ខេត្តកណ្ដាល ៖ នៅល្ងាចថ្ងៃទី១៨ ខែមេសា ឆ្នាំ២០២១ លោក ប្លុង វិសាល ចៅក្រមស៊ើបសួរសាលាដំបូងខេត្តកណ្ដាល បានសម្រចចេញដីការឃុំខ្លួនបុរសស្រវឹងស្រាជោគជាំម្នាក់…
ខេត្តកណ្ដាល ៖ នៅល្ងាចថ្ងៃទី១៨ ខែមេសា ឆ្នាំ២០២១ លោក ប្លុង វិសាល ចៅក្រមស៊ើបសួរសាលាដំបូងខេត្តកណ្ដាល បានសម្រចចេញដីការឃុំខ្លួនបុរសស្រវឹងស្រាជោគជាំម្នាក់ បើករថយន្តបុកម៉ូតូបណ្តាលឲ្យស្លាប់ម្នាក់ និងរបួស៦នាក់ផ្សេងទៀត ទាំងយប់នៅក្រុងតាខ្មៅ ដាក់ពន្ធនាគារបណ្តោះអាសន្ន។ តៃកុងរថយន្តជាជនបង្កត្រូវចោទពីបទ «បើកបរដោយធ្វេសប្រហែស មិនប្រុងប្រយ័ត្ន បណ្ដាលឲ្យរងរបួស និងស្លាប់ដល់អ្នកដទៃ និងបើកបរក្នុងស្ថានភាពស្រវឹង» តាមបញ្ញាត្តិមាត្រា៨៣, ៨៥ និងមាត្រា៧៧ នៃក្រមព្រហ្មទណ្ឌ។ ដែលប្រព្រឹត្តនៅថ្ងៃទី១៦ ខែមេសា ឆ្នាំ២០២១ នៅចំណុចខាងមុខមន្ទីរសម្ភពពិសិដ្ឋ លើផ្លូវ២១ ស្ថិតនៅភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្ដាល។
ជនត្រូវចោទមានឈ្មោះ ឈ្មោះ ផុន ថៅរ៉ុម ភេទប្រុស អាយុ៤១ឆ្នាំ មានទីលំនៅផ្ទះលេខ៤៦៩ ភូមិក្រពើហាកើត សង្កាត់ព្រែកឫស្សី ក្រុងតាខ្មៅ ខេត្តកណ្ដាល។ បើតាមសមត្ថកិច្ចនគរបាលក្រុងតាខ្មៅបានឲ្យដឹងថា កាលពីថ្ងៃទី១៦ ខែមេសា ឆ្នាំ២០២១ វេលាម៉ោង១៨ និង៣០នាទី ត្រង់ចំណុចខាងមុខមន្ទីរសម្ភពពិសិដ្ឋ លើផ្លូវ២១ ស្ថិតនៅភូមិថ្មី១ សង្កាត់តាខ្មៅក្រុងតាខ្មៅ ខេត្តកណ្ដាល មានរថយន្តម៉ាកកាមរីបាឡែនមួយគ្រឿង ពណ៌ទឹកមាស ពាក់ស្លាកលេខ ភ្នំពេញ 2S-3326 បើកបរក្នុងល្បឿនលឿន ក្នុងទិសដៅពីត្បូងមកជើង មកដល់ចំណុចកើតហេតុខាងលើក៏បានបុកជាមួយម៉ូតូម៉ាក Honda cub ជ្រុង ពណ៌ទឹកប៊ិច ពាក់ស្លាកលេខ ភ្នំពេញ 1BZ-1186 អ្នកបើកម៉ូតូមានឈ្មោះ សោម ដានី ភេទស្រី អាយុ៤៥ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល (រងរបួសបាក់ជើងខាងឆ្វេង) និងអ្នករួមដំណើរពីក្រោយឈ្មោះ សាម៉េត នីបញ្ញា ភេទប្រុស អាយុ១៧ឆ្នាំ ត្រូវជាកូនមានទីលំនៅ ជាមួយគ្នា (រងរបួសស្រាល) ម៉ូតូបើកក្នុងទិសដៅពី ជើងទៅត្បូងរួចបត់ឆ្វេងត្រឡប់ក្រោយ។
រួចរថយន្តខាងលើបានរេចង្កូតទៅបុកនឹងម៉ូតូចំនួន៣គ្រឿងទៀតមាន ៖ ម៉ូតូទី១ មានម៉ាក Honda សង់ ប៊ិច ពណ៌ខ្មៅ ពាក់ស្លាកលេខ ភ្នំពេញ 1BF-2600 អ្នកបើកម៉ូតូមិនទាន់ស្គាល់ រងរបួសធ្ងន់ បើកម៉ូតូមានទិសដៅពីជើងទៅត្បូង។ ម៉ូតូទី២ មានម៉ាក Honda scoopy ពណ៌ក្រហម ពាក់ស្លាកលេខ ភ្នំពេញ 1BU-1239 អ្នកបើកម៉ូតូមានឈ្មោះ អន ស្រីនិច ភេទស្រី អាយុ២៣ឆ្នាំ មានទីលំនៅភូមិថ្មី សង្កាត់តាខ្មៅ ក្រុងតាខ្មៅខេត្តកណ្ដាល (ស្លាប់ពេលបញ្ជូនដល់មន្ទីរពេទ្យជ័យជំនះ) និងអ្នករួមដំណើរពីក្រោយ ២នាក់, ទី១-ឈ្មោះ ហ៊ាង សុខហ៊ុន ភេទស្រី អាយុ១៤ឆ្នាំ(របួសស្រាល), ទី២-ឈ្មោះ ចាន់ ស្រីលក្ខ ភេទស្រី អាយុ១៨ឆ្នាំ(របួសស្រាល) មានទីលំនៅជាមួយគ្នា បើកម៉ូតូមានទិសដៅពីជើងទៅត្បូង។ ទី៣-ម៉ាក Honda click ពណ៌ស ពាក់ស្លាកលេខ កណ្ដាល 1Z-0344 អ្នកបើកម៉ូតូមានឈ្មោះ តាំង ម៉េងហុង ភេទប្រុស អាយុ៤៩ឆ្នាំ មានទីលំនៅភូមិលេខ១ក សង្កាត់ស្វាយរលំ ក្រុងតាខ្មៅ ខេត្តកណ្ដាល (របួសធ្ងន់បាក់ជើងខាងឆ្វេង) ម៉ូតូបើកមានទិសដៅពីជើងទៅត្បូង។ ចំពោះមធ្យោបាយដែលពាក់ព័ន្ធបានយកមករក្សាទុកបណ្ដោះអាសន្ននៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់៕ ដោយ ៖ ប៉ឹង ឆដា
ចែករំលែកព័តមាននេះ