រាជធានីភ្នំពេញ ៖ នារីម្នាក់ត្រូវបានរថយន្តសណ្ដោងរ៉ឺម៉កដឹកខ្សាច់មួយគ្រឿងកិ.នបែកក្បាលទាំងមួក បណ្តាលឱ្យបាត់បង់ជីវិតនៅលើស្ពានព្រែកព្នៅ ខណៈពេលដែលនារីរងគ្រោះជិះម៉ូតូមួយគ្រឿងជ្រុលទៅបុកខឿនថ្មើរជើង បណ្តាលឱ្យដួលចូលក្រោ.មកង់រថយន្ត ដែលធ្វើដំណើរមកពីក្រោយនោះ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោងប្រមាណ៩និង៥០នាទីព្រឹកថ្ងៃទី២ ខែមេសា ឆ្នាំ ២០២១ នៅចំណុចគល់ស្ពានព្រែកព្នៅខាងកើត ស្ថិតក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
នារីរងគ្រោះត្រូវបាននគរបាលអោយដឹងថា ឈ្មោះ ស្រី នាងអាយុ២២ឆ្នាំ មានទីលំនៅក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ត្រូវរថយន្តកិ.នបែកក្បាលទាំងមួកសុវត្តិភាព បណ្តាលឱ្យបាត់បង់ជីវិតគួរឱ្យអាណោចអាធ័ម។
រថយន្តមួយគ្រឿងខាងលើម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3E-7684 ជាប្រភេទរថយន្តសណ្ដោងរ៉ឺម៉កដឹកខ្សាច់ បើកបរដោយបុរសម្នាក់ឈ្មោះ ផុង សុភណ្ឌ អាយុ២០ឆ្នាំ មានលំនៅភូមិបាក់ខែង សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ត្រូវបាននគរបាលឃាត់ខ្លួន ។
តាមសាក្សីបានអោយដឹងថា នៅមុនពេលកើតហេតុ គេឃើញនារីរងគ្រោះបានជិះម៉ូតូមួយគ្រឿងម៉ាកហុងដា (អាសង់ប៊ិច) ពណ៌ក្រហម លាយស ពាក់ស្លាកលេខភ្នំពេញ1IB-9509 តែម្នាក់ឯង ធ្វើដំណើរឡើងស្ពានព្រែកព្នៅក្នុងទិសដៅពីលិចទៅកើត លុះនៅពេលចុះពីលើស្ពានជិតផុត ស្រាប់តែជ្រុលចង្កូតប៉ះខឿនសម្រាប់អ្នកថ្មើរជើង បណ្តាលអោយដួល គាប់ជួនពេលនោះ រថយន្តធុនធ្ងន់ខាងលើ មកពីក្រោយកិ.នចំក្បាល បណ្តាលឱ្យបាត់បង់ជីវិតភ្លាមៗនៅនឹងកន្លែងតែម្តង ។
តាមប្រភពព័ត៌មានខាងលើបានអោយដឹងទៀតថា បន្ទាប់ពីបង្កគ្រោះថ្នាក់រួច រថយន្តបានព្យាយាមបើកគេចបានប្រមាណកន្លះគីឡូម៉ែត្រ ត្រូវបានប្រជាពលរដ្ឋនាំគ្នាដេញឃាត់ខ្លួនបានប្រគល់អោយនគរបាលតែម្តង ។
ក្រោយពេលកើតហេតុ រថយន្ត និងម៉ូតូ ព្រមទាំងអ្នកបើកបរត្រូវបាននគរបាលបញ្ជូនទៅកាន់ការិយាល័យចរាចរណ៍ផ្លូវគោក ដើម្បីកសាងសំនុំរឿងចាត់ការតាមច្បាប់ ។ ចំណែកស.ពត្រូវបានក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ