រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យបានចេញសេចក្ដីជូនដំណឹងស្ដីពីការផ្អាកដំណើរការជាបណ្ដោះអាសន្នផ្សារចំនួន៤ ចាប់ពីវេលាម៉ោង០០នាទីយប់ថ្ងៃទី១៩ ឈានចូលថ្ងៃទី២០ ខែមេសា ឆ្នាំ២០២១ រហូតដល់ថ្ងៃទី០២ ខែឧសភា ឆ្នាំ២០២១ រយៈពេល១៤ថ្ងៃដើម្បីទប់ស្កាត់ការបន្ទាន់តាមវិធានការសុខាភិបាលនូវឆ្លងរីករាលដាលនៃជំងឺកូវីដ-១៩ ដែលកំពុងឆ្លងរាលដាលយ៉ាងឆាប់រហ័សគួរឲ្យព្រួយបារម្ភ។
យោងតាមសេចក្ដីជូនដំណឹងដែលចេញនៅថ្ងៃទី១៩ ខែមេសា ឆ្នាំ២០២១ នេះសាលាខណ្ឌពោធិ៍សែនជ័យនឹងអនុវត្តនូវការបិទផ្សារចំនួនរួមមាន៖ ១-ផ្សារទួលពង្រ ស្ថិតនៅក្នុងភូមិទួលពង្រ, ២-ផ្សារត្រពាំងថ្លឹង, ៣-ផ្សារឯករាជ្យ១ ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ និង៤-ផ្សារស៊ិនជូរីផ្លាហ្សា បណ្ដោះអាសន្នស្ថិតនៅលើទីតាំងសួនកុមារពោធិ៍ចិនតុង ភូមិប៉ប្រកខាងជើង សង្កាត់កាកាបទី១។
ប្រភពដដែលនោះបានបន្តទៀតថា ការផ្អាកជាបណ្ដោះអាសន្ននេះដោយសារតែរយៈពេលប៉ុន្មានថ្ងៃចុងក្រោយនេះមានបងប្អូនអាជីវករ និងប្រជាពលរដ្ឋបានឆ្លងវីរុសកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ២០២១ រាលដាលយ៉ាងឆាប់រហ័សគួរឲ្យបារម្ភ និងចាំបាច់តម្រូវឲ្យមានវិធានការសុខាភិបាលដើម្បីទប់ស្កាត់ជាបន្ទាន់។ ទន្ទឹមនឹងនេះដែររដ្ឋបាលខណ្ឌពោធិ៍សែនជ័យ បានធ្វើការអំពាវនាវសូមឲ្យបងប្អូនអាជីវករ សន្តិសុខ បុគ្គលិក កម្មករ បម្រើការងារក្នុងផ្សារ និងក្រុមគ្រួសារអាជីវករពាក់ព័ន្ធ ព្រមទាំងប្រជាពលរដ្ឋដែលកន្លងមកធ្លាប់បានចេញចូលផ្សារទាំង៤ខាងលើចាប់ពីថ្ងៃទី០៥ ដល់ថ្ងៃទី១២ ខែមេសា ឆ្នាំ២០២១ សូមអញ្ជើញមកយកសំណាកតេស្តកូវីដ-១៩ជាបន្ទាន់។ មិនតែប៉ុណ្ណោះត្រូវអនុវត្តវិធានការចត្តាឡីស័ក ស្របតាមការណែនាំ និងវិធានការរបស់ក្រសួងសុខាភិបាលឲ្យបានត្រឹមត្រូវ ដើម្បីប្រយុទ្ធប្រឆាំងជំងឺកាចសាហាវមួយនេះ៕ ដោយ ៖ យន់ ស៊ីថា
ចែករំលែកព័តមាននេះ