រាជធានីភ្នំពេញ ៖ តារាកំប្លែងនាង នីឡា បានទម្លាយរឿងរ៉ាវមួយចំនួនដែលបានកើតឡើងក្នុងសម្ព័ន្ធភាពស្នេហារបស់នាង បន្ទាប់ពីនាងបានភ្ជាប់ទំនាក់ទំនងជាមួយគូស្នេហ៍របស់នាងអស់ប្រមាណជាង៤ឆ្នាំមកនេះ។
កូនស្រីរបស់លោក សុវណ្ណ រិទ្ធី ហៅតាវ៉ិចទ័រ រូបនេះ បានទទួលស្គាល់ថា ស្នេហារបស់នាងបានទទួលរងនូវព្យុះភ្លៀងពាក្យសម្តីមិនល្អជាបន្តបន្ទាប់ ប៉ុន្តែពួកនាងមិនបានចុះចាញ់នោះឡើយ។ ជាមួយនឹងរូបភាពផ្អែមល្ហែមជាមួយគូស្នេហ៍ដែលបានបង្ហោះតាមបណ្តាញសង្គមហ្វេសប៊ុក នីឡា ក៏បានភ្ជាប់ជាមួយនឹងសារថា «4ឆ្នាំ4ខែ ដែលមានន័យស្គាល់គ្រប់រសជាតិ ផ្អែម ល្វីង ជូរចត់ រឿងលំបាកជាច្រើនដែលគេមើលមិនឃើញ ខ្លះគេសើចចំអក ដៀល និយាយដើម គិតអាក្រក់!!!! តែខ្ញុំមិនដែលស្ដាប់ គិត ឬអន់ចិត្ត»។
នាងបញ្ជាក់ថា «ផ្លូវខ្ញុំរើសចង់អ្នកណាគិតបែបណាតាមការគួរ… តែសម្រាប់ខ្ញុំរយៈពេល4ឆ្នាំនេះ បានធ្វើអោយខ្ញុំស្វែងយល់បានច្រើន»។ នាងថា «គេអួតប្ដីទិញពេជ្រ ទិញផ្ទះឡាន តែខ្ញុំអួតគូអនាគតដែលជាពេជ្រសម្រាប់ខ្ញុំ0x017d7? ត្រូវចាំថ្ងៃនេះ ពេលនេះ ខ្ញុំលំបាក តែខ្ញុំនៅតែតស៊ូអត់ធ្មត់… ទ្រាំបន្តិចនឹងដល់គោលដៅ…»។
បើតាម នីឡា ថា «ជីវិតគូរមិនស្រួលដូចខ្ញុំគិតកាល3ឆ្នាំមុន តែបើយើងចេះរក្សាគ្នាគឺមិនបាត់បង់ ថែរគ្នាទៅមកបាននៅជាមួយគ្នាបានយូរ បើមានម្នាក់ថែរម្នាក់ទៀតមិនថែរគង់តែបែក ចឹងត្រូវថែរទាំងពីរ»។ នាងថា «ការមើលងាយនៅពេលដែលខ្ញុំបានជួបគាត់ គឺច្រើន តែខ្ញុំសុំតែម្យ៉ាងកុំទាន់ទៅណាចាំមើលថ្ងៃជ័យរបស់ខ្ញុំសិន ខ្ញុំចូលចិត្តជីវិតសាមញ្ញ មិនហ៊ឺហា មិនឡូយឆាយ តែមានក្ដីសុខ សុំត្រឹមចំណងស្នេហ៍មួយនេះ ឋិតថេររហូតទៅ happy anniversary ជូនពរមនុស្សស្រីគ្រប់រូបសំណាងល្អ»។
ជាការកត់សម្គាល់ ក្រោយពីបានផ្តាច់ពាក្យជាមួយគូស្នេហ៍ដំបូង ដែលត្រូវបានគេស្គាល់ថា ជាកូនប្រុសថៅកែល្ខោនដ៏ល្បី គឺលោក ភី សុគន្ធី មក នីឡា ក៏បានភ្ជាប់ទំនាក់ទំនងស្នេហ៍ជាមួយបុរសវ័យក្មេងម្នាក់ទៀត ដែលជាកូនអ្នកមានគួរសមម្នាក់ផងដែរ។ ចំណងស្នេហ៍ថ្មីរបស់នាង ក៏បានឈានដល់ពិធីភ្ជាប់ពាក្យផងដែរ ខណៈពេលពិធីមង្គលការរបស់នាងត្រូវបានលើកពេលម្តងជាពីរដងរួចមកហើយ ដោយសារការរីករាលដាលនៃជំងឺកូវីដ១៩ នៅក្នុងប្រទេសកម្ពុជា៕
ចែករំលែកព័តមាននេះ