ខេត្តព្រៃវែង ៖ យោងតាមការបង្ហោះសាររបស់រដ្ឋបាលខេត្តព្រៃវែង នៅព្រឹកថ្ងៃទី១៨ មេសា ២០២១នេះ បានអោយដឹងថា នៅតែមានអ្នកល្មើសនឹងបម្រាម! ថ្ងៃនេះ មានអ្នកលួចចល័តទី ចូលមកខេត្តព្រៃវែងថ្មី បានរកឃើញវិជ្ជមានកូវីដ-១៩ ចំនួន៥នាក់បន្ថែមទៀត ដែលអ្នកទាំង៥នាក់ ជាអ្នកស្រុកស៊ីធរកណ្ដាល មកពីរាជធានីភ្នំពេញ ។
អ្នកជំងឺកូវីដ-១៩ ទាំង៥នាក់ នឹងទទួលទណ្ឌកម្មព្រហ្មទណ្ឌតាមមាត្រា១០ និងមាត្រា១១ នៃច្បាប់ស្តីពីកូវីដ ព្រមទាំងទណ្ឌកម្មរដ្ឋបាលបន្ថែមផ្សេងទៀត បន្ទាប់ពីត្រូវនាំ ទៅធ្វើចត្តាឡីស័ករយៈពេល១៤ថ្ងៃ និងបន្ទាប់ពីព្យាបាលរួច ។
ខណៈនេះ គណៈកម្មការខេត្តព្រៃវែង បានកំពុងធ្វើការស្រាវជ្រាវព័ត៌មាន ស្តីពី កន្លែងដែលគាត់បានចេញដំណើរ មធ្យោបាយធ្វើដំណើរ និងអ្នកពាក់ព័ន្ធដោយផ្ទាល់ និងប្រយោលដើម្បីយកមកធ្វើចត្តាឡីស័ក និងយកសំណាកទៅពិនិត្យបន្តទៀត ។
ក្នុងនាមជាអាជ្ញាធរ និងជាកងកម្លាំង បានខិតខំការពារអាយុជីវិតបងប្អូនទាំងយប់ទាំងថ្ងៃ មិនខ្លាចហត់នឿយ ទោះបីកាលៈទេសៈណាក៏ដោយ ដើម្បីប្រយុទ្ធប្រឆាំង ការពារទប់ស្កាត់ និងកាត់ផ្តាច់ចរន្ត នៃការឆ្លងជំងឺកូវីដ-១៩ ចេញពីខ្លួនអ្នក និងក្រុមគ្រួសារអ្នក ។ កងកម្លាំងមានសមត្ថកិច្ច ក៏ខ្លាចឆ្លងជំងឺកូវីដ-១៩ ដ៏កាចសាហាវនេះខ្លាំងណាស់ដែរ វាជាសត្រូវ ឥតស្រមោល ប៉ុន្តែវាជាតួនាទីភារកិច្ច និងកាតព្វកិច្ច ។
គួររម្លឹកថា «សុទ្ធតែជាអ្នកល្មើសបម្រាមលួចមកពីរាជធានីភ្នំពេញចូលមកខេត្តព្រៃវែងរកឃើញវិជ្ជមានកូវីដ៤នាក់ទៀត» អ្នកល្មើសបម្រាមបានលួចចូលមកខេត្តព្រៃវែងថ្មីៗនេះបានរកឃើញវិជ្ជមានកូវីដ-១៩ ចំនួន៤នាក់ បន្ថែមទៀត មកពីរាជធានីភ្នំពេញ ។ ការចល័តទីនេះ ធ្វើអោយនាំទុក្ខដល់គេពេញមួយភូមិ ទាំងឪពុកម្តាយ និងសាច់ញ្ញាតិ» ។
ឯកឧត្តម ជា សុមេធី អភិបាលខេត្តព្រៃវែង សូមបញ្ជាឲ្យចាត់វិធានការក្តៅ ការរឹតបន្តឹងការឆ្លងកាត់ និងដាក់អោយធ្វើចត្តាឡីស័កឲ្យបានត្រឹមត្រូវដោយគ្មានការយោគយល់ដាច់ខាត ៕
ចែករំលែកព័តមាននេះ