ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ភ្លៀងលាយឡំដោយខ្យល់កន្ត្រាក់យ៉ាងខ្លាំង បណ្តាលខួចយកផ្ទះ១ខ្នងផ្ងារជើងឡើងលើតែម្តង ប៉ុន្តែមិនបណ្តាលអោយមានអ្នកណាម្នាក់រងគ្រោះឡើយ បង្កឱ្យមានការភ្ញាក់ផ្អើលកាលពីវេលាម៉ោង៤និង២០នាទីល្ងាច ថ្ងៃទី២០ ខែមេសា ឆ្នាំ២០២១ ស្ថិតភូមិទានកាំត្បូង ឃុំទានកាំ ស្រុកព្រះនេត្រព្រះ។
បើតាមលោកវរសេនីយ៍ឯក មាស រិទ្ធី អធិការនគរបាលស្រុកព្រះនេត្រព្រះ បានប្រាប់ឱ្យដឹងថា ម្ចាស់ផ្ទះដែលត្រូវរងគ្រោះដោយខ្យល់កន្ត្រាក់បណ្តាលឱ្យខូចខាតផ្ទះនោះមានឈ្មោះ ប៉ោយ ព្រាល ភេទប្រុស អាយុ៤៣ឆ្នាំ រស់នៅភូមិ-ឃុំកើតហេតុខាងលើ។
លោកបានបញ្ជាក់ថា នៅមុនពេលកើតហេតុបំផ្លាញផ្ទះពលរដ្ឋនោះ គឺមានភ្លៀងលាយឡំដោយខ្យល់កន្ត្រាក់យ៉ាងខ្លាំង ហើយខ្យល់ក៏កួចយកផ្ទះ១ខ្នង ធ្វើឱ្យផ្ទះនោះផ្ងារជើងឡើងលើតែម្តង បណ្តាលខូចខាតស្ទើទាំងស្រុង ។ ហើយផ្ទះរងគ្រោះនោះធ្វើអំពីឈើប្រក់ស័ង្កសី ដែលមានទំហំ៥ម៉ែត្រx៤ម៉ែត្រ បណ្តាលខូចខាតស័ង្កសីអស់២៥សន្លឹក ប្រវែង៣ម៉ែត្រផងដែរ។
លោកវរសេនីយ៍ឯក មាស រិទ្ធី បានបញ្ជាក់ថា ខ្យល់កន្ត្រាក់បណ្តាលខូចខាតផ្ទះ១ខ្នងទាំងស្រុងនេះ មិនបណ្តាលរងគ្រោះដល់ម្ចាស់ផ្ទះឡើយ ៕
ចែករំលែកព័តមាននេះ