ប្រទេសថៃ ៖ លោក ប្រាយុទ្ធ ចាន់អូចា នាយករដ្ឋមន្ត្រីថៃបាននិយាយកាលពីម្សិលមិញថា ប្រទេសថៃកំពុងធ្វើការចរចាបញ្ជាទិញវ៉ាក់សាំងកូវីដ១៩ របស់ក្រុមហ៊ុន Pfizer-BioNTech ចំនួនចាប់ពី ៥ ទៅ ១០ លានដូស។ ស្របពេលរដ្ឋាភិបាលព្យាយាមបង្កើនការផ្គត់ផ្គង់ ខណៈពេលកំពុងប្រយុទ្ធនឹងការរីករាលដាលលឿនបំផុតនៅក្នុងប្រទេស។ នេះបើតាមការចេញផ្សាយពីសារព័ត៌មាន CNA។
ប្រទេសថៃត្រូវបានទទួលស្គាល់ថាជាប្រទេសមានរលកឆ្លងលឿន ប៉ុន្តែមិនទាន់បានចាប់ផ្តើមការចាក់វ៉ាក់សាំងប្រឆាំងកូវីដ១៩ទ្រង់ទ្រាយធំនៅឡើយទេ។ ដោយមានប្រជាជនតិចជាង ៥៧២.០០០នាក់ទទួលបានការចាក់ដូសទីមួយ។
នាយករដ្ឋមន្ត្រី ប្រាយុទ្ធ ចាន់អូចា បានថ្លែងប្រាប់ក្រុមអ្នកសារព័ត៌មានថា «យើងកំពុងធ្វើការចរចារង់ចាំការដកស្រង់ និងល័ក្ខខ័ណ្ឌផ្សេងៗ។ ហើយតាមការរំពឹងទុកវ៉ាក់សាំងទាំងនោះ នឹងត្រូវផ្តល់ឱ្យនៅចន្លោះខែកក្កដា និងចុងឆ្នាំនេះ»។
រដ្ឋាភិបាលរបស់លោកបានរងការរិះគន់ ចំពោះការទទួលបានវ៉ាក់សាំងយឺតយ៉ាវ និងការពឹងផ្អែកខ្លាំងលើវ៉ាក់សាំងរបស់ក្រុមហ៊ុន AstraZeneca ដែលប្រទេសថៃរំពឹងថានឹងមានចាប់ពីខែមិថុនា។
ស្របពេលដែលអាជ្ញាធរកាលពីម្សិលមិញបានរាយការណ៍ពីករណីឆ្លងថ្មីចំនួន ១,៤៤៣ករណី និងករណីស្លា.ប់ថ្មីចំនួន ៤នាក់ដែលនាំឱ្យករណីឆ្លងសរុបកើនដល់ជាង ៤៥,០០០ករណី និងស្លា.ប់សរុបដល់ ១០៨នាក់៕
ចែករំលែកព័តមាននេះ