ប្រទេសចិន ៖ លោក Xuefeng Yu ដែលជាសហស្ថាបនិក និងជានាយកប្រតិបត្តិក្រុមហ៊ុនផលិតឱសថចិន CanSino Biologics បាននិយាយកាលពីថ្ងៃអាទិត្យសប្តាហ៍មុនថា ក្រុមហ៊ុនលោកនឹងចាប់ផ្តើមសាកល្បងវ៉ាក់សាំងប្រឆាំងវីរុសកូវីដ១៩ថ្មី ជាប្រភេទថ្នាំបាញ់ចូលតាមច្រមុះ ដែលវានឹងផ្តល់ភាពងាយស្រួល និងមានប្រសិទ្ធិភាពជាងការចាក់តាមម្ជុល។
បច្ចុប្បន្នអត្រាប្រសិទ្ធភាពវ៉ាក់សាំងរបស់ចិនត្រូវបានគេរកឃើញថា មានកម្រិតទាបជាងវ៉ាក់សាំងដែលបានបង្កើតឡើងដោយក្រុមហ៊ុន Pfizer-BioNTech និង Moderna ។ ខណៈដែលកាលពីដើមខែមេសានេះ នាយកមជ្ឈមណ្ឌលចិនសម្រាប់ការគ្រប់គ្រងជំងឺឆ្លងក៏បានទទួលស្គាល់ជាសាធារណៈថា វ៉ាក់សាំងចិនមិនមានអត្រាការពារខ្ពស់នោះទេ។ ហើយពួកគេកំពុងពិចារណាផ្តល់ឱ្យប្រជាជននូវការចាក់វ៉ាក់សាំងតាមវិធីខុសៗគ្នា ដើម្បីបង្កើនប្រសិទ្ធភាពវ៉ាក់សាំងឱ្យកាន់តែខ្លាំងជាងមុន។
ក្រុមហ៊ុន CanSino Biologics កំពុងតែអភិវឌ្ឍរួមគ្នានូវវ៉ាក់សាំងប្រភេទបាញ់ស្រូបចូលតាមផ្លូវដង្ហើមជាមួយនឹងវិទ្យាស្ថានជាតិជីវបច្ចេកវិទ្យា។ បន្ថែមពីលើនេះ លោក Yu បានថ្លែងបញ្ជាក់ប្រាប់ទូរទស្សន៍ CNBC ថា វ៉ាក់សាំងដែលបាញ់ចូលតាមច្រមុះនេះ អាចមានប្រសិទ្ធភាពច្រើនជាងប្រភេទចាក់តាមម្ជុលធម្មតា។ ដោយសារតែវីរុសឆ្លងកូវីដ១៩ បានចូលទៅក្នុងខ្លួនមនុស្សតាមរយៈផ្លូវដង្ហើម៕ (ដកស្រង់ចេញពី CNBC)
ចែករំលែកព័តមាននេះ