រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលឆោឡោមួយបានកើតឡើង ខណៈស្ត្រីជាប្រពន្ធចុះចោលពីប្តីជាង២ខែមកហើយ មករស់នៅជាមួយប្រុសស្នេហ៍ថ្មី លុះពេលប្តីតាមទាន់ ក៏ប្តឹងសមត្ថកិច្ចឱ្យឃាត់ភ្លាមៗតែម្តង បង្កអោយមានការភ្ញាក់ផ្អើលកាលពីវេលាម៉ោង១១យប់ ថ្ងៃទី៨ ខែមេសា ឆ្នាំ២០២១ នៅចំណុចផ្ទះជួល ស្ថិតក្នុងភូមិត្រពាំងក្រសាំង សង្កាត់ត្រពាំងក្រសាំងខណ្ឌពោធិ៍សែនជ័យ រាជធានីភ្នំពេញ ។
សេចក្តីរាយការណ៍បន្តថា ប្រពន្ធឈ្មោះស្រីភ័ស្ស អាយុ២៧ឆ្នាំ មុខរបរកម្មកររោងចក្រ ស្នាក់នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកកំណើតនៅខេត្តព្រៃវែង ចំណែកប្តីឈ្មោះក្រឹតពៅ អាយុ២៨ឆ្នាំ មុខរបរកម្មកររោងចក្រ ស្នាក់បន្ទប់ជួល សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅខេត្តព្រៃវែង ។ ហើយប្តីប្រពន្ធនេះមានកូនចំនួន២នាក់ ក្នុងនោះស្រីម្នាក់ និងប្រុសម្នាក់ ដោយកូនបងរស់នៅជាមួយឪពុកម្ដាយខាងប្រុស ចំណែកកូនប្អូនរស់នៅជាមួយឪពុកម្ដាយខាងស្រី ។ ដោយឡែកប្រុសថ្មីឈ្មោះ យន ចាន់ធា អាយុ២៧ឆ្នាំ មុខរបរប្រូរថយន្តស្ទូច ស្នាក់នៅមិនពិតប្រាកដ ។
តាមប្រភពពីបុរសជាប្តីបាននិយាយប្រាប់ថា ប្រពន្ធរបស់គាត់បានចុះចោលគាត់ពីបន្ទប់ជួលទៅរកបន្ទប់ជួលមួយទៀត តែមិនទាន់លែងលះដាច់ស្រេចនៅឡើយទេ ដោយសារមានការសង្ស័យថា ប្រពន្ធរបស់គាត់មានប្រុសថ្មី គាត់ក៏បានតាមដានជាច្រើនថ្ងៃមកហើយ ។
ប្រភពដដែលបន្តថា ចំណែកមិត្តភក្តិប្រពន្ធរបស់គាត់បានប្រាប់គាត់ថា ប្រពន្ធរបស់គាត់មានទំនាក់ទំនងជាមួយប្រុសស្នេហ៍ថ្មី ទើបគាត់បានតាមដានមកដល់បន្ទប់ជួលថ្មីរបស់ប្រពន្ធ តែចាប់កំហុសប្រពន្ធអត់បាន ទើបតែយប់ថ្ងៃកើតហេតុនោះ រូបគាត់ក៏មកដល់បន្ទប់ជួលម្តងទៀត ស្រាប់តែឃើញប្រពន្ធរបស់ខ្លួនកំពុងមានសេចក្ដីសុខជាមួយប្រុសស្នេហ៍ថ្មី ទើបប្តឹងសមត្ថកិច្ចឱ្យជួយអន្តរាគមន៍ភ្លាមៗ ។
បើតាមប្រភពព័ត៌មានពីស្ត្រីជាប្រពន្ធបានបញ្ជាក់ប្រាប់ថា ប្តីរបស់គាត់តែងតែធ្វើបាបរូបគាត់ជាច្រើនលើកមកហើយ ដោយធ្លាប់លែងលះគ្នាប្រមាណជាង៤ឆ្នាំមុនមួយដងរួចមកហើយ តែមិនទាន់ដាច់ស្រេច ។ ហើយប្រមាណជាង២ខែមុននេះ ប្តីរបស់គាត់បានប្រើអំពើហិង្សាដាក់រូបគាត់ ហើយគំរាមចង់សម្លា.ប់ទៀត ទើបគាត់ដាច់ចិត្តចាកចេញមករស់នៅបន្ទប់ផ្សេងតែម្តង។
ស្ត្រីជាប្រពន្ធបានបន្តទៀតថា រីឯបុរសជាប្រុសស្នេហ៍ថ្មី ទើបមានទំនាក់ទំនងបានប្រមាណជាងមួយសប្តាហ៍ទេ តាមរយៈលេង Tik Tok និងហ្វេសប៊ុក ទើបបានទាក់ទងស្និទ្ធស្នាលបែបនេះតែម្តង ។
ក្រោយពេលកើតហេតុ បន្ទាប់ពីសមត្ថកិច្ចនគរបាលប៉ុស្តិ៍ នាំភាគីទាំងសង្ខាងមកប៉ុស្ដិ៍ ដើម្បីសាកសួរ ឱ្យដឹងរឿង ហើយដោយសារតែប្តីប្រើអំពើហិង្សាដាក់ប្រពន្ធពេក ទើបឱ្យភាគីប្តីប្រពន្ធទៅលែងលះគ្នានៅឯស្រុកកំណើត ចំណែកបុរសជាប្រុសស្នេហ៍ថ្មី សមត្ថកិច្ចបានឱ្យត្រឡប់ទៅវិញភ្លាមៗផងដែរ ។
ចែករំលែកព័តមាននេះ