុងផ្សារខ្មែរ និងផ្សារថៃជាប់ព្រំដែន ។
មន្ត្រីប្រចាំការច្រកទ្វារអានសេះបានឱ្យដឹងកាលពីព្រឹកថ្ងៃទី១៣ តុលា ថា ក្នុងឱកាសបុណ្យភ្ជុំបិណ្ឌនេះ ភ្ញៀវទេសចរជាតិបានធ្វើដំណើរមកកាន់ច្រកទ្វារអានសេះជាហូរហែក្នុងមួយថ្ងៃពី១០០នាក់ ទៅ១៥០នាក់ ។ មន្ត្រីដដែលបន្តថា ភ្ញៀវទេសចរដែលមកកាន់តំបន់នេះ គោលបំណងដើម្បីទស្សនាការលក់ទំនិញរវាងប្រជាពលរដ្ឋទាំង២ភាគីខ្មែរ-ថៃ ជាពិសេសពួកគាត់បានចូលទៅក្នុងផ្សារថៃចម្ងាយពីច្រកទ្វារព្រំដែនប្រមាណជា២០០ម៉ែត្រ ដើម្បីទិញសម្ភារប្រើប្រាស់ ចំណីអាហារ និងបន្លែផ្លែឈើជាដើម ។
ចំណែកឯភ្ញៀវទេសចរថៃចូលមកទស្សនាផ្សារខ្មែរវិញ ពួកគេច្រើននាំគ្នាទិញវត្ថុអនុស្សាវរីយ៍ ជាគ្រឿងសង្ហារឹម សម្លៀកបំពាក់ ផ្សិតព្រៃ និងបន្លែព្រៃផ្សេងទៀត ដែលប្រជាពលរដ្ឋនាំទៅលក់នៅទីនោះ ។
សូមបញ្ជាក់ថា ច្រកទ្វារអានសេះខាងលើនេះ បើកឱ្យប្រជាពលរដ្ឋទាំង២ភាគី ធ្វើដំណើរការផ្តោះប្តូរទំនិញគ្នាចំនួន២ថ្ងៃប៉ុណ្ណោះ ក្នុង១សប្តាហ៍ ក្នុងនោះមានថ្ងៃអង្គារ និងថ្ងៃព្រហស្បត្តិ៍ ។ ហើយច្រកអានសេះនេះ រដ្ឋាភិបាលទាំង២ភាគី គ្រោងនឹងប្រែក្លាយច្រកនេះ ទៅជាច្រកទ្វាអន្តរជាតិនាពេលខាងមុខនេះផងដែរ ។
ចែករំលែកព័តមាននេះ