ភ្នំពេញ៖ គណៈបញ្ជាការឯកភាពខណ្ឌចំការមន បានដឹកនាំកម្លាំងចំរុះ ចុះល្បាត ក្នុងមូលដ្ឋាន ក្នុងភូមិសាស្ត្របិទខ្ទប់រាជធានីភ្នំពេញ ដែលបានហាមមិនឲ្យមានមនុស្សដើរចេញពីក្នុងផ្ទះ និងតាមតំបន់នានា ពិសេសនៅពេលយប់ បានឃាត់ខ្លួនបុរស ២នាក់ និងម៉ូតូ ២គ្រឿង ដែលល្មើសនឹងបំរាមគោចរយកទៅរក្សាទុកផងដែរ។ ប្រតិបត្តិការនេះ បានធ្វើឡើងវេលាម៉ោង ៧យប់ ថ្ងៃទី២០ ខែមេសា ឆ្នាំ២០២១ ក្នុងភូមិសាស្ត្រ ដែលត្រូវបិទខ្ទប់ ក្នុងខណ្ឌចំការមន។
កម្លាំងគណៈបញ្ជាការឯកភាពខណ្ឌចំការមន បានអោយដឹងថា ដោយសារតែមានសេចក្ដីសម្រេចរបស់រាជរដ្ឋាភិបាលកម្ពុជា ស្តីពី ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ដែលកំពុងឆ្លងធ្ងន់ធ្ងរ នៅទីក្រុងភ្នំពេញ គឺហាមឃាត់មិនអោយបងប្អូនប្រជាពលរដ្ឋ ចេញពីលំនៅឋាន ដោយមិនមានករណីចាំបាច់
ដូច្នេះហើយកម្លាំងសមត្ថកិច្ចអាជ្ញាធរខណ្ឌចំការមន បានបន្តចាប់ផ្ដើមប្រើវិធានការក្តៅតែម្តង ចំពោះអ្នកមិនគោរព តាមការណែនាំរបស់រាជរដ្ឋាភិបាល ក្នុងតំបន់បិទខ្ទប់។ នៅក្នុងយប់ថ្ងៃទី២០ ខែមេសា ឆ្នាំ២០២១ កម្លាំងសមត្ថកិច្ច បានដាក់គោលដៅបិទខ្ទប់ និងកម្លាំងសមត្ថកិច្ចមួយចំនួនទៀត បានចុះល្បាតក្នុងមូលដ្ឋាន ឃាត់ម៉ូតូ ២គ្រឿង និងមនុស្ស ២នាក់ ដែលល្មើសនឹងបំរាមគោចរ នាំយកទៅសាកសួរ នៅសាលាខណ្ឌចំការមនផងដែរ។
សមត្ថកិច្ចឃាត់ខ្លួនបាន មានឈ្មោះ ទី១ ឈាន ម៉េងទិត ភេទប្រុស អាយុ ៣៣ឆ្នាំ មុខរបរ ជាងឈើ ស្នាក់នៅផ្ទះលេខ ១៧១ ផ្លូវ៣៧១ សង្កាត់ច្បារអំពៅ២ ខណ្ឌច្បារអំពៅ មានស្រុកកំណើត ស្រុកក្រូចឆ្មារ ខេត្តកំពង់ចាម និងទី២ មានឈ្មោះ សេង ចិត្រា ភេទប្រុស អាយុ៣០ឆ្នាំ មុខរបរ លក់ដូរ ស្នាក់នៅផ្ទះលេខ ១៥៣ ផ្លូវ៤៣២ សង្កាត់ទួលទំពូង២ ខណ្ឌចំការមន។
ចំពោះអ្នកដែលល្មើសនឹងបំរាមគោចរទាំង ២ នាក់ ត្រូវសមត្ថកិច្ចដកហូតម៉ូតូ យកទៅរក្សាទុកនៅសាលាខណ្ឌចំការមន។ ចំណែកមនុស្សអោយទៅធ្វើចត្តាឡីស័ក ចំនួន ១៤ថ្ងៃ នៅផ្ទះរៀងៗខ្លួន៕
ចែករំលែកព័តមាននេះ