ខេត្តកំពង់ឆ្នាំង ៖ បន្ទាប់ពីមានបុរសម្នាក់បានស្លាប់ដោយសារវិជ្ជមានកូវីដ19 និងបន្ទាប់ពីរដ្ឋបាលសាលាខេត្តកំពង់ឆ្នាំងចេញសេចក្តីប្រកាសបិទទីតាំងចំនួន ៤កន្លែង ស្រាប់តែតម្លៃទំនិញប្រភេទខ្លះបានឡើងថ្លៃ ហើយក៏មានមនុស្សយ៉ាងច្រើនសម្រុកទៅទិញ ទំនិញនៅផ្សារលើក្រុងកំពង់ឆ្នាំងគួរកត់សម្គាល់ ។
យ៉ាងនេះក្តី នៅព្រឹកថ្ងៃទី21 ខែមេសានេះ ទំនិញមួយចំនួនបានចុះថ្លៃឡើងវិញ បន្ទាប់ពីមានការអន្តរាគមន៍ពីសហមន្ទីរ ពាក់ព័ន្ធមួយចំនួន និងអាជ្ញាធរក្រុងកំពង់ឆ្នាំងផង ។
លោក យិន សាវ៉េន អភិបាលក្រុងកំពង់ឆ្នាំងបានបញ្ជាក់នៅព្រឹកថ្ងៃទី21 ខែមេសានេះថា ជាការពិតទំនិញបានឡើងថ្លៃ នៅថ្ងៃទី20 ខែមេសា ម្សិលម៉ិញនេះមែន ប៉ុន្តែមានតែទំនិញ ៣មុខប៉ុណ្ណោះដែលឡើងថ្លៃ ក្នុងនោះមានពងទា ត្រីខកំប៉ុង និងមី ។
ជាធម្មតា ពងទា10គ្រាប់ មានតម្លៃត្រឹម 4500 រៀល ប៉ុន្តែបានឡើងពី 6000 ទៅ 8000 រៀល ។ ចំណែកត្រីខ កំប៉ុងក៏ឡើងថ្លៃទ្វេមួយជាពីរដងផងដែរ ។ ដោយឡែកមីមួយកេស តម្លៃធម្មតា ត្រឹម 25 000 រៀល តែបានឡើងដល់ 40 000រៀល ។
លោក យិន សាវេន បានបញ្ជាក់ថា នៅព្រឹកថ្ងៃទី21 ខែមេសានេះ ក្រោយពីទទួលការណែនាំរបស់អាជ្ញាធរខេត្ត មន្ត្រីសាលាក្រុងកំពង់ឆ្នាំង សហការជាមួយមន្ទីរពាណិជ្ជកម្មខេត្ត និងមន្ទីរសេដ្ឋកិច្ចនិងហិរញ្ញវត្ថុខេត្ត បានចុះផ្សព្វផ្សាយ និងណែនាំដល់អាជីវករលក់ដូរទំនិញ មិនឱ្យឡើងថ្លៃនោះទេ ហើយក៏ឃើញថាមានការចុះថ្លៃវិញខ្លះដែរ ប៉ុន្តែមិនទាំងស្រុងពេកទេ ដោយកន្លែងខ្លះបានចុះថ្លៃ កន្លែងខ្លះលក់ថ្លៃដដែល ដោយអះអាងថា គាត់ទិញថ្លៃពីដើមទីមកហើយដូចជា ពងទា គាត់នៅតែលក់ក្នុងតម្លៃ 10 គ្រាប់ ថ្លៃ6000 រៀលដដែល ។
អភិបាលក្រុងកំពង់ឆ្នាំង បានបន្ថែមថា មិនមែននាំតែអាជីវករលក់ដូរក្នុងផ្សារលើទេនៅតាមគ្លីនិក និងកន្លែងលក់ថ្នាំ ជុំវិញផ្សារក៏បានណែនាំ កុំឲ្យឡើងថ្លៃថ្នាំពេទ្យផងដែរ ។ ដោយឡែកសម្រាប់អាជីវករក្នុងផ្សារលើវិញក៏បានបញ្ជាក់ថា នៅថ្ងៃម្សិលមិញ គឺមានការឡើងថ្លៃមែន ហើយថ្ងៃនេះក៏បានចុះថ្លៃវិញដែរ ប៉ុន្តែមិនទាន់ប្រក្រតីដូចដើមទេ នៅថ្លៃបន្តិចបន្តួច ។
អាជីវករខ្លះបានបញ្ជាក់ថា មូលហេតុតម្លៃទំនិញ ចុះថ្លៃវិញ ទី១ មានការណែនាំពីអាជ្ញាធរក្រុងទី2 គឺពុំមានមនុស្សចូលផ្សារច្រើនដូចសព្វដងឡើយ នៅថ្ងៃនេះ (21 មេសា) ហើយក្នុងផ្សារបានក្លាយជាសភាពស្ងាត់ជងុំម្លោះហើយទំនិញត្រូវតែចុះថ្លៃមកវិញជាធម្មតាមិនដូចម្សិលមិញមានមនុស្សសម្រុកទិញច្រើននោះទេ ។
គួរបញ្ជាក់ដែរថា រដ្ឋបាលសាលាខេត្តកំពង់ឆ្នាំងបានសម្រេចចេញសេចក្តីប្រកាសបិទទីតាំងចំនួន4 កន្លែង បន្ទាប់ពីមានបុរសម្នាក់ បានស្លាប់ដោយសារ covid-19 ក្នុងនោះមានទីតាំងវត្តភ្នំយោង .ទីតាំងគ្លីនិកព្យាបាលឯកជន នៅសង្កាត់ផ្សារឆ្នាំង.បរិវេណផ្សារព្រៃខ្មែរ នឹងភូមិព្រះរាមរង្សី ក្នុងឃុំជ្រៃបាក់ ស្រុករលាប្អៀរ ផងដែរ ៕
ចែករំលែកព័តមាននេះ