ខេត្តប៉ៃលិន ៖ បើតាមលោក លឹម វាសនា ប្រធានមន្ទីរទេសចរណ៍ខេត្តប៉ៃលិន បានឱ្យដឹងថា ខាងលោកបានចាត់ឱ្យមន្ត្រីជំនាញការិយាល័យឧស្សាហកម្មទេសចរណ៍ បន្តចុះផ្សព្វផ្សាយសេចក្តីណែនាំលេខ០១៣ សណន របស់រដ្ឋបាលខេត្តប៉ៃលិន ស្តីពីការផ្អាក ការលក់ដូរគ្រឿងស្រវឹងគ្រប់ប្រភេទបណ្តោះអាសន្ន ដើម្បីចូលរួមក្នុងការទប់ស្កាត់ការរីករាលដាលនៃជំងឺកូវីដ ១៩ ចូលក្នុងសហគមន៍ ។
លោក លឹម វាសនា ប្រធានមន្ទីរទេសចរណ៍ខេត្តប៉ៃលិន បានឲ្យដឹងថា ៖ ដើម្បីធានាបាននូវសុវត្ថិភាព និងចូលរួមទប់ស្កាត់ការឆ្លងរាលដាលនៃជំងឺកូវីដ ១៩ ក្រុមអធិការកិច្ចនៃមន្ទីរទេសចរណ៍ខេត្តប៉ៃលិន បានចុះត្រួតពិនិត្យជាប់ជាប្រចាំ ដើម្បីឃ្លាំមើលសកម្មភាពនៃការលក់ដូរម្ហូបអាហារ នៅតាមអាហារដ្ឋាននានាក្នុងខេត្ត បន្ទាប់ពីរដ្ឋបាលខេត្តប៉ៃលិនបានចេញសេចក្តីណែនាំ ស្តីពីវិធានការរដ្ឋបាលជាបណ្តោះអាសន្ន ដោយបិទរមណីយដ្ឋាន និងផ្អាកការលក់ដូរគ្រឿងស្រវឹងបណ្តោះអាសន្ន ដើម្បីចូលរួមបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ នៅតាមអាហារដ្ឋាន តូបលក់អាហារ ក្នុងមូលដ្ឋានទូទាំងខេត្តប៉ៃលិនតែម្តង ។
លោកប្រធានមន្ទីរ បានឱ្យដឹងទៀតថា ជាក់ស្តែងនៅរាត្រីថ្ងៃទី១៩ ខែមេសា ឆ្នាំ២០២១ តាមការវាយតម្លៃរបស់ក្រុមការងារ គឺការចុះពិនិត្យនេះ បានសង្កេតឃើញថា អាហារដ្ឋានភាគច្រើនបានបិទទ្វារផ្អាកដំណើរការជាបណ្តោះអាសន្ន ដោយឡែកនៅមានមួយចំនួនទៀតបន្តបើកលក់អាហារជាធម្មតា ប៉ុន្តែមិនមានលក់គ្រឿងស្រវឹងនោះទេ ហើយខាងមន្ត្រីនៃមន្ទីរលោកក៏បានធ្វើការណែនាំបន្ថែមផងដែរ ៕
ចែករំលែកព័តមាននេះ