រាជធានីភ្នំពេញ ៖ ជំងឺកូវីដ១៩ បានធ្វើឱ្យវិស័យទេសចរណ៍ក្នុងពិភពលោកបានរងផលប៉ះពាល់យ៉ាងខ្លាំង ដែលធ្វើឱ្យប្រទេសដែលធ្លាប់ទទួលបានចំណូលពីវិស័យទេសចរណ៍សម្រាប់ទ្រទ្រង់កំណើនសេដ្ឋកិច្ច ក៏មានភាពរង្គោះរង្គើ និងធ្វើបាត់បង់ចំណូលយ៉ាងច្រើន ជាក់ស្ដែងនៅក្នុងវិស័យទេសចរណ៍អន្តរជាតិកម្ពុជា ក៏បានបាត់បង់ចំណូលប្រមាណជិត៤ពាន់លានដុល្លារអាមេរិកក្នុងឆ្នាំ ២០២០កន្លងទៅ ។
យោងតាមរបាយការណ៍របស់ក្រសួងទេសចរណ៍កម្ពុជាចេញផ្សាយកន្លងទៅ កាលពីឆ្នាំ២០១៩ កម្ពុជារកចំណូលពីវិស័យទេសចរណ៍អន្តរជាតិបានប្រមាណជិត៤,៩ពាន់លានដុល្លារអាមេរិក តែដល់ឆ្នាំ២០២០របាយការណ៍បានបង្ហាញថាចំណូលពីវិស័យទេសចរណ៍អន្តរជាតិមានតែប្រមាណ១.០២៣លានដុល្លាអាមេរិកប៉ុណ្ណោះ ពោលគឺធ្លាក់ចុះប្រមាណ៧៩,២ភាគរយឬប្រមាណ ៣,៨៧ពាន់លានដុល្លារអាមេរិក ។
យោងតាមរបាយការណ៍របស់ក្រសួងទេសចរណ៍ក៏បានឱ្យដឹងថាក្នុងឆ្នាំ ២០១៩ កម្ពុជាទទួលបានភ្ញៀវទេសចរអន្តរជាតិប្រមាន៦,៦លាននាក់ ហើយក្នុងឆ្នាំនោះដែរសកម្មភាពទេសចរណ៍ក្នុងស្រុកក៏មានដំណើរការល្អដែលធ្វើឱ្យប្រតិបត្តិករទេសចរទទួលបានសកម្មភាពអាជីវកម្មយ៉ាងល្អប្រសើរ និងបានបង្កើតការងារដល់ប្រជាពលរដ្ឋជាច្រើនម៉ឺននាក់ ។ ចូលដល់ឆ្នាំ២០២០ពោលគឺក្រោយមានការរាតត្បាតជំងឺកូវីដ១៩ជាលក្ខណៈសកល កម្ពុជាបានចាប់ផ្ដើមបាត់បង់ភ្ញៀវទេសចរចូលមកទស្សនាបន្តិចម្ដងៗ ដែលធ្វើឱ្យសកម្មភាពទេសចរណ៍បានធ្លាក់ចុះ ស្ទើរតែដល់កម្រិតសូន្យ ។
ក្នុងឆ្នាំ២០២០ សកម្មភាពអាកាសយានដ្ឋានអន្តរជាតិទាំងបីរបស់កម្ពុជា ដែលធ្លាប់តែមមាញឹកទទួលភ្ញៀវអន្តរជាតិរាប់លាននាក់ក្នុងមួយឆ្នាំៗ បែរជាស្ងាត់ជ្រងំ យន្តហោះដែលធ្លាប់តែហោះដឹកអ្នកដំណើរពីប្រទេសមួយទៅប្រទេសមួយទៀតក៏បានស្ងាត់ ហើយប្រែក្លាយជាដឹកទំនិញទៅវិញ និងមិនសូវមានសកម្មភាពដូចមុនឡើយ ។
លោកហូ វណ្ឌី ទីប្រឹក្សាទីភ្នាក់ងារសមាគមទេសចរណ៍កម្ពុជាបានឱ្យដឹងថា សម្រាប់វិស័យទេសចរណ៍ពីឆ្នាំ២០២១ និងឆ្នាំបន្តបន្ទាប់ទៀត បើសិនជាប្រទេសណាបានគិតគូរពីគោលនយោបាយមុនគេប្រទេសនោះ នឹងទទួលបានផលប្រយោជន៍មុនគេ ជាពិសេសគោលនយោបាយវ៉ាក់សាំង ។ លោកថា៖« ប្រទេសណាដែលអនុញ្ញាតឱ្យភ្ញៀវដែលចាក់វ៉ាក់សាំងរួចអាចចូលទស្សនាប្រទេសនោះ ប្រទេសគេនឹងទទួលបានភ្ញៀវមុនគេនិងមានភ្ញៀវកាន់តែច្រើនទៅកម្សាន្តបន្តបន្ទាប់ ។ កម្ពុជាក៏ដូចគ្នា បើសិនជារដ្ឋាភិបាលបានគិតគូរត្រង់ចំណុចនេះ កម្ពុជានឹងទទួលបានសកម្មភាពទេសចរណ៍ឡើងវិញមុនគេផងដែរ »។
លោក ធួន ស៊ីណានប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជាបានលើកឡើងថា ក្នុងឆ្នាំ២០២១នេះ វិស័យទេសចរណ៍នឹងនៅតែមិនទាន់អាចងើបឡើងវិញបាននោះទេ ខណៈមេរោគកូវីដ១៩នៅតែបន្តរាលដាលក្នុងលក្ខខណ្ឌទូទាំងពិភពលោក ជាពិសេសក្នុងប្រទេសគោលដៅទេសចររបស់យើងដូចជាប្រទេសអឺរ៉ុបអាមេរិកជាដើម ។ ចង់ឱ្យទេសចរណ៍ពិភពលោកងើបឡើងវិញលុះត្រាតែពិភពលោកកាត់បន្ថយការរាលនៃជំងឺនេះមកនៅទាបបំផុត ឬអាចបញ្ចប់វាបានទាំងស្រុង ៕
ចែករំលែកព័តមាននេះ