ភ្នំពេញ៖ សម្តេចតេជោ ហ៊ុន សែន បានបញ្ជាក់ក្នុងសារជាសំឡេងនៅយប់ថ្ងៃទី១៤ ខែមេសា ឆ្នាំ២០២១ បន្ទាប់ពីចេញសេចក្តីសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល ថា វិធានការបិទខ្ទប់រាជធានីភ្នំពេញ និងក្រុងតាខ្មៅ មិនមែនដើម្បីឲ្យប្រជាជនប៉ះពាល់ ឬសម្លាប់ប្រជាពលរដ្ឋនោះទេ។ ប៉ុន្តែមានគោលបំណងតែមួយគត់ ដើម្បីទប់ស្កាត់ជំងឺកូវីដ១៩។
សម្តេចតេជោ ហ៊ុន សែន បានលើកឡើងថា នៅពេលបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល រយៈពេល ១៤ថ្ងៃ ចាប់ពីម៉ោងសូន្យ ថ្ងៃទី១៥ ខែមេសា រហូតដល់ថ្ងៃទី២៨ ខែមេសា គឺនៅពេលបិទខ្ទប់នេះ បុគ្គលគ្រប់រូប មិនឲ្យធ្វើដំណើរចេញពីលំនៅដ្ឋាន ឬទីសំណាកបច្ចុប្បន្នទេ ប្រសិនបើគ្មានការចាំបាច់។ តែក៏មានអនុញ្ញាតឲ្យធ្វើដំណើរ ដូចជា ទៅធ្វើការងារ ទៅប្រកបរបរលក់ដូរ ការធ្វើដំណើរទៅទិញម្ហូបអាហារ និងចំណុចមួយចំនួនទៀត ដែលកំណត់ក្នុងសេចក្តីសម្រេច។
សម្តេចតេជោ ហ៊ុន សែន បញ្ជាក់ថា ដូច្នេះការសម្រេចបិទខ្ទប់នេះ មិនមែនបិទ ដើម្បីសម្លាប់ប្រជាជន ដោយមិនមានម្ហូបអាហារនោះទេ ព្រោះកន្លែងលក់ដូរ និងផ្សារ នៅបើកជាធម្មតា។ ម្យ៉ាងទៀត ការបិទនេះ ក៏មិនមែនសម្លាប់សេដ្ឋកិច្ច និងសង្គមទាំងស្រុងនោះដែរ។
សម្តេចតេជោ ហ៊ុន សែន បានប្រកាសអំពាវនាវម្តងហើយម្តងទៀត សូមកុំឲ្យប្រជាជននៅភ្នំពេញ និងក្រុងតាខ្មៅ ដែលត្រូវបិទខ្ទប់នេះ ភ័យស្លន់ស្លោរ ហួសហេតុ នាំឲ្យជ្រុលច្របលដូចកាលពីល្ងាចមិញ។ បងប្អូនមិនដាច់បាយ មិនខ្វះស្បៀងអាហារឡើយ។ បន្លែបង្កា ត្រីសាច់ នៅបន្តែបន្តបើកឲ្យនាំចូលមកលក់នៅភ្នំពេញ ផ្គត់ផ្កង់ចូលទីក្រុងបន្តដដែល។
សម្តេចតេជោ ក៏បានប្រកាសកុំឲ្យអ្នកលក់អង្ករ រួមទាំងទំនិញគ្រប់ប្រភេទ ត្រីសាច់ជាដើម កុំដំឡើងថ្លៃ។ ក្រសួងពាណិជ្ជកម្ម ត្រូវពិនិត្យករណីនេះ ដោយមិនទុកឲ្យទំនិញឡើងថ្លៃតាមអំពើចិត្តនោះទេ ហើយក្រសួង ក៏ត្រូវបញ្ចេញអង្កររដ្ឋ ចូលទីផ្សារផងដែរ នៅពេលនេះ ដើម្បីទប់កុំឲ្យអង្ករឡើងថ្លៃ។
សម្តេចកត់សម្គាល់ថា នៅពេលនេះ តាមខេត្តនានា នៅតែមានក្រុមអ្នកចូលចិត្តផឹកស៊ី មិនមែនតែនៅភ្នំពេញ។ ដូច្នេះសម្តេចតេជោ ហ៊ុន សែន បានអំពាវនាវឲ្យផ្អាកការជួបជុំផឹកស៊ី និងផ្អាកការលក់គ្រឿងស្រវឹង ស្រា និងប៊ីយែរគ្រប់ប្រភេទ នៅទូទាំងប្រទេស មិនត្រឹមតែនៅភ្នំពេញទេ។
សម្តេចតេជោ ហ៊ុន សែន បានប្រកាសព្រមានថា នៅពេលនេះ កម្ពុជាយើង កំពុងស្ថិតនៅមាត់ជ្រោះនៃមរណៈហើយ។ ដូច្នេះយើងត្រូវរួមដៃគ្នា រវាងប្រជាជន និងរដ្ឋ ដើម្បីប្រយុទ្ធនឹងកូវីដ១៩។ មកដល់ម៉ោងនេះ យើងមានជាង ៣០០នាក់ទៀត បានឆ្លងជំងឺកូវីដ១៩ ហើយសព្វថ្ងៃ យើងក៏មិនមានកន្លែងដាក់អ្នកជំងឺដែរ។ ពេលនេះ មិនត្រឹមតែគ្រោះថ្នាក់ឆ្លងជំងឺ ហើយត្រូវចូលពេទ្យទេ តែក៏មានអ្នកស្លាប់ជារៀងរាល់ថ្ងៃដែរ។ ដូច្នេះការបិទខ្ទប់រាជធានីភ្នំពេញ និងទីក្រុងតាខ្មៅ គឺជាការចាំបាច់ ដើម្បីទប់ស្កាត់ការឆ្លងរាលដាលជំងឺកូវីដ១៩។
ក្នុងសារជាសំឡេងជាង ២៨នាទីនេះ សម្តេចតេជោ ហ៊ុន សែន ក៏បានប្រកាសណែនាំដល់ក្រសួងការងារ និងបណ្តុះបណ្តាលវិជ្ជាជីវៈ ពិនិត្យបិទរោងចក្រកាត់ដេរ តែរោងចក្រផលិតចំណីអាហារ មី និងគ្រឿងហូបចុក ឲ្យបន្តដំណើរការ។ អាជ្ញាធររាជធានីភ្នំពេញ និងខេត្តកណ្តាល ក៏ត្រូវពិនិត្យមើលហាងលក់ទំនិញណាខ្លះ ដែលត្រូវបិទ ហើយក្នុងនោះ ហាងលក់សម្លៀកបំពាក់ និងផលិតផលមិនចាំបាច់ផ្សេងទៀត ក្រៅពីលក់ម្ហូបអាហារ គ្រឿងឧបភោគបរិភោគ ក៏ត្រូវបិទក្នុងអំឡុងពេល ១៤ថ្ងៃនេះផងដែរ។
យ៉ាងណាក៏ដោយ នៅតាមរោងចក្រ តាមហាង និងតាមផ្សារ ដែលបើកលក់របស់របរចាំចាប់ និងម្ហូបអាហារប្រចាំថ្ងៃនេះ ត្រូវបានសម្តេចតេជោ ណែនាំឲ្យរក្សាគម្លាត និងវិធានសុខាភិបាល ឲ្យបានត្រឹមត្រូវតាមការណែនាំរបស់ក្រសួងសុខាភិបាល។ ក្នុងនោះ ផ្សារទំនើប ក៏ត្រូវដាក់វេនគ្នាចូល ដើម្បីកុំឲ្យប្រជ្រៀតគ្នាផងដែរ។
សម្តេចតេជោ ក៏បានសំដែងការសោកស្តាយចំពោះការបែកធ្លាយសំឡេងរបស់សម្តេច កាលពីល្ងាចថ្ងៃទី១៤ ខែមេសា ជុំវិញវិធានការបិទខ្ទប់រាជធានីភ្នំពេញ និងក្រុងតាខ្មៅ ហើយនាំឲ្យប្រជាជនជ្រុលច្របល់ និងប៉ះពាល់អារម្មណ៍របស់ប្រជាជនមួយចំនួន។ សម្តេចប្រកាសថា នឹងស្វែងរកបុគ្គលក្នុងជួរថ្នាក់ដឹកនាំ ដែលខ្វះការទទួលខុសត្រូវ នាំឲ្យបែកធ្លាយសំឡេងរបស់សម្តេចនោះ។
តែយ៉ាងណាក៏ដោយ សម្តេចតេជោ ហ៊ុន សែន បានប្រកាសជាថ្មីថា ការបិទខ្ទប់រាជធានីភ្នំពេញ និងទីក្រុងតាខ្មៅ ក្នុងខេត្តកណ្តាលនេះ មិនឲ្យប្រជាជនដាច់បាយ ដាច់ទឹក និងដាច់ភ្លើងនោះទេ៕
ចែករំលែកព័តមាននេះ