ទេវភូមិជាន់ទី៤ឈ្មោះតុសិត ។ ពួកទេវតាដែលឈ្មោះថា តុសិត ព្រោះអត្ថថាជាអ្នកដល់នូវសេចក្តីត្រេកអរ ការឆ្អែតចិត្តក្នុងសិរីសម្បត្តិរបស់ខ្លួន ។ ស្តេចទេវតាដែលគ្រប់គ្រងទេវតានៅជាន់នេះមាននាមថា ស្តេចសន្តុសិត។ ជាពិភពរបស់អ្នកមានបញ្ញា ព្រះសព្វញ្ញូពោធិសត្វគ្រប់ៗព្រះអង្គ ដែលទ្រង់បំពេញបារមី៣០ គ្រប់បរិបូណ៌ហើយ ក្នុងកំណើតចុងក្រោយនៃព្រះពោធិសត្វទាំងឡាយនោះនឹងត្រូវទៅកើតនៅក្នុងឋានសួគ៌ជាន់តុសិតនេះឯង ។
កាលទេវតាក្នុងមួយម៉ឺនលោកធាតុមកប្រជុំគ្នាទូលអារាធនាឱ្យស្តេចមកយកកំណើតនៅក្នុងមនុស្សលោកនេះ ដើម្បីត្រាស់ជាព្រះពុទ្ធ ព្រះអង្គទ្រង់ពិចារណាមើលមហាវិលោកនៈ៥ប្រការគឺ ពិចារណាដល់កាលវេលា១ ពិចារណាដល់ទ្វីប១ ពិចារណាដល់ប្រទេស១ ពិចារណាដល់ត្រកូល១ ពិចារណាដល់មាតានិងកំណត់អាយុរបស់មាតា១ ។
កាលពិចារណាឃើញថា មានការសមគួរព្រមហើយ ទើបបានស្តេចចុះមកយោនយកកំណើតជាមនុស្សលោក ។ ព្រះសិអារ្យមេត្រីពោធិសត្វ និងអ្នកដែលជាគូអគ្គសាវ័កក្នុងកាលនេះក៏ស្ថិតនៅក្នុងឋានតុសិតទេវលោកនេះដែរ កាលមានអាយុក្ខ័យនៅត្រឹម ៨០.០០០ឆ្នាំ ព្រះពោធិសត្វ ក៏នឹងចុះមកត្រាស់ដឹង ជាព្រះសម្មាសម្ពុទ្ធប្រសើរបំផុតក្នុងលោក ៕ សាន សារិន
ចែករំលែកព័តមាននេះ