រាជធានីភ្នំពេញ ៖ បុរសម្នាក់ស្រវឹងស្រា បានជិះម៉ូតូចាប់ហ្វ្រាំងទាំងបង្ខំ ព្រោះខ្លាចបុករថយន្តដឹកទំនិញ ដែលកំពុងបើកបត់ត្រលប់ក្រោយ បណ្ដាលឲ្យដួលម៉ូតូខ្លួនឯងរងរបួសតិចតួច តែបែរជាទារសំណងពីខាងរថយន្ត បាន២០០ដុល្លារបន្ថែមទៀត។ ហេតុការណ៍នេះដែរ បានកើតឡើងនៅវេលាម៉ោង៩ និង១០នាទីយប់ ថ្ងៃទី៨ ខែមេសា ឆ្នាំ២០២១ នៅតាមបណ្ដោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តប្រភេទយីឌុប ដឹកទំនិញម៉ាក HINO ពណ៌ទឹកប៊ិច ពាក់ស្លាកលេខ ភ្នំពេញ 3A-4039 បានបើកធ្វើដំណើរចេញពីច្រមុះជ្រូកក្បាលថ្នល់ ឡើងទៅផ្លូវ៦០ម៉ែត្រ ក្នុងទិសដៅពីជើងទៅត្បូង។
លុះមកដល់ចំណចកើតហេតុក៏ស្រាប់តែបត់ឆ្វេងបម្រុងត្រលប់ក្រោយវិញ តែគាប់ជួនរថយន្ដបត់កាត់ទទឹងផ្លូវក៏ស្រាប់តែបុរសម្នាក់ស្រវឹង បានជិះម៉ូតូម៉ាក ស្កុបពី ពណ៌សលាយផ្ទៃមេឃ ពាក់ស្លាកលេខ ភ្នំពេញ 1HT-1413 បានជិះធ្វើដំណើរតាមទិសស្របគ្នាហើយល្បឿនលឿន ព្រមទាំងបានចាប់ហ្វ្រាំងទាំងបង្ខំព្រោះខ្លាចបុករថយន្តដែលកំពុងបត់ត្រលប់ក្រោយ ទើបបណ្ដាលឲ្យដួលម៉ូតូអូសជិត៥ម៉ែត្ររងរបួសរលាត់ដៃជើងតិចតួចព្រមទាំងធ្វើឲ្យរងការខូចខាតម៉ូតូបន្តិចបន្តួច ហើយទាមទារសំណងពីខាងរថយន្ត ដោយចោទថារថយន្ដបត់ត្រលប់ក្រោយជាអ្នកខុស បង្កគ្រោះថ្នាក់ដល់អ្នកដទៃ ទាំងដែលរថយន្តមិនបានប៉ះជាមួយនឹងម៉ូតូសូម្បីតែបន្តិច។
ក្នុងហេតុការណ៍នេះដែរ បន្តិចក្រោយមក ឃើញមានកម្លាំងសមត្ថកិច្ចមូលដ្ឋាន បានចុះទៅកន្លែងកើតហេតុ រួចហើយក៏បានឲ្យរថយន្ត បើកអែបគៀន និងឲ្យភាគីទាំងសងខាងសម្របសម្រួលគ្នាផងដែរ។ ក្រោយពេលកតហេតុភាគីខាងរថយន្តបានសុំជួយចេញថ្លៃព្យាបាលរបួស និងខូចខាតម៉ូតូ ចំនួន១០០ដុល្លារ តែខាងម៉ូតូមិនសុខចិត្ត ទាមទារសំណង២០០ដុល្លារ តែដោយសារមិនចង់មានរឿងវែងឆ្ងាយ ខាងរថយន្តក៏យល់ព្រមសងសំនងចំនួន២០០ដុល្លារឲ្យទៅខាងម៉ូតូដើម្បីបញ្ចប់រឿងតែម្ដង។ ដោយ ៖ យឹម ឈឿន
ចែករំលែកព័តមាននេះ