ប្រទេសឥណ្ឌា ៖ ចំនួនអ្នកឆ្លងវីរុសកូវីដ-១៩ថ្មីនៅឥណ្ឌា ពេលនេះកំពុងតែមានភាពខ្លាំងក្លា ញ៉ាំងឲ្យរដ្ឋមហារាស្ត្រាដែលមានក្រុងបុមបៃ
ជារដ្ឋធានី ត្រូវបិទចាប់ពីថ្ងៃទី៥ ខែមេសា ឆ្នាំ២០២១ទៅ ដោយសារក្នុងរដ្ឋនេះចំនួនអ្នកឆ្លងមានការកើនឡើងដោយរហ័សតំណាងឲ្យជាងពាក់កណ្ដាលនៃចំនួន អ្នកឆ្លងបច្ចុប្បន្នជំរឿនឃើញប្រចាំថ្ងៃនៅឥណ្ឌា ។
អាជ្ញាធរមូលដ្ឋានប្រកាសនាថ្ងៃទី៤ ខែមេសា បិទបណ្ដាមជ្ឈមណ្ឌលពាណិជ្ជកម្ម រោងភាពយន្ត ភោជនីយដ្ឋាន បណ្ដាទីតាំងវប្បធម៌ចាប់ពីថ្ងៃទី៥ ខែមេសាទៅ ហើយអនុវត្តការបង្ខាំងម៉ឺងម៉ាត់បំផុតនាបណ្ដាចុងសប្ដាហ៍ ។ បំរាមគោចរណ៍ពេលយប់ ក៏មានជាធរមានចាប់ពីម៉ោង២០ម៉ោងក្នុងស្រុកដល់ម៉ោង៧ព្រឹក ។ មានតែផ្នែកចាំបាច់បំផុតទេ ដែលនឹងអនុញ្ញាតឲ្យបន្តដំណើរការក្នុងពេលម៉ោងបំរាមគោចរណ៍ ។
ក្រសួងសុខាភិបាលឥណ្ឌាប្រកាសថា ចំនួនអ្នកឆ្លងវីរុសថ្មីនៅឥណ្ឌានាថ្ងៃទី៤ មេសា មានដល់កម្រិតកំពូលថ្មីដល់៩៣.២៤៩នាក់ ក្នុងនោះ៤៩.៤៤៧នាក់ក្នុងរដ្ឋមហារាស្ត្រាតែមួយគត់ ។ កាលពីថ្ងៃទី៣ មេសា ចំនួនអ្នកឆ្លងវីរុសនៅឥណ្ឌាមានជាង៨៩.០០០នាក់ ។ នៅឥណ្ឌាចំនួនអ្នកឆ្លងវីរុសសរុបមកដល់ថ្ងៃទី៤ មេសា កើនដល់ជាង១២,៥លាននាក់ និងអ្នកស្លា.ប់ជាង១៦៥.០០០នាក់ ។
លើពិភពលោកគិតដល់ថ្ងៃទី៤ មេសា ចំនួនអ្នកឆ្លងវីរុសបានកើនដល់ជាង១៣១លាននាក់ និងអ្នកស្លា.ប់ជាង២,៨៥លាននាក់ ។ អាមេរិកនៅតែជាប្រទេសរងការប៉ះពាល់ខ្លាំងជាងគេ ជាមួយអ្នកឆ្លងឡើងដល់ជាង៣០,៧លាននាក់ និងអ្នកស្លា.ប់ជាង៥៥៥.០០០នាក់ ។ ប្រេស៊ីលចំនួនអ្នកឆ្លងឡើងដល់ជាង១៣លាននាក់ និងអ្នកស្លា.ប់ជាង៣៣១.០០០នាក់ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ