ក្រុងតូក្យូ ៖ ក្រុមគ្រូពេទ្យជំនាញនៅប្រទេសជប៉ុន បានប្រកាសនៅពីថ្ងៃទី៩ ខែមេសានេះថា ពួកគេបានធ្វើការវះកាត់ប្តូរជាលិកាសួត ជាលើកដំបូងនៅលើពិភពលោក ដោយជោគជ័យ ពីអ្នកបរិច្ចាគដែលរស់នៅ ទៅអ្នកជំងឺដែលមានការខូចខាតសួតធ្ងន់ធ្ងរពីការវាយប្រហាររបស់វីរុសកូវីដ-១៩…
ក្រុងតូក្យូ ៖ ក្រុមគ្រូពេទ្យជំនាញនៅប្រទេសជប៉ុន បានប្រកាសនៅពីថ្ងៃទី៩ ខែមេសានេះថា ពួកគេបានធ្វើការវះកាត់ប្តូរជាលិកាសួត ជាលើកដំបូងនៅលើពិភពលោក ដោយជោគជ័យ ពីអ្នកបរិច្ចាគដែលរស់នៅ ទៅអ្នកជំងឺដែលមានការខូចខាតសួតធ្ងន់ធ្ងរពីការវាយប្រហាររបស់វីរុសកូវីដ-១៩ ។
ប្រធានមន្ទីរពេទ្យ ក្យូតូ Kyoto University បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា អ្នកជំងឺកូវីដ-១៩ម្នាក់ ជាស្ត្រីមកពីតំបន់ភាគខាងលិចប្រទេសជប៉ុន ដែលកំពុងជាសះស្បើយឡើងវិញ បន្ទាប់ពីទទួលការវះកាត់ជិត១១ម៉ោង កាលពីថ្ងៃពុធ ។ អ្នកបរិច្ចាគគឺ ប្តី និងកូនប្រុសរបស់នាង ដែលបានបរិច្ចាគផ្នែកខ្លះ នៃសួតរបស់ពួកគេ ហើយអ្នកទាំង២ ក៏ស្ថិតក្នុងស្ថានភាពល្អ ផងដែរ ។
ប្រធានមន្ទីរពេទ្យ ក្យូតូ បានបន្តថា វាជាការប្តូរជាលិកាសួត ដំបូងគេបំផុតនៅលើពិភពលោក ពីអ្នកបរិច្ចាគដែលកំពុងរស់នៅ ទៅមនុស្សម្នាក់ ដែលមានការខូចខាតសួតយ៉ាងធ្ងន់ធ្ងរ ។
វេជ្ជបណ្ឌិត ហ៊ីរ៉ូស៊ី Hiroshi Date ដែលដឹកនាំការវះកាត់នេះលោកបាននិយាយថា “ឥឡូវនេះ យើងអាចបង្ហាញថា យើងមានជម្រើស នៃការប្តូរសួត (ពីអ្នកបរិច្ចាគដែលនៅរស់) ទៅដល់អ្នកជំងឺ ដែលមានការខូចខាតសួត ធ្ងន់ធ្ងរបណ្តាលមកពីមេរោគកូវីដ-១៩” ។
ស្ត្រីអ្នកជំងឺកូវីដ-១៩ រូបនេះ មានការពិបាកដកដង្ហើមកាន់តែធ្ងន់ធ្ងរទៅៗ នាងត្រូវបានក្រុមគ្រូពេទ្យ ដាក់ម៉ាស៊ីនជំនួយដកដង្ហើម ដើម្បីទ្រទ្រង់ជីវិត អស់រយៈពេលជាង៣ខែ នៅមន្ទីរពេទ្យមួយផ្សេងទៀត ដោយសារតែសួតរបស់នាង ត្រូវខូចខាតយ៉ាងខ្លាំង ។ សូម្បីតែ បន្ទាប់ពីនាងគ្មានមេរោគក៏ដោយ សួតរបស់នាងលែងមានមុខងារនិងអាចព្យាបាលបានទៀតហើយ ជម្រើសតែមួយគត់សម្រាប់នាង ដើម្បីរស់នៅបន្ត គឺទទួលការប្តូរសួត ។
ប្តី និងកូនប្រុសរបស់នាង បានស្ម័គ្រចិត្ត បរិច្ចាគផ្នែកខ្លះ នៃសួតរបស់ពួកគេ ហើយការវះកាត់ ធ្វើឡើងនៅមន្ទីរពេទ្យ ក្យូតូ ដោយមានសមាជិកគ្រូពេទ្យ ៣០នាក់ ដឹកនាំដោយវេជ្ជបណ្ឌិត Hiroshi ។ ប្តីរបស់នាង បានបរិច្ចាគសួតខាងឆ្វេងរបស់គាត់ ហើយកូនប្រុសបានអោយសួតខាងស្តាំមួយផ្នែកទៀតទៅម្តាយ ។
ប្រធានមន្ទីរពេទ្យ ក្យូតូ ក៏បានបញ្ជាក់ថា ស្ត្រីអ្នកជំងឺ ត្រូវបានគេរំពឹងថា នឹងអាចចាកចេញពីមន្ទីរពេទ្យ ក្នុងរយៈពេលប្រហែល ២ខែ ហើយអាចវិលត្រឡប់ទៅរកជីវិតធម្មតាវិញ ក្នុងរយៈពេលប្រហែល ៣ខែ ខាងមុខ ៕
ចែករំលែកព័តមាននេះ