យោងតាមគម្ពីរព្រះពុទ្ធសាសនាបានពន្យល់ថា ទេវតាគឺជាពួកអមនុស្សមួយប្រភេទដែលស្ថិតនៅក្នុងកាមភព៦ជាន់ ។ ទេវតាទាំងនោះស្ថិតនៅតាមជាន់ផ្សេងគ្នាតាមកម្លាំងបុណ្យរបស់ខ្លួនដែលបានសាងទុកមកហើយដូចជា ទេវតាណាមានស័ក្តិតូច គឺឋិតនៅជាន់ទី១ ឬហៅថាចាតុម្មហារាជិកា ឯទេវតាណាដែលមានស័ក្តិធំបន្តិចក៏ឋិតនៅជាន់ទី២ តាមលំដាប់លំដោយរៀងរហូតដល់ជាន់ទី៦ ។
ឋានទេវតាជាន់ទី១ ទេពទាំងឡាយដែលមានឈ្មោះថា ចាតុម្មហារាជិកា ព្រោះអត្ថថាមានភក្តីក្នុងស្តេចមហារាជទាំង៤ ឬថាទេពដែល កើតក្នុងជាន់ចាតុម្មហារាជិកា ដែលជាស្ថានទីនៅរបស់ស្តេចមហារាជទាំង៤នោះ ។
ទេវភូមិជាន់ចាតុម្មហារាជិកានេះ ស្ថិតនៅពាក់កណ្តាលភ្នំសិនេរុ ដែលមានភ្នំទាំង៧ជួរនៅព័ទ្ធជុំវិញភ្នំសិនេរុនោះ ។
ភូមិទេវតាជាន់នេះមានស្តេចមហារាជទាំង៤អង្គជាអ្នកគ្រប់គ្រងគឺ ១-ស្តេចធតរដ្ឋៈ គ្រប់គ្រង ពួកគន្ធព្វ ទេវតាឋិតនៅទិសខាងកើតនៃភ្នំសិនេរុ ២-ស្តេចវិរុឡ្ហកៈ គ្រប់គ្រង ពួកកុម្ភ័ណ្ឌទេវតា ឋិតនៅទិសខាងត្បូងនៃភ្នំសិនេរុ ៣-ស្តេចវិរូបក្ខៈ គ្រប់គ្រងពួកនាគទេវតា ឋិតនៅទិសខាងលិចនៃភ្នំសិនេរុ និង៤-ស្តេចកុវេរៈ ឬហៅថាស្តេច វេស្សវណមហារាជ គ្រប់គ្រងពួកទេវតា ឋិតនៅទិសខាងជើងនៃភ្នំសិនេរុ ។
ក្នុងអដ្ឋកថាពោលថា ទេវភូមិ ដែលឈ្មោះថាចាតុម្មហាវាជិកា មានទេវតា២ពួកគឺ ភូមិទេវតា១ និងអាកាសទេវតា១ ។ ទេវតាដែលអាស្រ័យនៅលើភ្នំក្តី នៅលើដើមឈើក្តី នៅតាមផែនដី តាមទន្លេ មហាសមុទ្រ ក្រោមដី ក្នុងផ្ទះ និងចេតិយជាដើម សង្គ្រោះចូលក្នុងភូមិទេវតា ទេវតាទាំងនោះមានវិមាននៅខ្លះ និងមិនមានវិមាននៅខ្លះតាមបុណ្យកុសលដែលខ្លួនបានសាងទុកមក ។ ចំណែកអាកាសទេវតានោះ មានវិមានអណ្តែតនៅក្នុងអាកាសជាប្រក្រតី ។
ទេវតាទាំង២ពួកនេះអាស្រ័យឋិតនៅជាប់តគ្នាតាមលំដាប់ដរាបដល់ភ្នំចក្រវាឡជាសួគ៌វិមាននៃទេវតាទាំងឡាយនោះ ៕ សាន សារិន
ចែករំលែកព័តមាននេះ