ខេត្តស្វាយរៀង ៖ នៅរសៀលថ្ងៃទី២០ ខែមេសា ឆ្នាំ២០២១នេះ តុលាការខេត្តស្វាយរៀង បានសម្រេចចេញដីកាឃុំខ្លួនបណ្តោះអាសន្នដាក់ពន្ធនាគារលើអ្នកកាសែតវ័យ៦៥ឆ្នាំម្នាក់ មូលហេតុគឺលួចដឹកមនុស្ស (ពលករខ្មែរ២នាក់មកពីប្រទេសកូរ៉េ) ចេញពីរាជធានីភ្នំពេញ ឆ្ពោះទៅខេត្តស្វាយរៀង ដែលជាការបំពានបំរាមរបស់រដ្ឋាភិបាល ក្នុងការបិទខ្ទប់ការធ្វើដំណើរឆ្លងពីរាជធានីភ្នំពេញទៅតាមបណ្តាខេត្តនានាទូទាំងប្រទេស ដើម្បីទប់ស្កាត់នៃការឆ្លងរាលដាលនៃជំងឺកូវីដ១៩។
លោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង បានប្រាប់អ្នកសារព័ត៌មានឱ្យដឹងថា ជននេះត្រូវចោទប្រកាន់តាមមាត្រា៦៣៣ នៃក្រមព្រហ្មទណ្ឌ រួចហើយបញ្ជូនទៅដាក់ពន្ធនាគារនៅថ្ងៃទី២០ ខែមេសា ឆ្នាំ២០២១ ជាបណ្តោះអាសន្នសិន ដើម្បីរង់ចាំប្រកាសសាលក្រមនៅថ្ងៃទី៥ ខែឧសភាខាងមុខនេះ។
ចំណែកមនុស្សពីរនាក់ទៀត ដែលរួមដំណើរនៅក្នុងរថយន្តក៏ត្រូវបានប្រគល់ទៅឱ្យខាងមន្ទីរសុខាភិបាលខេត្ត ដើម្បីយកទៅធ្វើចត្តាឡីស័ករយៈពេល១៤ថ្ងៃ និងពិន័យម្នាក់១លានរៀលផងដែរ។
គួររំលឹកថា កាលនៅថ្ងៃ១៨ ខែមេសា ឆ្នាំ២០២១ វេលាម៉ោង១២និង៣០នាទីរសៀល សមត្ថកិច្ចនគរបាលឈរជើងគោលដៅផ្សារក្រោលគោ ស្រុកស្វាយជ្រំ ខេត្តស្វាយរៀង បានធ្វើការឃាត់ខ្លួនបុរសម្នាក់សង្ស័យលួចនាំមនុស្សឆ្លងពីរាជធានីភ្នំពេញ ទៅគោលដៅខេត្តស្វាយរៀង ដែលល្មើសនឹងសេចក្តីសម្រេចរបស់រាជរដ្ឋាភិបាល ស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល។
ហើយនៅចំពោះមុខសមត្ថកិច្ច ជនសង្ស័យឈ្មោះ អ៊ុង សារឿន ភេទប្រុស អាយុ៦៥ឆ្នាំ មានទីលំនៅភូមិរោងដំរី ឃុំស្វាយចេក ស្រុករំដួល បម្រើការងារឱ្យកាសែត «ប្រទាប់យុវជន» បានសារភាពថា ខ្លួនជាអ្នកសារព័ត៌មាននៅស្រុករំដួល បានស្នើសុំសមត្ថកិច្ចប្រចាំការនៅចំណុចគោលដៅក្រោលគោ ស្រុកស្វាយជ្រុំ ព្រំប្រទល់ស្វាយរៀង-ព្រៃវែង ទៅបំពេញបេសកកម្មនៅភ្នំពេញ។ លុះពេលទៅដល់ភ្នំពេញ ក៏បានទៅលួចនាំយកពលករជនជាតិខ្មែរដែលទើបនឹងមកពីប្រទេសកូរ៉េ ចំនួន០២នាក់ (បានអនុវត្តចត្តាឡីស័ក១៤ថ្ងៃរួច) ក្នុងគោលបំណងមកស្រុកកំណើត ដោយយកថ្លៃចំនួន៣៥០ដុល្លារ តែពេលមកដល់ចំណុចគោលដៅក្រោលគោ ស្រុកស្វាយជ្រុំ ក៏ត្រូវសមត្ថកិច្ចពិនិត្យសួរនាំ និងធ្វើការឃាត់ខ្លួនតែម្តង៕
ចែករំលែកព័តមាននេះ