ខេត្តកណ្តាល ៖ លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាលបានដាក់បទបញ្ជាម៉ឺងម៉ាត់បំផុតឱ្យសមត្ថកិច្ចប្រើធម៌ក្តៅដោយកុំខ្លាចពលរដ្ឋខឹង បើខ្លាចពលរដ្ឋខឹងដូចទុកអោយពួកគាត់ស្លាប់អ៊ីចឹង ។ បទបញ្ជាដ៏ម៉ឺងម៉ាត់របស់លោកអភិបាលខេត្តកណ្តាល នាពេលនេះ…
ខេត្តកណ្តាល ៖ លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាលបានដាក់បទបញ្ជាម៉ឺងម៉ាត់បំផុតឱ្យសមត្ថកិច្ចប្រើធម៌ក្តៅដោយកុំខ្លាចពលរដ្ឋខឹង បើខ្លាចពលរដ្ឋខឹងដូចទុកអោយពួកគាត់ស្លាប់អ៊ីចឹង ។ បទបញ្ជាដ៏ម៉ឺងម៉ាត់របស់លោកអភិបាលខេត្តកណ្តាល នាពេលនេះ ធ្វើឡើងនៅថ្ងៃទី២១ ខែមេសា ឆ្នាំ២០២១ នេះ ក្នុងកិច្ចប្រជុំបន្ទាន់មួយធ្វើឡើងនៅវេទិកាមាត់ទន្លេ ក្រុងតាខ្មៅ ។ នេះបើតាមបណ្តាញសង្គមរដ្ឋបាលខេត្តកណ្តាល ។
លោកអភិបាលខេត្តកណ្តាល បានបញ្ជារយ៉ាងម៉ឺងម៉ាត់ថា អាជ្ញាធរមូលដ្ឋាន រួមនឹងកងកម្លាំងប្រដាប់អាវុធទាំងអស់ ត្រូវអនុវត្តយកចិត្តទុកដាក់ជាទីបំផុត និងប្រើធម៌ក្តៅជាមួយពលរដ្ឋណាដែលបំពាន និងផ្គើននឹងវិធានការរដ្ឋបាល កុំខ្លាចពលរដ្ឋខឹង បើខ្លាចពលរដ្ឋខឹង ដូចទុកអោយពួកគាត់ស្លាប់អ៊ីចឹង ។
លោកអភិបាលខេត្តកណ្តាលបន្តទៀតថា លោកមើលឃើញជាក់ស្តែង នៅក្រុងតាខ្មៅយើងនៅតែមានការបើកអោយពលរដ្ឋជិះម៉ូតូ ដើរឆ្វេចឆ្វាច សប្បាយជាធម្មតា តាមដងផ្លូវ ដូចមិនខ្លាចជំងឺកូវីដ១៩ ទាល់តែសោះ ។ លោកសង្កត់ធ្ងន់ថា «បើនៅតែសកម្មភាពដដែលនោះអាជ្ញាធរនិងកងកម្លាំងប្រដាប់អាវុធមិនបាច់នៅធ្វើទៀតទេចុះចេញពីតំណែងទៅ»។
មិនតែប៉ុណ្ណោះ លោកអភិបាលខេត្តកណ្តាល បានអោយអាជ្ញាធរសង្កាត់ សហការជាមួយមេភូមិ មេឃុំ និងប្រជាការពារ ត្រូវយកចិត្តទុកដាក់អោយបានម៉ត់ចត់ជាទីបំផុត មិនអោយពលរដ្ឋខ្លូនចេញពីក្រៅផ្ទះឆ្លងកាត់ពីតំបន់មួយទៅតំបន់មួយនោះទេ ក្នុងស្ថានភាពដែលក្រុងតាខ្មៅ កំពុងមានការរីករាលដាលកាន់តែខ្លាំងឡើងៗដោយអាជ្ញាធរត្រូវតែកំណត់តំបន់ខ្លួនឯង អាចចាត់ទុកជាតំបន់ក្រហមដែរ ឬ ទេ បើសិនជានៅតែមានការឆ្លងនៅជំងឺ កូវីដ១៩ ។
បើតាមរបាយការណ៍ដែលលោកទទួលបាន គឺអ្នកឆ្លងគិតត្រឹមថ្ងៃទី២០ ខែមេសា ឆ្នាំ២០២១ វេលាម៉ោង២៤៖០០ រួមមាន ៖ ១- សង្កាត់តាខ្មៅ ចំនួន៥៥ នាក់ , ២- សង្កាត់កំពង់សំណាញ់ ចំនួន១៩ នាក់ , ៣- សង្កាត់ដើមមៀន ចំនួន១៧ នាក់ , ៤- សង្កាត់រការខ្ពស់ចំនួន១០នាក់ , ៥- សង្កាត់ស្វាយរលំ ចំនួន១៣ នាក់ , ៦- សង្កាត់សិត្បូ ចំនួន១០នាក់ , ៧- សង្កាត់ព្រែកហូរ ចំនួន៣ នាក់ , ៨- សង្កាត់កោះអន្លង់ចិន ចំនួន២នាក់ , ៩- សង្កាត់ព្រែកឬស្សីចំនួន៥នាក់ និង១០- សង្កាត់តាក្តុល ចំនួន២នាក់ ៕
ចែករំលែកព័តមាននេះ