ខេត្តបន្ទាយមានជ័យ ៖ ជនសង្ស័យចំនួន២នាក់ ត្រូវបានកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបន្ទាយមានជ័យ រៀបចំសំណុំរឿងពីបទនាំមនុស្សឆ្លងដែនមិនស្របច្បាប់ បញ្ជូនខ្លួនទៅសាលាដំបូងខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ នៅថ្ងៃទី១៨ ខែមេសា ឆ្នាំ ២០២១ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ជនសង្ស័យទាំង២នាក់នេះ មានម្នាក់ឈ្មោះ រោះម សួន ភេទប្រុស អាយុ៤៩ឆ្នាំ ជាអ្នកបើករថយន្តម៉ាកនីស្សាន់មួយបាំងកន្លះ ពណ៌ ក្រហម ពាក់ស្លាកលេខ ក.៦០៧៦ ភ្នំពេញ២ មានទ្រុងដែក និងម្នាក់ទៀតឈ្មោះ អ៊ូច សុជា ភេទប្រុសអាយុ៤២ឆ្នាំ ជាអ្នករួមដំណើរ អ្នកទាំង២មានទីលំនៅភូមិអូរស្ងាត់ ឃុំត្រពាំងព្រលិត ស្រុកសំពៅលូន ខេត្តបាត់ដំបង ។
លោកអធិការនគរបាលស្រុកម៉ាឡៃ បានបន្តថា ជនសង្ស័យទាំង០២នាក់ខាងលើនេះ បានធ្វើសកម្មភាពដឹកពលករខ្មែរប្រុស-ស្រីចំនួន០៧នាក់ មានទីលំនៅភូមិបឹងឃ្លាំង ឃុំតាឡំ ស្រុកមង្គលបូរី ខេត្តបន្ទាយមានជ័យ បំរុងនាំឆ្លងដែនទៅប្រទេសថៃ ហើយក៏ត្រូវបានកម្លាំងនគរបាលស្រុកម៉ាឡៃ សហការជាមួយកម្លាំងកងរាជអាវុធហត្ថស្រុកម៉ាឡៃ ធ្វើការឃាត់ខ្លួននៅវេលាម៉ោង០០និង២៥នាទី ថ្ងៃទី១៧ ខែមេសា ឆ្នាំ២០២១ ត្រង់ចំណុចប៉ុស្តិ៍ត្រួតពិនិត្យផ្លូវកងវិស្វកម្ម ស្ថិតក្នុងភូមិអូរសំព័រ ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ រួចក៏នាំខ្លួនទៅធ្វើការសួរនាំនៅអធិការដ្ឋាន ទាំងអ្នកបើកបររថយន្ត និងពលករប្រុស-ស្រីទាំង៧នាក់។
លោកអធិការនគរបាលស្រុកម៉ាឡៃបានបញ្ជាក់ថា បើយោងតាមការបំភ្លឺរបស់ពលករទាំង៧នាក់បាននិយាយថា ពួកខ្លួនបានទំនាក់ទំនងជាមួយមេខ្សល់ ដើម្បីចេញទៅធ្វើការនៅប្រទេសថៃ បន្ទាប់មកក៏មានរថយន្តនីស្សាន់មួយបាំងកន្លះ ពណ៌ក្រហម មានទ្រុងដែក បើកបរដោយឈ្មោះរ៉ម សួន បានមកដឹកពួកខ្លួនពីស្រុកមង្គលបូរី ទៅកាន់ស្រុកសំពៅលូន ខេត្តបាត់ដំបង ដោយក្នុងម្នាក់ៗយកតម្លៃ៥០,០០០រៀល(ប្រាំម៉ឺនរៀល) លុះពេលមកដល់ត្រង់ចំណុចប៉ុស្តិ៍ត្រួតពិនិត្យផ្លូវកងវិស្វកម្ម ស្ថិតក្នុងភូមិអូរសំព័រ ឃុំអូរសំព័រ ស្រុកម៉ាឡៃ ក៏ត្រូវបានសមត្ថកិច្ចឃាត់យកមកសួរនាំតែម្តង ។
ចំណែកឈ្មោះ រ៉ម សួន អ្នកបើកបររថយន្តបានបញ្ជាក់ថា ខ្លួនពិតជាដឹកពលករខ្មែរប្រុស-ស្រីទាំង០៧នាក់ ពីស្រុកមង្គលបូរី ទៅកាន់ចំណុចផែស្ងួតរបស់លោកស្រី សុបិន្ត ស្ថិតក្នុងភូមិសាស្ត្រ ស្រុកសំពៅលូន នោះពិតប្រាកដមែន ដោយយកតម្លៃម្នាក់៥០,០០០រៀល (ប្រាំម៉ឺនរៀល) លុះពេលមកដល់ចំណុចប៉ុស្តិ៍ត្រួតពិនិត្យ ផ្លូវកងវិស្វកម្ម ស្ថិតក្នុងភូមិអូរសំព័រ ឃុំអូរសំព័រ ស្រុកម៉ាឡៃ ក៏ត្រូវបានសមត្ថកិច្ចឃាត់យកមកសួរនាំ តែម្តង។
លោកវរសេនីយ៍ឯក ឡាយ គឹមលួន នាយការិយាល័យ ប្រឆាំងការជួញដូរមនុស្សនិងការពារអនីតិជន បានបញ្ជាក់ថា ឈ្មោះ រ៉ម សួន អ្នកបើកបរ និងឈ្មោះអ៊ូច សុជា ជាអ្នករួមដំណើរ គឺជាមនុស្សប្រើប្រាស់នូវសារធាតុញៀនផងដែរ។ ម្យ៉ាងទៀត ដោយផ្អែកលើចម្លើយបំភ្លឺរបស់ពលករទាំង៧នាក់ និងចម្លើយសារភាពរបស់ជនសង្ស័យឈ្មោះ រ៉ម សួន សមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជន ក៏បានបញ្ជូនខ្លួនពួកគេទាំង២នាក់ទៅសាលាដមបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ