ទេវភូមិដែលឈ្មោះថា តាវត្តិង្សនោះ មានផ្ទៃក្រឡាដោយជុំវិញចំនួន១០០០០យោជន៍ តាំងនៅលើកំពូលភ្នំសិនេរុដែលមានកម្ពស់ ៨៤០០០យោជន៍ ព្រះឥន្ទ្រជាអ្នកគ្រប់គ្រងនគរនេះ ជាធំជាងទេវតាទាំងឡាយក្នុងជាន់តាវត្តិង្ស ។
តាវត្តិង្សមាននគរឈ្មោះសុទស្សនៈ តាំងនៅក្នុងទី១០០០០យោជន៍ មានកំផែង៤ទិស ក្នុងទិសនីមួយៗមានទ្វារ២៥០ រួមទាំងអស់១០០០ទ្វារ ។ នគរនេះប្រដាប់ដោយសួនផ្សេងៗ ជាស្ថានទីរីករាយ មានសួនបុណ្ឌរិក សួនមហាវ័ណ និងស្រះបោក្ខរណីផ្សេងៗ ត្រង់កណ្តាលទីក្រុងនោះ មានប្រាសាទមាសឈ្មោះវេជយន្តកម្ពស់ ១០០០យោជន៍ សម្រាប់ជាទីប្រថាប់របស់ស្តេចសក្កទេវរាជ ។ វេជយន្តនេះ មានការវិចិត្រដោយរតនៈ៧ប្រការ និងប្រដាប់ដោយទង់រតនៈកម្ពស់ ៣០០យោជន៍ ដែលជាផលកើតអំពីការសាងសាលាសុធម្មា ។
ក្នុងទេវនគរនោះ មានដើមបារិឆត្ត កម្ពស់១០០យោជន៍ មានមែកសាខាចេញទៅ៥០យោជន៍ បរិមណ្ឌលជុំវិញ ៣០០យោជន៍ វេលាចេញផ្កា ក៏បញ្ចេញក្លិនទៅបានចម្ងាយ១០០យោជន៍ ។ ខាងក្រោមដើមបារិឆត្តនោះ មានព្រះទែនហៅថា បណ្ឌុកម្ពលសិលាអាសនៈ ដែលមានពណ៌ដូចផ្កាជយព្រឹក្ស ពណ៌លក្ខណ៍ និងពណ៌ផ្កាឈូករោយ មានបណ្តោយ៦០យោជន៍ ទទឹង៥០យោជន៍ កម្ពស់១៥យោជន៍ ជាទីប្រថាប់របស់ស្តេចសក្កទេវរាជ ។ មានសាលាជាទីប្រជុំស្តាប់ធម៌ សម្តែងដោយបណ្ឌិតទាំងឡាយ មានសុនង្កកុមារជាដើម ។
មានចេតិយកែវមរកត ហៅថា ព្រះចូឡាមណី កម្ពស់១០០យោជន៍ ខាងក្រោមបញ្ចុះព្រះចង្កូមកែវស្តាំ និងព្រះកេសាដែលទ្រង់កាត់ក្នុងថ្ងៃចេញបួស ។ សក្កទេវរាជ មានរថឈ្មោះ វេជយន្ត ផ្នែកមុខជាទីអង្គុយរបស់សារថីឈ្មោះ មាតលីទេវបុត្រ ប្រវែង៥០យោជន៍ ផ្នែកកណ្តាលប្រវែង៥០យោជន៍ ជាទីប្រថាប់របស់ស្តេចសក្កទេវរាជ ផ្នែកក្រោយប្រវែង ៥០យោជន៍ រួមជា១៥០យោជន៍ មានបល្ល័ង្កវិចិត្រដោយរតនៈ៧ប្រការ កម្ពស់១យោជន៍ ទទឹង១យោជន៍ បាំងដោយស្វេតច្ឆត្រធំ ៣យោជន៍ ទឹមដោយសេះសិន្ធពអាជានេយ្យ មួយខាង ១០០០ ព្រមដោយគ្រឿងប្រដាប់ផ្សេងៗ ។
ស្តេចសក្កទេវរាជនោះ គ្រាខ្លះក៏ជិះដំរីឯរាវ័ណ ជាដំរីកម្ពស់១៥០យោជន៍ ទេវបុត្រដែលជាដំរីនោះឈ្មោះ សុទស្សនៈ មានមណ្ឌលកម្ពស់ ១២យោជន៍ ទទឹង៥០យោជន៍ ខាងក្នុងមណ្ឌប មានបល្ល័ង្កកែវមណី ទទឹង១យោជន៍ ជាទីប្រថាប់របស់សក្កទេវរាជ ដោយជុំវិញមណ្ឌប មានទង់រតនៈ បោះទុកក្នុងចន្លោះមួយផ្ទាំងប្រវែង១យោជន៍ មានកណ្តឹងព្យួរទុកត្រង់ចុង កាលត្រូវខ្យល់ត្រសៀកៗបក់មកក៏ឮជាសំឡេងទិព្វដ៏ពីរោះផ្សំគ្នានឹងសំឡេងតន្ត្រីដែលមានអង្គ៥ ។
ពោងក្រៅនេះ ជាទីប្រថាប់របស់ទេវបុត្រអ្នកបំពេញកុសលរួមគ្នាពីកាលមុន ។ ពោងនីមួយៗមានភ្លុក៧ ប្រវែង៥០យោជន៍ ។ ភ្លុកនីមួយៗមានស្រះបោក្ខរណី៧ ។ ស្រះនីមួយៗមានផ្កាឈូក៧ផ្កា ។ ផ្កាឈូកមួយៗមានត្របក៧ ។ ត្របកមួយៗមានទេពធីតា៧អង្គ រាំច្រៀង ។ មហោស្រពរាំច្រៀងរមែងមានលើភ្លុកដំរីដើម្បីជាកំសាន្ត លំហែនៃទេវបុត្រ៣៣អង្គនោះ ។ ស្តេចសក្កទេវរាជសោយយសធំ ស្តេចត្រាច់ទៅដោយប្រការដូច្នេះឯង ៕ សាន សារិន
ចែករំលែកព័តមាននេះ