អ៊ីស្រាអែល ៖ ប្រជាជននៃប្រទេសអ៊ីស្រាអែលអាចដើរហើរ ដោយពុំបាច់ពាក់ម៉ាស់ការពារកាលពីថ្ងៃអាទិត្យម្សិលមិញនេះ។ បន្ទាប់ពីរដ្ឋាភិបាលសម្រេចដកវិធានការស្តីពីការពាក់ម៉ាស់ក្នុងសម័យកូវីដ១៩នៅតាមទីធ្លាសាធារណៈ ដែលជាដំណើរឆ្ពោះទៅរកស្ថានភាពធម្មតាឡើងវិញ ដោយសារតែការចាក់វ៉ាក់សាំងទ្រង់ទ្រាយធំនៅទូទាំងផ្ទៃប្រទេស។ នេះបើតាមការចេញពីផ្សាយពីសារព័ត៌មាន Reuters។
ប្រមាណ៨១ភាគរយនៃប្រជាជនទូទាំងប្រទេសដែលមានអាយុលើសពី ១៦ឆ្នាំ ដែលជាក្រុមអាយុមានសិទ្ធិទទួលបានការចាក់វ៉ាក់សាំង Pfizer-BioNTech ដែលបានចាក់ចំនួន ២ដូសរួចមកហើយ។ ហើយជាលទ្ធផលនាំឱ្យមានការធ្លាក់ចុះករណីឆ្លង និងចំនួនអ្នកសម្រាកព្យាបាលក្នុងមន្ទីរពេទ្យជាអតិបរមា។
ទោះជាយ៉ាងនេះក្តី វត្តមានចូលក្នុងប្រទេសនេះពីសំណាក់ជនបរទេស នៅតែមានការរឹតបន្តឹងដដែល។ ហើយប្រជាជនអ៊ីស្រាអែលដែលវិលត្រឡប់មកពីបរទេសវិញ នៅតែត្រូវដាក់នៅដាច់ដោយឡែកពីគេតាមវិធានដែលបានកំណត់។ ដោយសារតែការព្រួយបារម្ភនៃភាពខុសគ្នានៃវីរុស ដែលអាចវាប្រឆាំងនឹងវ៉ាក់សាំងបាន។ ស្របពេលដែលក្រសួងសុខាភិបាលបាននិយាយថា ខ្លួនបានរកឃើញករណីឆ្លងថ្មីចំនួន ៧ករណី។
លោកនាយករដ្ឋមន្ត្រី ប៊េនចាមីន ណេតាន់យ៉ាហ៊ូ (Benjamin Netanyahu) បានប្រាប់អ្នកយកព័ត៌មានថា «យើងកំពុងតែដឹកនាំពិភពលោកនាពេលបច្ចុប្បន្ននេះ អំឡុងពេលដែលកើតឡើងនៃវីរុសឆ្លងកូវីដ១៩។ ប៉ុន្តែយើងនៅតែមិនទាន់បានបញ្ចប់វាទាំងស្រុងនៅឡើយ។ ហើយវាក៏អាចនឹងត្រឡប់មកវិញម្តងទៀត»។
ការពាក់ម៉ាស់ក្នុងប្រទេសអ៊ីស្រាអែល ត្រូវបានរឹតត្បិតយ៉ាងខ្លាំងកាលពីឆ្នាំមុន។ បើទោះបីជាវិធានការនេះ ត្រូវបានដកហូតក៏ពិតមែន ប៉ុន្តែក្រសួងសុខាភិបាលបាននិយាយថា តំរូវការនេះនៅតែត្រូវអនុវត្តភ្លាមៗចំពោះទីធ្លាសាធារណៈ និងទីប្រជុំជននានា ដោយក្រសួងជំរុញឱ្យពលរដ្ឋខ្លួនទាំងអស់ ត្រូវតែមានម៉ាស់ការពារដាក់ជាប់តាមខ្លួនជានិច្ច។ ស្របពេលដែលវិធានការរក្សាគម្លាតសង្គម នៅតែត្រូវប្រកាន់ខ្ជាប់ជានិច្ចផងដែរ។
រដ្ឋមន្ត្រីក្រសួងសុខាភិបាល លោក Sharon Alroy-Preis បានថ្លែងក្នុងវិទ្យុកងទ័ពអ៊ីស្រាអែលថា «បច្ចុប្បន្ននេះ នៅឡើយតែប្រជាជនមិនទាន់ទទួលបានការចាក់វ៉ាក់សាំង (កុមារអាយុក្រោម១៦ឆ្នាំ) ដែលយើងត្រូវតែការពារពួកគេ នៅអំឡុងពេលនេះ»៕
ចែករំលែកព័តមាននេះ