ព្រះសម្មាសម្ពុទ្ធទ្រង់ត្រាស់សម្តែងឲ្យយើងចេះអប់រំកាយវាចាចិត្តដើម្បីរស់នៅក្នុងសង្គមគ្រួសារក្តី សង្គមជាតិក្តីបានទទួលនូវសិរីសួស្តី សុភមង្គលសុខចម្រើនយូរអង្វែង ។ នៅក្នុងដំណើរជីវិតប្រព្រឹត្តទៅមុខរាល់ថ្ងៃនេះ ព្រះអង្គទ្រង់សម្តែងឱ្យយើងចេះអប់រំចិត្តឱ្យបានល្អដោយវៀរចាកការកាប់សម្លាប់ លួចឆក់ប្លន់ កុំបង្កសភាពវឹកវរ ចលាចល គ្មានសណ្តាប់ធ្នាប់ក្នុងសង្គម…
ព្រះសម្មាសម្ពុទ្ធទ្រង់ត្រាស់សម្តែងឲ្យយើងចេះអប់រំកាយវាចាចិត្តដើម្បីរស់នៅក្នុងសង្គមគ្រួសារក្តី សង្គមជាតិក្តីបានទទួលនូវសិរីសួស្តី សុភមង្គលសុខចម្រើនយូរអង្វែង ។
នៅក្នុងដំណើរជីវិតប្រព្រឹត្តទៅមុខរាល់ថ្ងៃនេះ ព្រះអង្គទ្រង់សម្តែងឱ្យយើងចេះអប់រំចិត្តឱ្យបានល្អដោយវៀរចាកការកាប់សម្លាប់ លួចឆក់ប្លន់ កុំបង្កសភាពវឹកវរ ចលាចល គ្មានសណ្តាប់ធ្នាប់ក្នុងសង្គម និងត្រូវចេះស្តាប់បង្គាប់អ្នកដទៃដែលគេមាននាទីសំខាន់ក្នុងសង្គម នោះជីវិតអ្នកនឹងរស់នៅបានសុខសាន្តហើយ ។ ប៉ុន្តែមនុស្សពួកខ្លះមិនចង់បានសភាពដូច្នោះទេ ពួកគេតែប្រព្រឹត្តផ្ទុយពីវិន័យគ្រួសារក៏ដូចជាបំពានទៅនឹងបម្រាមផ្សេងៗនៃសង្គមជាតិ ដើម្បីសម្រេចនូវគោលបំណងរបស់ខ្លួន នេះហើយជាកំហុសឆ្គង ជាការប្រមាទ ដែលលោកហៅថា អំពើបាប ។
តើបាប មានន័យដូចម្តេច ? បាប មានន័យថា អំពើឃោរឃៅ បៀតបៀន រំលោភបំពាន បង្កវិនាសកម្មនាំឲ្យបាត់បង់ផលប្រយោជន៍ខ្លួនឯងនិងអ្នកដទៃ ។ អំពើបាបនេះកកើតឡើងតាំងតែពីកំហុសតិចតួចដូចជា ខ្ជិលមិនស្តាប់ដំបូន្មានឪពុកម្តាយ មិនស្តាប់បង្គាប់អ្នកដទៃ ដើរលេងប៉ោឡែ អាវ៉ាសែ រហូតបង្កទៅដល់ទោសធំហ៊ានប្រព្រឹត្តអំពើលួច ឆក់ប្លន់ និងរំលោភបំពានទៅនឹងបម្រាមសង្គមជាដើម នេះហើយជាអំពើបាប ។
អំពើទាំងនេះបានបំផ្លាញនូវប្រយោជន៍ខ្លួនឯងផង និងផលប្រយោជន៍អ្នកដទៃផង ព្រោះហេតុដូច្នោះគ្រប់គ្នាត្រូវរៀនលះបង់ វៀរចេញពីអំពើមិនល្អទាំងឡាយ ទម្លាក់ចោលនូវទម្លាប់អាក្រក់ទាំងពួង ដើម្បីសេចក្តីសុខទាំងអស់គ្នា ។
មូលហេតុដើមនៃបញ្ហា គឺឋិតនៅក្នុងចិត្តរបស់យើងជាធំ បើកាលណាចិត្តរបស់យើងបានស្ងប់រម្ងាប់ពីអំពើបាប និងអំពើប្រមាទផ្សេងៗហើយ សង្គមជាតិក៏ស្ងប់រម្ងាប់ មានសន្តិភាព ហើយយើងទាំងអស់គ្នាក៏រស់នៅដោយសុខសាន្តត្រជាក់ត្រជំដែរ ៕ សាន សារិន
ចែករំលែកព័តមាននេះ