រាជធានីភ្នំពេញ ៖ ជនសង្ស័យ២នាក់ត្រូវបានកម្លាំងនគរបាលគោលដៅបិទខ្ទប់ឃាត់ខ្លួនបាន បន្ទាប់ពីជិះម៉ូតូមួយគ្រឿងធ្វើសកម្មភាពឆក់ទូរស័ព្ទដៃពីស្ត្រីជាកម្មករស៊ិនទ្រីម្នាក់បានសម្រេច ហើយព្យាយាមជិះគេចខ្លួន រួចទៅបុកបារ៉ាស់គោលដៅបិទខ្ទប់បណ្តាលអោយនគរបាលរបួសធ្ងន់ស្រាលចំនួន២នាក់។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១និង៤៥នាទីរសៀលថ្ងៃទី២១ ខែមេសា ឆ្នាំ២០២១ ស្ថិតត្រង់ចំណុចគោលដៅបិទខ្ទប់ក្បែរស្តុបវត្តនាគវន្ត តាមបណ្តោយមហាវិថី សហព័ន្ធរុស្សី ក្នុងសង្កាត់ផ្សាដេប៉ូទី៣ ខណ្ឌទួលគោក រាជធានីភ្នំពេញ។
ជនសង្ស័យទាំង២នាក់ខាងលើនោះពុំទាន់ស្គាល់អត្តសញ្ញាណឡើយ ត្រូវនគរបាលឃាត់ខ្លួនបញ្ជូនទៅកាន់អធិការដ្ឋាន ខណ្ឌទួលគោកភ្លាមៗ។
តាមប្រភពព័ត៌មានអោយដឹងថា មុនពេលកើតហេតុ មានជនសង្ស័យ២នាក់ ជិះម៉ូតូមួយគ្រឿង ម៉ាក wave ពណ៌ខ្មៅ ពាក់ស្លាក់លេខ ភ្នំពេញ 1G-5157 បានធ្វើសកម្មភាពទូរស័ព្ទដៃមួយគ្រឿង ពីស្ត្រីម្នាក់មិនស្គាល់ឈ្មោះនោះទេ ជាកម្មកររបស់ក្រុមហ៊ុនស៊ិនទ្រីដែលកំពុងនិយាយទូរស័ព្ទនៅពេលបំពេញការងារនៅក្រោមស្ពានអាកាស ៧ មករា ។
តាមប្រភពព័ត៌មានអោយដឹងបន្តថា បន្ទាប់ពីឆក់បានសម្រេចហើយ ជនសង្ស័យបានជិះម៉ូតូតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើតដើម្បីគេចខ្លួន លុះនៅពេលធ្វើដំណើរមកដល់គោលដៅបិទខ្ទប់ អនុវត្តបម្រាមគោចរ ត្រង់ចំណុចស្តុបវត្តនាគវ័ន្ត សមត្ថកិច្ចស្ទាក់ឃាត់ដែរ ប៉ុន្តែជនសង្ស័យព្យាយាមបើកបំបុកបារ៉ាស់នៅនឹងមុខសមត្ថកិច្ចយ៉ាងពេញទំហឹង បណ្តាលអោយកម្លាំងនគរបាល២នាក់ បានរងរបួសធ្ងន់ស្រាល ហើយជនសង្ស័យក៍បានដួលម៉ូតូ និងត្រូវឃាត់ខ្លួនបានទាំង២នាក់តែម្តង ។
ភ្លាមៗនោះ នគរបាលដែលរងរបួស ត្រូវបានបញ្ជូនទៅមន្ទីរពេទ្យ ។ ដោយឡែក ជនសង្ស័យទាំង២នាក់ត្រូវបានបញ្ជូនទៅប៉ុស្តិ៍នគរបាលរដ្ឋបាលផ្សាដេប៉ូទី៣ រួចបញ្ជូនទៅអធិការដ្ឋាននគរបាលខណ្ឌទួលគោក ដើម្បីចាត់ការតាមនីតិវិធីច្បាប់ ។ ចំណែកទូរស័ព្ទដែលដកហូតពីជនសង្ស័យ ត្រូវបានសមត្ថកិច្ចប្រគល់ទៅឱ្យម្ចាស់វិញ៕
ចែករំលែកព័តមាននេះ