រាជធានីភ្នំពេញ ៖ នៅក្នុងសារលិខិតផ្ញើជូនជនរួមជាតិ ក្នុងឱកាសបុណ្យចូលឆ្នាំថ្មីប្រពៃណីជាតិ សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ថា ក្នុងឆ្នាំ…
រាជធានីភ្នំពេញ ៖ នៅក្នុងសារលិខិតផ្ញើជូនជនរួមជាតិ ក្នុងឱកាសបុណ្យចូលឆ្នាំថ្មីប្រពៃណីជាតិ សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ថា ក្នុងឆ្នាំ ២០២០ កន្លងទៅ និងរហូតមកដល់ជិតពាក់កណ្តាលឆ្នាំ ២០២១នេះ កម្ពុជាបាន និងកំពុងទទួលរងនូវផលប៉ះពាល់អវិជ្ជមានពីជំងឺកូវីដ ១៩ មកលើបញ្ហាសុខភាព សង្គម សេដ្ឋកិច្ច និងជីវភាពរស់នៅរបស់ប្រជាពលរដ្ឋ ព្រមទាំងអាចបន្ទច់បង្អាក់ដល់ការអភិវឌ្ឍន៍ឈានឡើងរបស់កម្ពុជា ។ ជាលទ្ធផល សេដ្ឋកិច្ចកម្ពុជាមានកំណើនអវិជ្ជមាន (-៣%) ។
សម្តេចបានលើកឡើងបន្តថា កម្ពុជាបានអនុវត្តគោលនយោបាយម៉ាក្រូសេដ្ឋកិច្ចប្រកបដោយភាពប្រុងប្រយ័ត្ន និងធ្វើឲ្យសេដ្ឋកិច្ចមានស្ថិរភាព ហើយបានជំរុញ និងលើកកម្ពស់ការធ្វើពិពិធកម្មសេដ្ឋកិច្ច ភាពប្រកួតប្រជែង ព្រមទាំងការផលិត និងការប្រើប្រាស់ក្នុងស្រុក ។ ទំហំពាណិជ្ជកម្មអន្តរជាតិរបស់កម្ពុជាវិញមានប្រមាណជាង ៣៦ ៤០៦លានដុល្លារអាមេរិក ចំណែកការនាំចេញមានទំហំជាង ១៧ ៤៣៦លានដុល្លារអាមេរិក ។ អត្រាប្តូរប្រាក់នៅកម្ពុជាមានស្ថិរភាព អត្រាអតិផរណាស្ថិតក្នុងកម្រិតទាប និងអាចគ្រប់គ្រងបាន ស្របពេលដែលទុនបម្រុងអន្តរជាតិបន្តកើនឡើង ២១,៣ ប៊ីលានដុល្លារអាមេរិក ។
«រាជរដ្ឋាភិបាលកម្ពុជាបានប្រកាសពីការប្តេជ្ញាចិត្តយ៉ាងមុតមាំក្នុងការកែទម្រង់ឲ្យកាន់តែស៊ីជម្រៅដែលយើងបានរៀបចំសម្រួលពាណិជ្ជកម្ម ពង្រឹងភាពប្រកួតប្រជែងជូនវិនិយោគិននៅកម្ពុជាក្រោមដំបូលសន្តិភាព លទ្ធិប្រជាធិបតេយ្យសេរីពហុបក្ស ដោយមិនមានការរើសអើង» ។ សម្តេចនាយករដ្ឋមន្ត្រីបានជម្រាបពលរដ្ឋថា ចំណែកផលិតផលក្នុងស្រុកសរុប (ផ.ស.ស) គឺជាមធ្យមសម្រាប់ប្រជាពលរដ្ឋកម្ពុជាម្នាក់ពី ១ ៦៧៩ ដុល្លារក្នុងឆ្នាំ ២០១៩ ដល់ប្រមាណ ១ ៦៨៣ដុល្លារអាមេរិកក្នុងឆ្នាំ ២០២០ ។ ទន្ទឹមនេះរាជរដ្ឋាភិបាលក៍បានរៀបចំប្រាក់ចំណូលជូនមន្ត្រីរាជការ និងកងកម្លាំងប្រដាប់អាវុធឲ្យទទួលបាននូវប្រាក់បៀវត្សអប្បបរមា កើនដល់កម្រិតជាង ១លាន ១៧ម៉ឺនរៀល ។
សម្រាប់ឆ្នាំថ្មីនេះ សម្តេចនាយករដ្ឋមន្ត្រីបានបញ្ជាក់ថា រដ្ឋាភិបាលបន្តការធ្វើកំណែទម្រង់ស៊ីជម្រៅតាម អភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ក្នុងនោះមានការពង្រឹងអភិបាលកិច្ចល្អ តាមរយៈការពពង្រឹងស្ថាប័នថ្នាក់ជាតិថ្នាក់ក្រោមជាតិ ៕
ចែករំលែកព័តមាននេះ