ថៃ-សិង្ហបុរី ៖ ប្រទេសនៅក្នុងតំបន់អាស៊ានចំនួន ២ គឺប្រទេសថៃ និង សិង្ហបុរី កំពុងតែធ្វើការយ៉ាងមមាញឹកដើម្បីផលិតវ៉ាក់សាំងប្រឆាំងនឹងវីរុសកូវីដ១៩ ដើម្បីឆ្លើយតបទៅនឹងតំរូវការដ៏ចាំបាច់បំផុតនាពេលបច្ចុប្បន្ន។
ក្រុមហ៊ុន Siam Bioscience Co. ជាក្រុមហ៊ុនជីវបច្ចេកវិទ្យាថៃ ដែលបានចុះកិច្ចសន្យាផលិតវ៉ាក់សាំងកូវីដ១៩ជាមួយក្រុមហ៊ុន AstraZeneca បាននិយាយថា ខ្លួនមានទំនុកចិត្តនឹងអាចផ្តល់វ៉ាក់សាំងបានទាន់ពេលវេលា នៅពេលពួកគេឆ្លងកាត់ការត្រួតពិនិត្យសុវត្ថិភាពរួចរាល់។
បច្ចុប្បន្នក្រុមហ៊ុនកំពុងដំណើរការបញ្ជូនវ៉ាក់សាំងខ្លួនបានផលិតទៅកាន់មន្ទីរពិសោធន៍ជាច្រើននៅអឺរ៉ុប និងសហរដ្ឋអាមេរិកដើម្បីត្រួតពិនិត្យគុណភាព។ ហើយក្រុមហ៊ុនបាននិយាយថា នៅពេលគំរូត្រូវបានអនុម័តដោយមន្ទីរពិសោធន៍ ពួកគេនឹងត្រូវបញ្ជូនទៅកាន់ក្រុមហ៊ុន AstraZeneca។ ហើយបន្ទាប់មកនឹងចុះបញ្ជីវ៉ាក់សាំងជាមួយរដ្ឋបាលចំណីអាហារ និងឱសថរបស់ប្រទេសថៃ ដូច្នេះវ៉ាក់សាំងអាចត្រូវផលិតទ្រង់ទ្រាយធំ និងប្រើប្រាស់ក្នុងស្រុក។
អ្នកនាំពាក្យរដ្ឋាភិបាលលោក Traisuree Taisaranakul បាននិយាយថា វ៉ាក់សាំង AstraZeneca ចន្លោះពី ៦-១០ លានដូសនឹងត្រូវបានត្រៀមរួចរាល់សម្រាប់ប្រើប្រាស់នៅខែមិថុនា។
ដោយឡែកក្រឡែកមកមើលប្រទេសសិង្ហបុរីវិញ ក៏កំពុងធ្វើការយ៉ាងសស្រាក់សស្រាំដើម្បីផលិតវ៉ាក់សាំងផ្ទាល់ខ្លួនដែលមានឈ្មោះថា Lunar-Cov19។ ដែលសហការរួមគ្នាជាមួយក្រុមហ៊ុនអាមេរិក Arcturus និងសាលាវេជ្ជសាស្ត្រ Duke-NUS របស់សិង្ហបុរីដោយប្រើប្រាស់បច្ចេកវិទ្យា mRNA។
សក្តានុពលរបស់ប្រទេសសិង្ហបុរី គឺការផលិតវ៉ាក់សាំងនេះ សម្រាប់ការចាក់តែមួយដូសប៉ុណ្ណោះ។ ហើយបច្ចុប្បន្នវាកំពុងឆ្លងកាត់ការសាកល្បងលើមនុស្សផ្ទាល់តែម្តង។ ស្របពេលដែលក្រុមអ្នកពិសោធន៍បាននិយាយថា ការសាកល្បងដំណើរការបានយ៉ាងរលូន និងមិនមានការព្រួយបារម្ភអំពីសុវត្ថិភាពធំដុំនោះទេ។ ហើយក្នុងពេលដំណាលគ្នានេះ ការវិភាគកំពុងបន្តដំណើរការបន្ថែមទៀត៕ (ដកស្រង់ចេញពី Bangkok Post និង CNA)
ចែករំលែកព័តមាននេះ