ភ្នំពេញ៖ សម្តេចតេជោ ហ៊ុន សែន បានប្រកាសតាមសារជាសំឡេងថា ការឧបត្ថម្ភថវិកាជំនួយ ៣០ម៉ឺនរៀល ក្នុង ១គ្រួសារ គឺអនុវត្តតែនៅក្នុងតំបន់បិទខ្ទប់ដោយដុំៗប៉ុណ្ណោះ មិនមែនអនុវត្តទូទៅ នៅរាជធានីភ្នំពេញ និងនៅទីក្រុងតាខ្មៅ ក្នុងខេត្តកណ្តាលនោះទេ។ ក្នុងនោះ សម្តេចតេជោ ហ៊ុន សែន ក៏បានប្រកាសពីការឈប់ផ្តល់ប្រាក់ជំនួយ ៣០ម៉ឺនរៀល ក្នុង១គ្រួសារនេះ តែបង្វែជាអំណោយ មានអង្ករ មី ត្រីខ ទឹកត្រី ទឹកស៊ីអ៊ីវ ជំនួសវិញ។ សម្តេចក៏បានណែនាំដល់អភិបាលរាជធានីខេត្ត ត្រូវគិតគូរពីចង្ហាន់សម្រាប់ព្រះសង្ឃ ក្នុងអំឡុងពេលបិទខ្ទប់នេះផងដែរ។
សម្តេចតេជោ ហ៊ុន សែន បាន បានប្រសាសន៍ថា រាជរដ្ឋាភិបាល មិនអាចបើកផ្តល់ប្រាក់ ៣០ម៉ឺនរៀល ក្នុង១គ្រួសារ ដល់អ្នករស់នៅភ្នំពេញ និងទីក្រុងតាខ្មៅ ដែលត្រូវបិទខ្ទប់ ចាប់ពីថ្ងៃទី១៥មេសា ដល់ថ្ងៃទី២៨មេសានោះទេ។ ប៉ុន្តែរាជរដ្ឋាភិបាល បង្វែរមកឲ្យជាអង្ករ មី ត្រីខ ទឹកត្រី ទឹកស៊ីអ៊ីវ។ ធ្វើយ៉ាងណា មិនឲ្យបងប្អូនដាច់បាយនោះទេ។
សម្តេចតេជោ ហ៊ុន សែន បានលើកឡើងថា នៅថ្ងៃទី២០មេសានេះ សម្តេចទទួលបានការតវ៉ា សួររកប្រាក់ ៣០ម៉ឺនរៀល ក្នុង ១គ្រួសារនោះ។ តែសម្តេចឆ្លើយតបថា ប្រាក់នេះ មិនមែនសម្រាប់អ្នកទូទៅ ដែលរស់ក្នុងតំបន់បិទខ្ទប់រាជធានីភ្នំពេញ និងទីក្រុងតាខ្មៅ ក្នុងខេត្តកណ្តាលទេ។ តែផ្តល់ឲ្យតែអ្នកដែលរស់នៅក្នុងតំបន់បិទខ្ទប់ដោយដុំៗ នៅរាជធានីភ្នំពេញប៉ុណ្ណោះ។ យើងបន្តចែកអង្ករ មី ត្រីខ ទឹកត្រី ទឹកស៊ីអ៊ីវ តែបើអ្នកណា មិនព្រមទទួល ដោយសារតែមិនបានប្រាក់ ៣០ម៉ឺនរៀល គឺមានតែអាជ្ញាធរយើង ចែកដល់តែអ្នកផ្សេង ដែលព្រមទទួល ព្រោះមិនមានថវិកា ៣០ម៉ឺនរៀល ដើម្បីបើកផ្តល់ឲ្យគ្រប់គ្នានោះទេ។
សម្តេចតេជោ ហ៊ុន សែន បន្តថា ឥឡូវនេះ មានរាប់សិបម៉ឺនគួ្រសារ ដែលទទួលបានអំណោយ ជាអង្ករ មី ត្រីខ ទឹកត្រី ទឹកស៊ីអ៊ីវ។ យើងបានចែកបានជាង ១ម៉ឺនគ្រួសារ។ ស្អែកប្រហែលជិត ១ម៉ឺនគ្រួសារ និងខានស្អែកជាង ២ម៉ឺនគ្រួសារ។ ដូច្នេះយើងបន្តចែកជូន គ្រាន់តែត្រឹមស្បៀងអាហារ ដើម្បីការរស់តែប៉ុណ្ណោះ។
សម្តេចតេជោ ហ៊ុន សែន បានប្រកាសសូមអង្វរក ចំពោះបងប្អូន ដែលថា បាត់បង់ប្រាក់ ៣០ម៉ឺនរៀល ហើយថ្លៃទឹក ថ្លៃភ្លើង ក៏មានការកែប្រែទៅតាមសេចក្តីសម្រេច ដែលក្រសួងហិរញ្ញវត្ថុ បានចេញផ្សាររួចហើយ។
សម្តេចតេជោ ហ៊ុន សែន បន្ថែមថា «បើម្នាក់ៗ គិតតែទាមទារ គឺយើងមានប្រាក់ តែមិនដឹងថា យន្តការចែករបៀបណា។ ប្រាក់ ៣០ម៉ឺនរៀល គឺអនុវត្តបានកន្លែងធ្វើចត្តាឡីស័ក ដោយដុំៗប៉ុណ្ណោះ មិនអាចធ្វើក្នុងតំបន់រាំងខ្ទប់ទាំងមូល នៅរាជធានីភ្នំពេញ និងក្រុងតាខ្មៅ ដែលត្រូវបិទខ្ទប់នោះទេ»។
សម្តេចតេជោ ហ៊ុន សែន ក៏បានណែនាំ សូមឲ្យឯកឧត្តម អភិបាលរាជធានីភ្នំពេញ និងឯកឧត្តមអភិបាលខេត្តកណ្តាល និងអភិបាលរាជធានីខេត្តគ្រប់ទីកន្លែងទាំងអស់ សូមយកចិត្តទុកដាក់ចំពោះព្រះសង្ឃ ព្រោះក្នុងពេលបិទខ្ទប់នេះ គ្មានប្រជាជនយើងណា ទៅធ្វើបុណ្យទេ។ ដូច្នេះសូមឲ្យអភិបាលរាជធានីខេត្ត យកចិត្តទុកដាក់ ពិសេសនៅភ្នំពេញ និងទីក្រុងតាខ្មៅ ទៅលើចង្ហាន់របស់ព្រះសង្ឃ នៅតាមវត្ត ដែលមិនអាចចេញបិទបាត្របាន ហើយក៏មិនមានពុទ្ធបរិស័ទ ទៅវត្តដែរ ក្នុងពេលបិទខ្ទប់នេះ។
សូមរម្លឹកថា កាលពីថ្ងៃទី១០ ខែមេសា ឆ្នាំ២០២១ សម្តេចតេជោ ហ៊ុន សែន បានប្រកាសដាក់ចេញវិធានការជួយដល់គ្រួសារ ដែលស្លាប់ ឆ្លង និងរងផលប៉ះពាល់ដោយកូវីដ១៩ ដោយមានការឧបត្ថម្ភ និងជួយចេញថ្លៃទឹក ថ្លៃភ្លើងជាដើម។ ក្នុងនោះ ចំពោះប្រជាពលរដ្ឋ ដែលស្លាប់ ឆ្លងកូវីដ និងប៉ះពាល់ដោយជំងឺកូវីដ១៩ ទទួលបានជំនួយពីរាជរដ្ឋាភិបាល ដូចជា៖
១-ចំពោះគ្រួសារ ដែលមានសមាជិកស្លាប់ដោយសារជំងឺកូវីដ១៩ រដ្ឋនឹងជួយបង់ជំនួសនូវការប្រើប្រាស់ទឹកស្អាត និងថ្លៃអគ្គិសនីអប្បបរមារយៈពេល ៥ខែបន្ថែម លើការអន្តរាគមន៍ជួយ ដែលដាក់ចេញកន្លងមក
២-ចំពោះផ្ទះណា ដែលសមាជិកដែលឆ្លងកូវីដ១៩ ប៉ុន្តែអត់មានមនុស្សស្លាប់ រដ្ឋនឹងជួយចេញថ្លៃទឹកថ្លៃភ្លើង អប្បបរមា រយៈពេល ៣ខែ ដោយរាប់ចាប់តាំងពីជននោះឆ្លងជំងឺកូវីដ១៩។
៣-គ្រួសារដែលធ្វើចត្តាឡីស័ក នៅតំបន់បិទខ្ទប់ រដ្ឋនឹងជួយ ៣០ម៉ឺនរៀល ក្នុង ១គ្រួសារ និងជួយបង់ទឹកភ្លើង ក្នុងកម្រិតសមរម្យមួយ រយៈពេល ២ខែ។
៤-អ្នកដែលប៉ះពាល់នៅតំបន់បិទខ្ទប់ រដ្ឋនឹងជួយ ៣០ម៉ឺន ក្នុង ១គ្រួសារ ហើយជួយបង់ថ្លៃទឹកភ្លើងចំនួន ២ខែ
៥-ផ្តល់អង្ករដល់គ្រួសារ ដែលប៉ះពាល់ នៅតំបន់បិទខ្ទប់នូវអង្ករ ២៥គីឡូ មីមួយកេសតូច ត្រីខ ២០កំប៉ុងផងដែរ។
យ៉ាងណាក៏ដោយ អ្នកនៅតំបន់បិទខ្ទប់ ដែលរាជធានីភ្នំពេញ បានអនុវត្តរយៈពេល ២សប្តាហ៍ ចាប់ពីម៉ោងសូន្យ ថ្ងៃទី១០ ខែមេសា រហូតដល់ថ្ងៃទី២៣ ខែមេសា ឆ្នាំ២០២១ រួមមាន៖
១-សង្កាត់ស្ទឹងមានជ័យទី១ សង្កាត់ស្ទឹងមានជ័យទី២ សង្កាត់ស្ទឹងមានជ័យទី៣
២-ភូមិទ្រុងមាន់ ក្នុងសង្កាត់អូរបែកក្អម ខណ្ឌសែនសុខ
៣-ភូមិត្រពាំងថ្លឹង២ និងភូមិទួលពង្រ នៃសង្កាត់ចោមចៅ១
៤-ភូមិចំការឪឡឹក១ ភូមិប៉ប្រកខាងត្បូង ភូមិប៉ប្រកខាងជើង និងភូមិត្រពាំងល្វា១ នៃសង្កាត់ការកាបទី១
៥-ភូមិចំការឪឡឹក២ នៃសង្កាត់កាកាបទី២ ក្នុងខណ្ឌពោធិ៍សែនជ័យ
ដោយឡែក នៅថ្ងៃទី១១ មេសា អាជ្ញាធររាជធានីភ្នំពេញ ក៏បានសម្រេចបិទខ្ទប់បន្ថែម ៣ភូមិ គឺភូមិទ្រា៤ ភូមិដំណាក់ធំ២ និងភូមិដំណាក់ធំ៣ នៃសង្កាត់ស្ទឹងមានជ័យ៣ ក្នុងខណ្ឌមានជ័យ។
ដូច្នេះតាមគោលការណ៍របស់សម្តេចតេជោ ហ៊ុន សែន ដែលបានប្រកាសចេញនៅថ្ងៃទី១០ ខែមេសា ឆ្នាំ២០២១ គឺប្រជាពលរដ្ឋ ដែលរស់នៅក្នុងភូមិ និងសង្កាត់ខាងលើ ដែលត្រូវបិទខ្ទប់ ត្រូវទទួលបានជំនួយជាថវិកា ៣០ម៉ឺនរៀល អង្ករ មី ត្រីខ ទឹកត្រី ទឹកស៊ីអ៊ីវ រួមទាំងថ្លៃទឹកភ្លើង ដែលសម្តេចបានដាក់ចេញកន្លងមក។
ប៉ុន្តែមកដល់ថ្ងៃទី២០ ខែមេសានេះទៅហើយ នៅមានប្រជាពលរដ្ឋមួយចំនួន ដែលរស់នៅក្នុងតំបន់បិទខ្ទប់ខាងលើនោះ មិនទាន់ទទួលអំណោយ និងទើបតែទទួលអំណោយនៅថ្ងៃទី២០មេសានេះ ហើយមិនទាំងទទួលបានលុយ ៣០ម៉ឺនរៀលនោះផង។ ដូច្នេះហើយ ទើបមានការសួរនាំរកលុយ ៣០ម៉ឺនរៀលនោះ។
ករណីនេះ អាចថ្នាក់ក្រោម អនុវត្តមិនស្មើភាពគ្នា ឬក៏អនុវត្តយឺតយ៉ាវ ក្នុងការនាំអំណោយទៅចែកជូនពួកគាត់ ទើបកើតជាការតវ៉ា បង្ហោះហ្វេស៊បុក ជាដើម។ ករណីនេះ គួរតែថ្នាក់រាជធានី ពិនិត្យឡើងវិញ ចំពោះការអនុវត្តរបស់មន្ត្រីមូលដ្ឋាន នៅថ្នាក់ភូមិ សង្កាត់ និងខណ្ឌ នៅតំបន់ដែលបិទខ្ទប់ខាងលើនេះ៕
ចែករំលែកព័តមាននេះ